Thaum pib financial year tshiab lawm ces yeej yog lub caij uas peb yeej yuav tau thov se dua ib zaug ntxiv.
Yog xam rau coob leej ntau tus neeg Australia lawm ces txhais tias yuav tau me ntsis nyiaj coj los siv mus rau ib qho qhov twg, los sis yog coj los khaws cia los yog them nqe.
Tab sis yeej muaj tej neeg coob heev twb tau mus qhia hauv social media lawm tias dua ntawm qhov tsim nyog thov tau se rov qab tseem ua rau lawv yuav tau them tej nuj nqe se uas ua rau lawv ceeb thiab.
Tau muaj ib tug neeg siv ib phaum TikTok account tau sau ib sob lus tias "Kuv pheej xav tias kuv yuav thov tau nyiaj me ntsis los ntawm cov kev thov se kom kuv tau mus holiday,'' tab sis nws daim screenshot uas nws coj los qhia sawv daws ntawd tseem ua rau nws tiv Australian Taxation Office (ATO) nqe txog li $4,326.85 diam.
Txawm tias yeej muaj ntau tus neeg siv social media cia siab tias yuav thov tau nyiaj se ntau txheeb dollars rov qab, los kuj muaj lwm cov neeg tau qhia tias tej zaum ntshe lawv tsuas thov tau tsawg tsawg xwb — los sis ntshe xyov puas tau dab tsi rov qab li.
Vim li cas thiaj yuav ua rau koj tau them nqe se?
Tos tej neeg ho raug them se los vim tej se uas rho tawm ntawm lawv tej nyiaj lawv khwv tau coj mus them se rau financial year ntawd yeej tseem tsis tau them txaus raws li qhov tsim nyog lawv them.
Rob Thomson uas yog tus neeg ua hauj lwm pab ATO tus coj thiaj tau hais tias muaj ntau yam laj thawj ua rau muaj tej xwm txheej no.
Nws tau hais tias "Vim tej zaum tej neeg khwv tau nyiaj los ntawm cov kev ua ntau txoj hauj lwm los yog ho tau nyiaj lwm qhov los ntxiv ces ua rau lawv yuav tau them se ntau zog ntxiv, thiab tej zaum lawv kuj tau claim cov tax-free threshold rau tej hauj lwm ntau tshaj ib txoj hauj lwm, txhais tias thaum thov se rau thaum xaus financial year, ces tej tswv lagluam rho tej nyiaj yus khwv tau coj mus them se tsawg tshaj qhov tsim nyog rho.''
"Thiab tej zaum kuj yog tias yus ho tau qee yam nyiaj pab cuam los ntawm nom tswv uas yus yuav tau them se rau tej nyiaj yus tau no. Los sis yog tej zaum yus tseem tsis tau qhia rau yus tus tswv lagluam tias yus tseem tiv nom tswv tej nyiaj qev los kawm qib siab (HELP/HECs) thiab yus tus tswv lagluam tseem tsis tau rho tej nyiaj no rau financial year ntawd coj mus them se.''
Hos lwm yam piv txwv ces tej zaum kuj yog yus ho tau nyiaj lwm qhov los li tau paj los ntawm tej nyiaj yus khaws cia ntawm tej txhab nyiaj, los yog yus ho yuav tau them Medicare levey los yog Medicare levy surcharge los sis yog yus ho claim cov private health insurance rebate ntau dhau heev lawm.
Cov kev txo se theem peb ne ho yog li cas tiag?
Sawv daws yeej tham zom zaws txog cov kev txo se theem peb rau ntau lub hli tsis ntev los no, tab sis yeej tseem tsis tau coj los siv txog ntua rau hnub tim 1 lub 7 hli ntuj tso, ces thiaj tsis muaj dab tsi pauv hloov rau koj tej tax return xyoo no.
Raws li tsoom fwv teb chaws cov kev tau los txheeb cov kev txo se theem peb no, ces yog tias ib tug twg khwv tau nyiaj theem nrab txog li $73,000 ces yuav tau nyiaj los los ntawm cov kev txo se financial year xyoo no ntau tshaj li $1,500.
Hos tej neeg uas khwv nyiaj ib xyoos twg tau txog $50,000 ces yuav tau nyiaj ntxiv txog li $929, thiab tej neeg uas khwv tau ib xyoos twg txog li $200,000 yuav tau txog li $4,500.
Txawm li cas los tej kev pauv hloov no kuj ua rau muaj neeg Australia coob heev tau them se tsawg lawm, thiab Thomson tau hais tias tej zaum kuj yuav tsis muaj teeb meem dab tsi tsis hais yus tau los tsis tau txais cov kev txo se no rau xyoo 2025 no.
Nws tau hais tias "Yuav ua rau yus pom tias yus tau nyiaj txhua txhua 1 limtiam, 2 limtiam los yog txhua txhua hli twg ntau zog ntxiv tuaj tsuas nyob rau ntawm seb lawv them nyiaj raws lub caij li cas rau yus. Thiab yog tias yus tej nyiaj khwv tau los yeej raug txiav raws li qhov tsim nyog coj mus them se rau xyoo no lawm ces kuj yuav tsis muaj teeb meem dab tsi rau thaum xaus xyoo uas yus thov se rov qab.''
Lub caij twg thiaj tsim nyog koj mus thov se?
Yog tias koj xav thov se hauv online ces ATO yeej taw qhia kom tos txog rau thaum xaus lub 7 hli ntuj no kom nws teev tau ntau yam xov xwm rau tej ntawv thov se tso koj mam li mus sau ntawv thov se.
Yog tias yus npaj thov se rau yus tus kheej xwb, ces yuav tsum tau ua tsis pub dhau hnub tim 31 lub 10 hli ntuj.
Hos yog tias yus siv ib tug registered tax agent ua ces ua lig zog los tau.
Tsim nyog koj yuav tau ua dab tsi yog tias koj muaj nqe se yuav tau them?
ATO daim ntawv Notice of Assessment (NOA) yeej tau qhia tias koj yuav tsum tau them tej nqe koj tiv ATO nyiaj npaum li cas thiab yuav tau them ua ntej hnub twg tom qab koj tau ua tax return thiab lawv tau xav rau koj.
Tej neeg feem coob yeej yuav tau them lig kawg nkaus tsis pub dhau hnub tim 21 lub 11 hlis ntuj — txawm tias yus thov se lig.
Hos tej neeg uas thov se ua ntej tim 31 lub 10 hli ntuj tab sis tseem tsis tau txais daim ntawv NOA tom qab hnub zwj thaj ntawd ces kuj tseem muaj sij hawm 21 hnub los them tej nqe ntawd ua ntej nom tswv yuav pib tsub paj nrog peev rau yus them yog tias yus them lig.
LISTEN TO
How to spot scams, heading into tax season
SBS News
14/06/202408:06
Piv txwv tias yog yus thov se rau hnub tim 22 lub 10 hli ntuj tab sis txog rau hnub tim 5 lub 11 hlis ntuj yus mam tau txais ATO daim ntawv NOA uas xa tuaj rau yus, ces yus kuj muaj sij hawj txog rau hnub tim 26 lub 11 hlis ntuj mus them tej nqe se uas yus tiv ntawd.
Thomson tau hais tias yog tias yus ntsib teeb meem ua rau yus tsis muaj peev xwm them tau tej nqe ntawd raws sij hawm, ces tsim nyog yus yuav tau hu mus nrog ATO tham kom sai npaum li sai tau.
Nws hais tias "Raws li peb lub tswv yim ces peb yeej xav kom tej neeg them ua kom tag kiag ua ntej kom thiaj tsis tau them paj ntxiv. Tab sis yog tej neeg ho xav tau txais kev pab, ces lawv kuj muaj peev xwm hu rau peb los sis yog nrog lawv tus registered tax agent tham tau.''
Yuav ua li cas kom tsis txhob tau them dab tsi thaum thov se rov qab?
Thomson tau hais tias yog tias xyoo no koj tau ib daim ntawv them se, ces muaj ob peb yam tej zaum koj muaj peev xwm ua tau kom tsis txhob tau them ntxiv.
Nws hais tias "Yog koj ua hauj lwm ntau tshaj ib txoj, ces ua tib zoo xyuas kom kom tsuas claim cov tax-free threshold rau ib txoj hauj lwm xwb. Thiab yog tias koj ho muaj cov nuj nqe HECS HELP, tej nyiaj tub kawm qev los siv kawm ntawv los yog ib co study support loan twg, ces ua tib zoo xyuas kom koj qhia koj tus tswv lagluam kom txiav nyiaj mus them tej nqe no.''
Thiab yog tias koj ho yuav nyiaj tuav pov hwm tswj kev kho mob ntiag tug (Private health insurance) ces Thomson tau hais tias yuav tsum ua tib zoo xyuas kom yus qhia rau yus lub tuam txhab insurance paub tias seb puas muaj kev pauv hloov li cas rau yus tej nyiaj uas yus khwv tau ntawd.
Thomsom tau hais tias "Yus lub tuam txhab private health insurance ntawd tej zaum kuj yuav rebate cov health insurance yuam kev rau yus ces thaum txog lub caij ua se ntawd kuj yuav ua rau yus thov cov rebate ntawd ntau dhau heev lawm, ces thiaj yuav ua rau yus them se tsawg, thiab ATO thiaj yuav xa nqe se tuaj rau yus them.''
Yog koj xav nrog ib tug financial counsellor ntawm koj lub xeev tham ces hu rau lub koom haum National Debt Helpline tus xov tooj 1800 007 007.
Los sis koj muaj peev xwm hu tau rau tus xov tooj 1800 808 488 nrog neeg txum tim ib tug financial counsellor ntawm lub koom haum Mob Strong Debt Help tham.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
