Australia yeej muaj tej legal system sib chab sib chaws thiab muaj ntau lub koom haum cuam tshuam uas nyias ua nyias hauj lwm rau cov theem hauj lwm sib tawv, tab sis yeej yog ua coj los tswj tej cai.
Associate professor William Partlett ntawm lub tuam chav qhia cai lij choj ntawm tsev kawm qib siab University of Melbourne tshab txhais tias:
''Txhais tau tias tag nrho txhua tus neeg ntiag tug yuav tsum tau ua raws cai, thiab yeej siv cai lij choj los tswj hwm rau sawv daws tib yam. Tsis tas li ntawd los tej tsev hais plaub yeej yog ib co tuaj nruab nrab uas ua tib zoo xyuas kom tej neeg ntiag tug coj mus hais plaub tau txais kev ncaj ncees. Tej txhooj cai tswj haiv yog tej tseem ceeb tswj tej txheej txheem tsim cai ntawm tsev tsoom fwv uas tej nom kis xeev tsim coj los tswj peb tej cwj pwm uas yog ib co cai tuaj nruab nrab.''
Tej cai uas tsev tsoom fwv tsim tau ces paub tias yog cov cai Acts of Parliament los sis yog cov cai 'statute law', hos tej cai uas tej tsev hais plaub los txheeb thiab tsim tau ces yog 'case law' los sis common law.
Dr Partlett thiaj qhia txog qhov sib txawv ntawm ob co cai no tias:
"Australia yog lub teb chaws siv tej cai common law system li tej siv ntawm teb chaws Askiv, pov txwv Hong Kong, teb chaws New Zealand thiab ntau cov teb chaws dhau los uas yog ib feem ntawm British Empire. Thiab tej cai statute law yeej muaj fwj chim dua tej cai common law.''
Australia los kuj muaj tej tsev hais plaub ntau yam sib txawv thiab High Court ces yog lub chaw uas rov qab los txheeb txhua yav tsev hais plaub cov kev txiav txim plaub ntug.
Dr Partlett thiaj tshab txhais tias:
''Ces thiaj muaj federal court uas muaj cov theem hauj lwm sib txawv ua li, muaj family court uas tswj tej family law, thiab yog ib co hauj lwm tseem ceeb theem haiv. Hos tej tsev hais plaub ntawm tej xeev ces muaj tej tsev hais plaub txij Magistrate courts mus txog rau County Court thiab Supereme Court los yog Court of Appeal uas yog tej koom haum tswj cai lij choj xeev. Ces High Court thiaj saib xyuas tag nrho tej tsev hais plaub teb chaws thiab xeev.''
Yog tham txog tej cai tswj cov kev ua txhaum cai ces feem ntau yog tej nom tswv xeev uas tus lis. Tab sis tej civil matters li cov kev tsis sib haum xeeb ntawm tej neeg ntiag tug, thiab tej koom haum li cuam tshuam txog vaj tse, tsis ua raws li tej contract tau kos xyeem mem tes tseg los yog tej neeg ua hauj lwm mus hais plaub kom tau nyiaj paj tshab ces kuj txawv.
Greg McIntyre SC, uas yog tus president ntawm lub koom haum Law Council of Australia thiaj qhia txog qhov sib txawv ntawm tej plaub ntug no tias:
''Yog tej plaub ntug cuam tshuam txog cov kev ua txhaum cai lawm ces tub ceev xwm yuav yog cov pib los txheeb tej teeb meem no li yuav tau tshuaj ntsuam seb leej twg ua txhaum cai, ces mam li xa tej plaub ntug no rau Director of Public Prosecution ntawm ib lub xeev twg ua cov txiav txim txuas ntxiv tias seb puas yuav coj ib tug neeg twg mus hais plaub los yog yuav phua txim li cas rau nws ntxiv. Tab sis yog tham txog tej xwm txheej cuam tshuam txog pej xeem lawm ces yuav tsis cuam tshuam nrog nom tswv. Piv txwv li yuav muaj ib tug twg coj lwm tus mus hais plaub ntawm ib lub tsev hais plaub twg kom tau nyiaj los kho ntau yam kev puas tsuaj los yog tau nyiaj paj tshab los pauj los ntxuav ntsej muag.''
Nom tswv los yeej yuav xub kub siab los txheeb tej plaub ntug ib tug twg ua txhaum cai tias puas tsim nyog tau txais kev pab cuam cai lij choj li cov kev pab ntawm lub koom haum Legal Aid Commission ntawm tej xeev los yog cov kev pab cuam cai lij choj ntawm tsoom fev teb chaws cov programs pab.
''Ces tej khoom haum no thiaj tsuas muaj tej plaub ntug tsawg tsawg uas lawv musj peev xwm txheeb xyuas xwb. Thiab muaj ib txhia ces yog cov uas yuav tau txais kev kub siab txog ua ntej lwm cov. Piv txwv li tej neeg ua txhaum cai uas tej zaum yuav raug txim kaw tsev laj cuj, los yog tej neeg txom nyem nyiaj txiaj uas raug teeb meem kub ntxhov hauv lub cuab yig yog cov yuav xub tau txais kev pab cuam cai li choj. Hos tej plaub ntug pej xeem uas ib tug twg xav mus hais plaub kom tau nyiaj paj tshab rau ib yam dab tsi xwb ces yeej yog tej yam nyuaj heev uas yuav tau tau cov kev pab cuam cai li choj ntawm Legal Aid siv.''
Mr Stone ntawm South Australia lub koom haum Legal Services Commission thiaj hais tias yeej muaj ntau yam kev pab cuam rau tej neeg tsis hais lawv yuav yog cov neeg zoo li cas li.
''Tej zaum tej neeg feem coob yeej xav tia Legal Aid yog qhov chaw yuav pab nrhiav tej kws lij choj sawv cev rau yus mus hais plaub ntawm tsev hais plaub xwb. Tab sis kuj tsuas pab tau qee yam xwb thiab. Feem ntau ces lub koom haum Legal Aid no yeej pab lwm yam kev pab cuam li muaj cov kev taw qhia rau tej neeg uas tsis tau siv tej legal aid grant thiab.''
Mr Greg McIntyre SC, uas yog tus president ntawm lub koom haum Law Council of Australia thiaj hais tias peb xav siv ib tug kws lij choj twg ces peb muaj peev xwm mus txheeb tau ntawm tej koom haum Bar Association thiab Law Socieites tej vas seb ces yeej paub tias seb tej kws lij choj twg muaj ntaub ntawv raug cai ua tau hauj lwm raug cai.
Thiaj ua rau Mr Stone hais tias yog tias koj yog ib tug neeg tsis tshua swm los yog tsis tshua paub zoo txog Australia tej legal system ces xav kom sab laj nrog tej kws lij choj.
''Vim tej zaum ib cov neeg twg uas tuaj rau teb chaws Australia no kuj tau ntsib tej xwm txheej tsis zoo txog tej legal system los yog tej txheej txheem hais plaub ntawm ib qho chaw twg uas ua rau lawv muaj txoj kev xav tsis zoo txog tej cai lij choj los yog tej txheej txheem hais plaub lawm. Yog li thiaj yog ib lub tswv yim zoo uas xav kom mus sab laj nrog tej kws lij choj seb Australia tej legal system ho ua hauj lwm zoo li cas.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
