Muaj ntau yam kev phom sij cuam tshuam nrog tej khaub zeeg cua. Txuas ntxiv no yog ib co kev taw qhia tias yuav npaj li cas.
Tej kev phom sij uas yuav muaj tau:
- Dej nag nce siab tuaj nyab: yeej muaj ntau cov khaub zeeg cua tau ua rau muaj tej dej nag nce siab tuaj nyab, thiab ua rau tej dej hiav txwv nce siab tuaj los nyab tej av sai heev. Tej dej nces siab tuaj nyab no yeej muaj peev xwm tsim kev puas tsuaj rau tej vaj tse, thaiv yus kev tsis muaj peev xwm yuav tsiv tau mus rau lwm qhov chaw thiab tej zaum kuj muaj peev xwm ua rau yus raug mob thiab tas sim neej tau.
- Tej txhais tej khoom ya: yog thaum muaj cua hlob ces tej khoom uas xoob los yog sib yuav raug tshuab ya mus tsoo thiab tsim teeb meem phom sij tau.
- Cov kev poob deg: tej khaub zeeg cua muaj peev xwm yuav ua rau muaj tej dej nab nyab, uas yuav ua rau raug kev phom sij poob deg tau, thiab yog tej yam uas tej khaub zeeg cua ua rau neeg tas sim neej coob tshaj plaws.
- Ua rau tej vaj tse vau.
Mloog seb Hmoob tej zej zog npaj tos lub khaub zeeg cua Alfred li cas ntawm Brisbane tau ntawm no:
LISTEN TO
Npaj tos khaub zeeg cua Alfred
SBS Hmong
11:09
Yuav ua dab tsi ua ntej yuav tau ceev faj txog khaub zeeg cua los yog muaj cov kev ceeb toom txog khaub zeeg cua lawm.
- Npaj ib co list ntawm cov xov tooj emergency (emergency numbers) thiab khaws cia rau ib qho chaw twg uas txhua tus neeg ntawm yus tsev neeg pom tau yooj yim.
- Npaj ib tug neeg ntawm yus tsev neeg uas nyob txawv xeev los yog ib tug phooj ywg uas yuav tau xub hu ua ntej rau yog yus thiab yus tsev neeg ho raug sib cais nyias mus rau nyias ib qho chaw rau lub caij tseem muaj khaub zeeg cua ntawd.
- Txheeb seb qhov chaw twg ntawm yus lub tsev yog qhov ruaj khov tshaj plaws, uas yeej ib txwm yog qhov chaw uas muaj chav me tshaj plaws tsam ho tau nkaum. Thiab ua tib zoo xyuas kom tag nrho txhua tus neeg ntawm yus tsev neeg paub qhov chaw no.
- Txheeb nrog yus tej nom tswv zos los yog tej nom tswv uas tswj tej vaj tse seb yus lub tsev puas yog tej tsev uas tsim kom ntxeem dhau ntawm tej khaub zeeg cua.
- Txheeb yus tej ruv tsev, tej yees nthab tsev thiab tej phab ntsa tsev seb puas xau puas ruaj khov.
Npaj tej khoom siv emergency kit ntawm yus tsev uas tsim nyog muaj tej khoom li hais no:
- ib lub xov tooj cua nrog roj teeb,
- teeb tsom thiab npaj tej roj teeb kom tau siv ntxiv;
- first aid kit thiab phau ntawv qhia ua first aid,
- ntaub nplaum lo qhwv khoom uas ruaj tshaj plaws coj los lo qhov rais,
- thiab tej hnab uas tsis ntub nag;
- npaj tej zaug mov noj uas tsis lwj sai (khoom noj qhuav, khoom noj ntim kospoom, dej haus) etc,
- ib tug pas hlau qhib kospoom zaub mov,
- thoob ntim dej huv siv,
- tej hnab looj tes tuab,
- tswm ciab, ntais ntawv, teeb ntais, roj sam teeb taws,
- lauj kaub tais diav thiab tej twj ua noj ua haus,
- tej tshuaj noj tseem ceeb,
- tej ntaub ntawv tseem ceeb ntim hnab roj hmab kom tsis txhob ntub (li tej insurance policies, birth certificates, tej ntawv yuav tshuaj tau ntev, tej passport etc.,)
Muaj ntau yam kev phom sij cuam tshuam nrog tej khaub zeeg cua suav tej dej nag nce siab tuaj los nyab thiab tej khoom raug cua tshuab ya los tsoo. Source: Supplied / Neil McGuffie
Yuav ua dab tsi thaum muaj ib lub khaub zeeg cua:
- Npaj ib co tswv yim tias yuav khiav mus rau lwm thaj chaw li cas.
- Siv sij hawm li ob peb ntiag tiv nrog yus tsev neeg tham tias yuav ua dab tsi yog tias tsim nyog yuav tau tsiv mus rau lwm thaj chaw tshiab.
- Npaj ib qho chaw tau txais kev nyab xeeb tseg tias yuav mus rau qhov chaw ntawd yog tias muaj dej nag nce tshoom siab tuaj nyab los yog tsam muaj dej nyab. Ces yus tsev neeg lwm lub tsev thiab yus tej phooj ywg uas nyob deb ntawm yus thiab yog cov chaw nyob siab zog thiaj yog cov kev xaiv zoo tshaj plaws.
- Mloog tej xov xwm ntawm tej zej zog nthuav tawm hauv zov tooj cua thiab TV, los yog nyeem tej xovxwm hauv tej ntawv xov xwm, kom paub tias yuav siv tej kev twg khiav mus rau lwm qhov chaw.
- Ua tib zoo xyuas kom muaj tej roj khaws zoo cia yam tau txais kev nyab xeeb hauv yus lub chaw nres tsheb yog tias ho tsim nyog yuav tau tsiv mus rau lwm qhov chaw yam sai sai kiag.
- Xyaum yus tsev neeg kom txhua tus paub tias yuav ua dab tsi yog thaum yuav tau tsiv tawm mus rau lwm qhov chaw.
- Ua tib zoo xyuas kom sawv daws swm rau tej cim qhia cov kev ceeb toom txog tej xwm txheej ti tes ti taw (Standard Emergency Warning Signal). Thiiab yeej ib txwm rau tshaj tawm thaum yuav muaj ib lub khaub zeeg cua los hla rau lub sij hawm li ntawm 12 teev.
- Txiav txim siab seb yus ho yuav tau saib xyuas yus tej tsiaj txhu li cas yog tias yus ho tsis muaj pev xwm yuav coj nrog yus ua ke.
Yuav ua dab tsi thaum tau muaj cov kev cej luam kom txheeb thiab taug seb lub khaub zeeg cua zoo li cas lawm
Thaum tau muaj cov kev ceeb toom ''Cyclone Watch'' ces yog thaum uas muaj cua muaj ceem (63-87km/hr) los sis yog muaj cua hlob yuav los rau lub sij hawm li ntawm 2 hnub tsis yog li 24 teev txuas ntxiv.
Yog li ntawd yog tias ho muaj cov kev ceeb toom Cyclone Watch ces tsim nyog koj:
- Mloog koj lub xov tooj cua los yog saib TV, thiab txheeb lub chaw ntsuam thiab kwv yees huab cua lub vas sab www.bom.gov.au, los sis yog soj seb lub khaub zeeg cua ntawd ho zoo li cas lawm los yog muaj ceem li cas lawm.
- Ua zoo xyuas kom koj npaj tau koj cov emergency kit txaus siv thiab nrhiav tau kiag yooj yim coj los siv.
- Sam roj rau koj tej tsheb kom puv nkaus, thiab ntim dej rau tej thoob dej kom puv khaws cia tau siv.
- Txheeb seb yus tej cuab yig nyob zes yus (neighbours) ho puas paub txog cov kev ceeb toom kom soj qab taug lw ib lub khaub zeeg cua twg los yog ib cov kev ceeb toom txog lub khaub zeeg cua twg thiab ho yuav tau npaj dab tsi.
- Npaj yus lub tsev thiab txheeb tag nrho txhua yam khoom uas xoob uas tej zaum yuav plam. Tsis hais tej rooj tog sab nraum zoov, me nyuam yaus tej chaw ua si, tej twj siv ua vaj zaub tsim nyog yuav muab nqa thiab khaws cias rau sab hauv tsev ib qho qhov twg los yog coj los ntim rau tej thawv ntim cia kom zoo. Los sis yog yuav tau muab tej thoob ntim khoom seem txeej (khib nyiab) ntim dej kom puv txhua lub thiab muab khi rau ib qho qhov twg kom ruaj.
- Muab yus tej nkoj zoj khi kom ruaj, thiab tshem tag nrho yus tej tsheb thiab tsheb kauj vab mus nres rau hauv ib lub chaw nres uas ruaj khov. Muab tus pas rub kom tsheb nres tsa thiab muab ntaus cia rau.
- Cug dej rau tej thoob kom puv los yog npaj kom yus tej thawv ntim dej muaj dej txaus siv tsam ho tsis muaj dej txaus siv, thiab txheeb seb yus puas muaj cov ntsiav tshuaj uas tso rau kom dej huv kom thiaj haus tau tej dej ntawd.
- Coj yus tej me nyuam thiab yus tej tsiaj los nyob twj ywm hauv tsev txog rau thaum nom tswv muaj ib co kev taw qhia tshiab ntxiv tias seb yuav ua li cas.
- Ua tib zoo xyuas kom txhua tus neeg ntawm yus tsev neeg paub tias qhov chaw twg ntawm yus tsev yog qhov chaw uas ruaj thiab khov tshaj plaws, thiab kom paub tias yuav tau ua dab tsi thaum muaj cov kev ceeb toom ib lub khaub zeeg cua twg thiab ho yuav tau tsiv/khiav tawm mus rau lwm thaj chaw tshiab li cas.
Yuav ua dab tsi thaum tau muaj cov kev ceeb toom txog ib lub khaub zeeg cua
Cov kev ceeb toom txog ib lub khaub zeeg cua ''Cyclone Warning'' ces yog ib co kev ceeb toom thaum muaj cua hlob cuam tshuam nrog ib lub khaub zeeb cua uas yuav los hla ib thaj chaw twg rau lub sij hawm 24 teev.
Yog tias koj tej qhov cais muaj tej chaw khaw, ces yuav tau kaw kom ruaj. Tab sis yog tias tsis muaj, ces seb puas muab tej txiag ntoo los ntsia tuav rau, los yog muab tej ntaub nplaum ruaj ruaj uas lo qhwv khoom coj los ua cim khaub lig (X) rau kom ruaj, kom yog tias cua hlob thiab muaj tej yam dab tsi yam los tsoo tawg kom tsis txhob ya los hlais/tsoo yus, vim cov ntaub nplaum ntawd tua tej iav ruaj lawm. Tsis tas li ntawd los muaj peev xwm txo tej ntaub thaiv qhov rais thiab xaus yus tej qhov rooj qhov rais.
Cov kev npaj tej khoom yuav siv thaum yus tsiv/khiav ntawm yus tsev mus rau ib thaj chaw twg tshiab tsim nyog muaj tej no:
- Tej ris tsho sov,
- Tej tshuaj noj tseem ceeb,
- Me nyuam mos liab tej mis/mov noj thiab nappies,
- Tej khoom muaj nqes,
- Tog hauv ncoo, hnab pam pw thiab pam vov,
- Tej ntaub ntawv tseem ceeb, tej duab, ib yam khoom saib dab muag los yog duab uas teev txog ib co xwm txheej tseem ceeb twg ntim cia rau hauv tej hnab roj hmab uas tsis ntub dej,
- Thiab muab tej txee ruaj coj los thaiv pov puag tej khoom loj los yog hnyav uas muaj nqes.
Yog tias tej nom tswv zos hais ces yuav tau mus coj yus tej me nyuam ntawm tej teej kawm los yog tej chaw zov me nyuam rov qab los tsev.
Nyob twj ywm hauv tsev thiab mloog xov tooj cua thiab saib TV kom paub tej xov xwm tshiab seb zoo li cas ntxiv.
Yuav ua dab tsi thaum raug ceeb toom kom tsiv/khiav mus rau lwm thaj chaw tshiab
Tsuas nyob rau ntawm cov kev kwv yees tias seb puas yuav muaj cua hlob npaum li cas los yog puas muaj tej dej nag ces siab tuaj npaum li cas ntxiv ua cov txiav txim tias seb puas tsim nyog yuav tau tsiv mus rau lwm thaj chaw tshiab. Nom tswv yeej yuav tshaj tej kev taw qhia no rau hauv tej xov tooj cua zos los yog hauv TV tias tej kev twg yog cov tau txais kev nyab xeeb tshaj plaws uas yuav tau siv thaum mus rau lwm qhov chaw tshiab.
Thiab yog tias nom tswv tau muaj ib co kev ceeb toom kom khiav mus rau lwm qhov chaw tshiab lawm, ces yus thiab yus tsev neeg yuav tsum tau tawm kiag ntawm yus lub tsev mus kiab tam sim ntawd thiab mus nrog yus tej phooj ywg thiab yus tsev neeg nyob ntawm lawv lub tsev kom nrug deb ntawm tej chaw raug khaub zeeg cua thiab mus nyob rau tej chaw uas siab zog.
Thaum uas tab tom txav chaw mus rau lwm qhov chaw tshiab:
- Tua tag nrho tej hluav taws xob, gas thaib dej, thiab tshem tag nrho txhua yam khoom siv tawm ntawm tej chaw ntsia pob hluav taws xob, thiab kaw yus lub qhov rooj rau.
- Xyuas kom tag nrho yus tsev neeg rau tej khau tawv (tsis yog khau khiab) thiab hnav tej khaub nces tuab pov puag yugs.
- Nqa yus cov evacuation kits thiab ua raws li yus cov tswv yim evacuation plan (cov tswv yim tsiv rau lwm thaj chaw).
- Yog tias yus tsiv tau ib thaj chaw twg los sis mus txawv zos, ces xav kom mus ntxov kom tsis txhob daig tsheb tom kev, txhob ntsib dej nyab los yog txhob raug tej xwm txheej cua hlob.
- Yog tias ho tsiv mus nyob rau tej chaw npaj tos zej tsoom nyob ib ntus los sis yog ib qho chaw siab, ces ua raws li tub ceev xwm thiab SES tej kev taw qhia.
- Yog mus so ntawm zej tsoom tej chaw so ces yuav tau nrhiav txaj chaw pw, ntawv nyeem thiab tej games rau me nyuam yaus.
- Yog tias koj tab tom mus ntoj ncig holiday los sis mus xyuas xeev Queensland thiab tsis muaj koj tsev neeg los yog phooj ywg uas yuav mus so tau, ces hu kom sai kiag rau yus tus neeg uas nrhiav chaw so rau yus seb ho muaj txoj xub ke twg pab yus tsiv tawm ntawm thaj chaw ntawd mus rau lwm qhov chaw.
Yuav ua dab tsi rau lub caij thaum tseem tab tom muaj lub khaub zeeg cua
- Tua hluav taws xob, tua gas, tua dej thiab tshem tag nrho tshua yam twj siv hluav taws xob tawm ntawm qhov chaw ntsia hluav taws xob siv.
- Npaj yus cov emergency kit kom siv tau kiag tam sid.
- Nyob twj ywm hauv tsev thiab coj yus tsev neeg mus nyob rau ntawm chav/qhov chaw uas ruaj tshaj plaws ntawm yus lub tsev. Nyob kom nrug deb ntawm tej qhov rais. Tsis tas li ntawd los tej chaw li chav hauv qab tsev, txoj kev taug hauv tsev, chav dej tej zaum kuj yuav yog tej chaw uas khov tshaj plaws ntawm lub tsev thiab.
- Mloog yus lub xov tooj cua txog tej xov xwm khaub zeeg cua thiab nyob twj ywm hauv tsev txog rau thaum uas nom tswv muaj cov kev taw qhia tias seb yuav ua li cas ntxiv tso.
- Thiab yog tias yus lub tsev tawg/tu lawm, ces kom khiav mus nkaum hauv ib lub qab rooj los yog ib lub rooj loj uas muaj ib daim swv hnav pua rau. Tsis li ntawd ces yuav tau tuav tej khoom ruaj li tej raj dej.
- Lub caij uas lub plawv khaub zeeg cua los txog ntawm yus ntawd, ces tsis txhob tawm rau sab nraum zoov, vim lub khaub zeeg cua tseem tsis tau dhau mus. Yuav ua rau muaj cua hlob txuas ntxiv tshua ntawm lwm qhov tuaj. Thiaj xav kom nyog twj ywm hauv tsev txog rau thaum nom tswv qhia tias tau txais kev nyab xeeb tawm rau sab nraum zoov tso.
- Yog tias koj tseem tab tom tsav tsheb, ces kom tsa tus hanbrake thiab muab yus lub tsheb qhau gear rau. Nyob kom nrug deb ntawm tej hiav txwv los yog tsis txhob mus ze tej ntoo, tej ncej hluav taws xob los yog tej kwj deg. Nyob twj ywm hauv yus lub tsheb.
Yuav ua dab tsi tom qab khaub zeeg cua los hla dhau lawm?
Lub caij tom qab uas lub khaub zeeg cua tau los hla dhau kiag ntawd yog ib lub caij phom sij. Thiaj tau ua rau tej neeg raug mob ntau yam thiab muaj neeg tas sim neej coob vim tej neeg tsis ceev faj thiab pheej mus saib tej vaj tse tau vau thiab pheej tawm mus saib tej kev uas raug kev puas tsuaj ntawd.
Tom qab uas nom tswv tau muaj cov kev taw qhia tias khaub zeeg cua tau dhau mus lawm, yus yuav tsum tau:
- Mloog yus lub xov tooj cua thiab nyob twj ywm sab hauv yus lub tsev txog rau thaum seb nom tswv ho muaj lwm cov kev taw qhia li cas tso.
- Yog tias koj tau tsiv mus rau lwm qhov chaw lawm, ces tsis txhob rawm maj rov qab los rau koj lub tsev txog rau thaum nom tswv muaj cov kev taw qhia tias mus tau tso. Thiab yog tias nom tswv tau hais kom yus rov qab mus tsev lawm, ces yuav tsum siv yxoj kev uas lawv qhia kom yus siv nkaus xwb.
- Mloog yus lub xoov tooj cua kom paub txog nom tswv cov kev ceeb toom thiab tej lus taw qhia.
- Tsis txhob pheej tawm mus ncig saib qhov ub qhov no.
- Ceev faj tsam muaj tej ncej hluav taws xob puas, tej choj puas, los yog tej ntoo vau los tsim teeb meem rau yus. Thiab tsis txhob mus kwm tej chaw muaj dej nyab.
- Tsis txhob lam tau lam hu tej xov tooj tsis tsim nyog hu rau lwm tus.
- Txheeb seb cov yim neeg nyob zes yus zoo li cas lawm yog tias tsim nyog txheeb tiag.
- Tsis txhob coj tej twj siv hluav taws xob uas ntub dej lawm coj los siv (tsam hluav taws xob laum yus).
- Txheeb seb puas muaj tej gas dim pa qhov twg.
- Rhauv dej los yog lim tej dej coj los haus txog rau thaum uas nom tswv thauj tej dej huv tuaj rau yus siv los yog qhia tias tau txais kev nyab xeeb siv tej dej lawm.
- Yog tias tsis muaj peev xwm nyob tau ntawm koj lub tsev ntxiv vim raug kev puas tsuaj ntawm khaub zeeg cua lawm, ces kom hu rau yus tus nom tswv zos txheeb tias seb yuav nrhiav kev pab cuam dab tsi rau yus.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
