Australia tej nom tswv tau tig los txhawb nqa UN tsab resolution nqua hu kom Palestine muaj peev xwm ua tau lub neej nyob yam thaj yeeb. Australia yog ib lub teb chaws ntawm 157 lub uas tau pom zoo nrog UN txawm tias tau muaj 8 lub teb chaws tsis pom zoo suav Meskas thiab Israel nrog. Lub ntsiab ntawm UN cov lus yog nqua hu kom Palestine nyob tau thaj yeeb, tau txais kev ncaj ncees thiab tau kev thaj yeeb ruaj ntawm Middle East.
Raws li tau muaj ib co kev nug txog lwm pab nom teb chaws (Federal Coalition) lub tswv yim yuav siv tej chaw tsim hluav taws xob qub uas siv roj zeb ntsuam tsim dhau los coj los ua cov chaw tsim cov nuclear reactors kom tsim tau hluav taws xob pheej yig, tau hluav taws xob huv thiab tau hluav taws xob ruaj siv ntawd ces kuj pom tau tias ntshe tseem yog ntau caum xyoo mas thiaj yuav muaj peev xwm siv tau.
Chris Minns uas yog tus hau xeev New South Wales hais tias lub hom phiaj ntawm lub rooj sab laj zum ob uas tham txog yaj yeeb txhaum cai ces yog xav pab txo kom muaj tej neeg tas sim neej tsawg.
Tau muaj ib tug kis ntawm Australia lub tuam chav tswj dej num txawv teb chaws thiab lagluam hais tias tsoom fwv Australia yeej soj tej xwm txheej martial law ntawm Kaus Lim qab teb, thiab tau hais kom tej neeg Australia ntawm lub teb chaws no tsis txhob mus koom cov kev rwg npoj tawm tsam, kom nrhiav transport siv, thiab nrhiav lwm cov kev pab cuam tsim nyog siv tsam ho muaj teeb meem tshwm sim.
Raws li lub koom haum Anglicare Australia ib co kev teeb txheeb tshiab qhia ces tej neeg Australia tsis tau hauj lwm ua uas tseem pib nrhiav hauj lwm tshiab ua yeej nrhiav tsis tshua tau hauj lwm ua. Tsab ntawv cej luam uas tau tshaj tawm hnub no (04.12.2024) uas tshuaj ntsuam txog tej neeg Jobseeker, tej hauj lwm, thiab tej kev haub tau yaum tej hauj lwm uas nrhiav neeg ua hauj lwm, ces pom tau tias yeej muaj 33 tug neeg sib tw mus nrhiav seb puas tau ib txoj hauj lwm tshiab twg ua. Xeev Northern Territory ces yog lub muaj neeg coob txog li 65 leeg mus sib tw seb puas tau tib txoj hauj lwm uas, txuas ntxiv ntawd ces yog Tasmania uas muaj neeg txog li 50 leej mus sib tw nrhiav tib txoj hauj lwm ua.
Pab neeg uas npaj kom Donald Trump uas yog Meskas tus nom yeej cov kev xaiv tsa los ua Meskas tus president tshiab ua tau nws tus tsoom fwv tshiab tau qhia tias lawv kuj tau muaj kev pom zoo nrog Meskas lub tuam chav Justice Department uas yuav cia lawv xa tej npe mus rau nom tswv Meskas txheeb nws tej nom thiab seb tej neeg no puas muaj teeb meem yuav ua rau tsis tau txais kev ruaj ntseg dab tsi. Limtiam dhau los ces Trump pawg neeg yeej tau pom zoo lwm yam thiab yuav muaj cov kev koom tes ntawm nom tswv teb chaws Meskas tej tuam chav thiab tso cai txheeb tej ntaub ntawv, tab sis kuj tau ncua tsis kos ib co xyeem mem tes rau ib co kev pom zoo nrog Justice Department thaum tseem sib tham txuas ntxiv.
Tau muaj ib tug kws lij choj sawv cev rau tus poj niam 95 xyoos hu ua Clare Nowland uas raug tus tub ceev xwm Kristian White xuas phom taser gun tua ntawm lub tsev laus Yallambee ntawm lub zos Cooma lub 5 hlis ntuj xyoo 2023 thiab tau tas sim neej tom qab ntawd tau hais tias tus neeg no tsev neeg mloog tias cov kev raug txim txhaum rau tus tub ceev xwm no yog ib cov kev txiav txim siab lig dhau lawm.
Monique Ryan uas yog ib tug nom ywj pheej hais tias kom lub khw supermarket Woolworths yuav tsum tau kub siab ua ib yam dab tsi los daws tej kev tawm tsam ntawm nws tej neeg ua hauj lwm ntawm lub chaw xa khoom rau nws tej khw muag, vim tau ua rau tsis muaj tej khoom muag ntawm tej txee muag khoom thoob plaws xeev Victoria. Lub koom haum Workers Union hais tias nws tej neeg ua hauj lwm tsuas xav kom tau nyiaj hauj lwm ntau tshaj 25% rau lub caij 3 xyoos xwb, thiab yeej tau muaj cov kev tawm tsam no yuav laug txog ob limtiam no lawm.
Maryellen Noreika uas yog ib tug kws txiav txim plaub ntug teb chaws tau muab Hunter Biden rooj plaub cuam tshuam nrog kev muaj phom siv tsis raug cai tso tseg tom qab uas Meskas tus president Joe Biden tau zam txim rau nws tus tub.
Tsoom fwv Nplog phau ntawv xov xwm Vientiane Times tau tshaj tawm tias nom tswv Meskas tau pab nyiaj ntau tshaj USD$ 3 million coj los yuav ib co tsheb rau Nplog tej neeg ua hauj lwm mus khaws tej foob pob tsis tau tawg ntawm tej zos nyob deb tau siv ua tej hauj lwm no.
Thaib phau ntawv xov xwm Bangkok Post tau tshaj tawm tias Thaib tus thawj pwm tsav Paetongtarn Shinawatra tsis lees paub tej lus tawm tswv yim ntau yam uas pheej hais tias cov kev muab Thaib tus nom ua hauj lwm tswj lagluam dhau los hu ua Boonsong tso yeej tsis yog ib co kev yuav qhib txoj hauv kev rau Yingluck Shinawatra uas yog Thaib tus qub thawj pwm tsav dhau los uas raug nom tswv Thaib tsub txim tias cuam tshuam txog cov kev lwg noj lwg haus nrog ib co projects thiab ua rau poob peev ntau billion Baht rau tej hauj lwm yuav pej xeem tej txhuv, kom nws muaj peev xwm rov qab mus tau rau teb chaws Thaib.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau los yog caum
