1. Nuva Auhnak Caan Saudeuh A Rau Cang Lai – Innchungkhar Buaibainak Ser Timhlamhmi Phunglam (Family Violence Bill) kha Cozah Uknak Inn-sang (Senate) ah ceihdingin a luancia November thla ah an rak chuah pi. Nuva auhnak viza kongkau cu kaphnih nuva ning in tha tein chekhlatnak tuah hmasa a si lai. A-soktu he a-autu he an nuncan ziaza kong he pehtlaiin anmah pumpak konglam cu felfai tein chekhlat hmasa a si lai caah tukum 2019 thok cun, nuva I auhnak cu caan saudeuh a rau cang lai.
2. Caankarlak Um Khawhnak Nulepa Viza A Thar Sersiam A Si Lai --- Tukum 2019 thok in Australia rammi a si cangmi le umthainak nawl (PR) angeimi hna nih ramdang ah a ummi hringtu an nulepa cu Australia ah ta ding in auhkhawh a si lai. Kumkhat ah viza hi minung15,000 pek a si. Sokmi kha cohlan a si ahcun, hringtu nulepa cu kum 3 in kum 5 karlak chung umnak nawl an ngei lai. Tihzah upatnak he, a man bel cu $5000 in $10,000 a si lai. Ngandamnak le khuasak tintuknak kongkau he aa pehtlaimi paohpah cu a-autu/fale nih a dihlak in zohkhenh le tuanvo lak a si lai.
3. Ramdang Siangakchia Caah Hmuhsakmi Tangka Zat A Kai I $20,000 Nak Tamdeuh A Si Cang Lai - - Tukum 2019 thok in ramdang siangakchia nih Australia lei ah siangkai a duh a si ahcun hmuhsakmi tangka cu $20,290 a si lai. A nupi/pasal auh a duh a si ahcun $7000; le fale pakhat caah $3040 tiah liam le pek chap a si lai.
4.Australia Ngunkhuai Zung Nih A Ngeihmi Rikhot Le Rianngeitu Auhmi Mipem Hlawhzat Tluktlak Sile Silo Chekhlat A Si Lai --- Tukum 2019 incun Department of Home Affair nih rianngeitu (company) nih riantuantu an tinco tlak, biakam hrenmi ning tein hlawh an hmuh le hmuhlo kongkau ah thatein chekhlatnak a tuah lai. Australia Ngunkhuai Zung he i bawm in rian an tuan tti lai. Rianngeitu nih riatuan ding ah a auhmi minung, viza 457/482 phun aa tlaihmi riantuantu cu an ngunkhuai number le an hlawh hmuhmi tluktlaknak a um le um lo zohfelnak a ngei lai.
5. South Australia Ah Rianngeitu Caah Viza Thar Sersiampiak A Si Lai – Australia ram ah chawleh-chawhrawl tuah a duhmi nih “Business and Innovation Visa” timi hi sok in rian ot khawh a rak si tawn. Hi viza cu ngah zong a rak har. Sihmanhsehlaw, a tu ahcun South Australia chungah chawleh-chawhrawl tuah a duhmi nih viza fawi deuh in ngah khawh a si cang lai. Viza a soktu zong nih $200,000 hmuhsak zong a hau ti lo, cun, mirang holh le ca zong thiamtlinnak a ngeih hau ti lo nain, IELTS (Mirang holh le ca thiam le thiamlo hneksaknak tahfung) kha atlangpi ah 5 hrawng a hmuh ahcun tlamtlin a si cang lai. Nain, hi bantuk viza sok tik ah Australia ram ah zeibantuk chawleh-chawhrawl dah tuah aa timh timi fiang le felfai tein a cozah sin ah chimphuan a tuah ve a hau lai.
SBS Hakha Chin
