Xov xwm tshaj tawm hnub zwj Teeb (Thursday news 10.04.2025):
Jacinta Allan uas yog tus hau xeev Victoria qhia tias nws tau muab tej yawm sij rau tej neeg cuam tshuam kom muaj peev xwm siv tau lub chaw nres tsheb ciav hlau Parkville Station lawm, uas yog ib kauj ruam tseem ceeb rau cov kev qhib lub qhov av siv kev tsheb ciav hlau Metro Tunnel ob ntawm Melbourne. Lub qhov kev tsheb ciav hlau no yuav muaj 5 lub chaw nres ntev 9 km thiab yuav pib qhib siv rau thaum xaus xyoo 2025 no. Thiaj pom tau tias ib hnub twg yeej muaj neeg txog li 10,000 tus mus rau ntawm thaj chaw Parville mus siv tsev kho mob thiab mus kawm ntawv ntawm tej tsev kawm qib siab. Ms Allan thiaj hais tias ''Thaum xaus xyoo 2025 no ces tej neeg yuav muaj peev xwm mus tau rau ntawm tej chaw ze Parkfield mus xyuas lawv tej neeg mob, mus ua hauj lwm ntawm tej tsev kho mob los sis yog mus kawm ntawv ntawm tej tsev kawm qib siab yam tsis tas txhawj ntxiv lawm. Thiaj yog ib co hauv paus txhim kho uas peb tau tsim rau tej neeg zejzog ntawd siv.''
Pab nom Greens tau qhia txog nws tej tswv yim pab tej neeg ntiav tsev nyob kom tau siv solar energy thiab pab kom lawv tau them tej nqe hluav taws xob pheej yig thiab pab neeg Australia ntau millions tus txo tej cua tsis huv tso rau tej ib puag ncig kom tsawg. Adam Bandt uas yog tus coj pab nom no thiaj tau los qhia txog cov tswv yim ''Right to Solar'' tias yuav ua rau tsoom fwv yuav tau pab them tej nyiaj yuav tau xub them coj los nruab tej phiaj ziab tshav kom tau hluav taws xob siv ntawm tej tsev tej neeg ntiav nyob. Thiaj tau muaj tej xwm txheej no tom qab tsoom fwv teb chaws (Tsoom fwv Albanese) tau qhia txog nws cov hauj lwm Cheaper Home Batteries Program uas siv nyiaj txog li $2.3 billion los pab tej tswv tsev them tej batteries nruab ntawm tsev khaws tej hluav taws xob siv uas yuav pab txuag tau ib lub twg txog li $4,000 thiab pab txuag tau tej nqe hluav taws xob ib xyoos twg tshaj li $1,000 uas tej neeg ntiav tsev nyob tsis tau siv ntawd.
Thawj pwm tsav Anthony Albanese tau cog lus tias yuav tshwm nyiaj $10 million los pab ceev txuag Australia cov paj pob zeb hiav txwv Great Barier Reef, uas yuav siv $6 million ntawm cov nyiaj no coj mus pab cov hauj lwm Kids For the Reef kom Australia tej me nyuam cov school excursion tau siv tej nyiaj no mus ncig Australia tej chaw no uas raug teev zwm nrog UNESCO World Heritage list ntawd.
Meskas tus President Donald Trump kuj tau ncua tsis tsub cov tariff rau ntau caum lub teb chaws 90 hnub tab sis tau tsub 125 feem pua rau Suav tej khoom xa muag rau Meskas. Ces Suav thiaj tsub cov se no 84 feem pua rau Meskas tej xa muag rau Suav thiab European Union (EU) los kuj tau tsub 25 feem pua rau Meskas tej khoom xa muag rau EU thiab. Meskas cov kev tsub tej se tariff no tau ua rau Australia 500 lub tuam txhab lagluam tej shares poob nqe ze txog li $50 billion nag hmo thaum uas tau tsub tej se tshiab rau Suav tuam tshoj.
UN hais tias Israel tej tub rog tau txwv nws cov kev pab cuam ntau tshaj li 2 feem 3 ntawm tag nrho nws cov kev pab cuam 170 zaus uas yuav xa mus pab rau tej neeg ntawm Gaza txij li tau xaus tsov rog ntawm Israel thiab Hamas.
Ukraine tau cav tias nws txhom tau ib co neeg suav uas mus pab Russia ua rog sib tua nrog Ukraine, thiab qhia tias raws li nws tej neeg soj xwm qab rooj hais ces tau nrhiav tej tug rog no hauv social media, uas nom tswv Suav tsis lees paub tej lus iab liam no thiab tau hais tias yog tej yam tsis txaus ntseeg.
Australia ob tug nom tswj nyiaj txiaj ntawm ob pab nom tseem ceeb li Jim Chalmers uas yog tus nom tswj nyiaj txiaj rau tsoom fwv teb chaws Albanese thiab Angus Taylor ntawm lwm pab nom teb chaws (Federal opposition) kuj tau sib teev theev nag hmo hnub zwj Feej (Wednesday tim 9 lub 4 hlis ntuj 2025) thiab tau hais kom tej neeg xaiv nom tsis txhob mus xaiv lwm pab nom.
Taylor tau hais tias ''Cov kev xaiv tsa no yog ib cov kev xaiv seb peb yuav tso siab rau pab nom twg uas muaj peev xwm los tswj tau peb tej lagluam rau lub caij peb tseem ua lub neej nyob nrog tej xwm txheej uas peb tsis paub tias xyov yuav zoo li cas.''
Chalmers los kuj hais tias ''Txawm tias yeej yog ib co caij tsis paub tias yuav muaj dab tsi pauv hloov li cas hauv ntiaj teb, los Australia yeej yog ib lub teb chaws uas muaj peev xwm ntxeem tau zoo thiab npaj tau zoo vim peb muaj tej tswv yim tswj tej lagluam thiab tau koom tes nrog neeg Australia los tswj.''
Nom tswv Cob Tsib hais tias tau muaj ib tug txiv neej tau tas sim neej vim tus kab mob dev vwm thiab zoo li tseem muaj ib tug neeg ntxiv uas lawv xav tias tau tus mob no thiab. Tsis ntev los no ces nom tswv yeej tau ceeb toom kom zej tsoom Cob Tsib coj lawv tej dev thiab miv thiab coj lawv tus kheej mus hno tshuaj tiv thaiv kab mob dev vwm. Tab sis lub cuam chav tswj dej num Liaj teb thiab Ib puag ncig tau qhia tias thawj 3 lub hlis ntawm xyoo 2025 no ces twg tau muaj 20 tus neeg tas sim neej los ntawm tus kab mob dev vwm no lawm raws li Touitre News qhia.
Lub txhab nyiaj Asian Development Bank (ADB) tau kwv yees tias xyoo 2025 no Nplog cov lagluam yuav loj hlob txog li 3,9 feem pua, thiab yuav tau lagluam zoo rau cov lagluam xa khoom muag thiab ntoj ncig. Hos xyoo 2026 ces tej lagluam yuav loj hlob txog li 4 feem pua raws li Vientiane Times tau tshaj tawm.
Nom tswv Thaib tau qhia tias tseem muaj zej tsoom totaub yuam kev rau nws tsab cai casino bill uas tseem sab laj thiab xav thov los tsim siv ntawd vim tsis yog tias tsim tau los siv lawm ces txawm yuav tso cai ua tau cov lagluam tsim kev lom zem thiab twv txiaj thoob teb chaws raws li Bangkok Post tau qhia.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
