Ntsiab lus tseem ceeb:
- Yog tej yam tseem ceeb rau cov kev npaj thiab xyuas kom kom tau txais kev nyab xeeb, li txheeb tej huab cua thiab seb ho puas muaj tej lus taw qhia dab tsi txog tej xwm txheej yuav muaj tau hav zoov kub hnyiab.
- Kom taug kev raws tej kev xwb, thiaj tsis raug kev puas tsuaj rau nroj tsuag xyoob ntoo thiab tej ib puag ncig.
- Tsuas coj yus cov kev nco cim tej chaw nrog rov qab xwb, tsis txhob de tej paj qus los yog coj tej nroj tsuag thiab tej tsiaj nruab nrag nrog yus los..
Tsis hais mus saib tej paj qus ua thawj zaug los yog tej neeg ntoj ncig ntawm tej zos toj siab uas twb paub zoo txog tej no lawm, cov kev yog ib tug neeg mus xyuas tej chaw no uas hwm tj chaw no yog tej yam tseem ceeb pab kom Australia tej nroj tsuag xyoob ntoo thiab tej tshiaj txhu kom lwm tus ho tau saib tau pom thiab muaj kev lom zem thiab.
Txhais tias kom sawv daws mus raws tej kev uas tau tsim kom sawv daws mus xwb, mus raws tej phiaj thiab tej kev taw qhia kom mus xwb, tsis txhob pov tej khoom seem txheej rau los yog tsim kev puas tsuaj rau tej chaw, los sis yog tsis txhob coj tej nrog tsuag xyoob ntoo thiab tej tsiaj qus nrog yus rov qab los.
Terry Dunham ces yog ib tug kws tshawb fawb pej xeem thiab kuj yog ib tug kws tshawb fawb txog Australia tej paj ntawm thaj chaw Albany uas nyob sab qab teb hnub poob ntawm xeev Western Australia uas yog ib thaj chaw uas nws yeej nyiam mus xyuas heev txij li thaum nws tseem yau lawm.
Terry hais tias “Yeej yog tej yam ua rau tej neeg xav tsis thoob thaum tau pom ntau yam nroj tsuag xyoob ntoo sib txawv uas muaj ntawm xeev Western Australia. Peb tej chaw ntawm sab hnub poob qab teb yog ib thaj chaw ntawm ntau thaj chaw hauv ntiaj teb uas muaj tej nroj tsuag xyoob ntoo ntau yam sib txawv tshaj plaws, thiab peb kuj muaj hmoo heev uas yeej pom tej paj qus tawg thawm niaj thawm xyoo.”
Bushwalkers on the Ravensthorpe Range Credit: Terry Dunham
“Vim yog muaj ib hom nroj tsuag xyoob ntoo los yog tsiaj txhu twg raug kev puas tsuaj lawm ces yeej yuav muaj kev cuam tshuam nrog txhua yam ib puag ncig lawm - tsis hais tej kab tej ntsaum, tej muv, tej noog, tej tshiaj me uas muaj pob txha nrob qaum los yog tej tsiaj uas loj zog. Thiab yuav muaj tej kev pauv hloov no rau ib lub caij ntev heev. Yog li ntawd thiaj xav kom peb yuav tsum xav txog tej teeb meem yuav muaj tau ntev ntxiv tuaj rau peb tej cwj pwm uas tsuas muaj kev lom zem luv luv. Yog ib lub meej mom tshwj xeeb heev, tsis yog tias peb muaj cai mus xyuas kom pom tej hav zoov nuj txeeg xwb tab sis tseem yuav pom tej nroj tsuag xyoob ntoo uas ib txwm muaj ntawm ntau tej chaw thiab.”
Jonnie Cobby ces yog ib tug txiv neej neeg txum tim caj ceg neeg Yankunytjatjara thiab Arrernte uas nyob ntawm lub teb chaws Wardandi Nyoongar country ntawm sab qab teb hnub poob ntawm xeev Western Australia uas nws ua hauj lwm tam li yog ib tug neeg tu thiab saib xyuas tej hav zoov.
Jonnie hais tias “Thaum uas mus rau tej national parks los yog lwm cov chaw hav zoov nuj txeeg uas tau txais kev pov puag, ces yeej muaj ntau tsav yam uas yus yuav ntsib yuav pom, thiaj yog ib lub cib fim zoo pab kom yus xav mus xyuas tej chaw no.”
Nws tshab txhais tias kom yuav tau tswj yus tej cwj pwm thaum , thiaj yuav pab kom lwm tus tau txais kev lom aem thaum mus xyuas tej chaw tam sim no los yog txuas ntxiv rau yav pem suab.
Coj tej cwj pwm li taug kev raws tej kev xwb, thiab nqa tej khoom seem txheej (rubbish) nrog yus mus, tu tej chaw yus mus kom zoo li thaum yus mus pom yog ib co piv txwv zoo ntawm tej cwj pwm peb xav kom tej neeg mus xyuas sawv daws coj thiab ua raws.Jonnie Cobby
Vim rau qhov ib co chaw puag ncig twg yog cov yuav raug tau teeb meem yooj yim, ces thaum mus xyuas thiaj yog tej yam tseem ceeb heev uas yuav tau hwm tej chaw ntawd thiab pom txog qhov tseem ceeb ntawm tej kab lis kev cai ntawm ib thaj chaw twg.
Jonnie hais tias “Cov kev nkab siab txog tej txiaj ntsim kab lis kev cai ntawm tej chaw thiab coj tej cwj pwm raws li qhov tsim nyog rau tej tswv chaw neeg txum tim ib thaj chaw twg los yog lawv tej keeb kwm tsis yog yuav pab kom tej neeg mua xyuas totaub zoo tuaj ntxiv thiab yuav pab kom muaj kev sib cuag nrog ib thaj chaw twg thaum lawv tab tom mus xyuas.”
Originally from China, photographer Sophie Xiang ces yeej yog ib tug kws yees duab uas tuaj ntawm teb chaws Suav tuaj nyob ntawm Australia uas tam sim no nyog ntawm Perth thiab qhia tej neeg siv xov tooj tes yees tej paj qus. Nws kuj tau siv sij hawm ntau heev mus xyuas tej hav zoov ntawm Western Australia mus yees tej paj, tej ntoo thiab tej thaum yees tej tsiaj qus.
Sophie hais tias “Xav kom peb mus taug kev ntawm tej hav zoov tam li yog tej yam peb xav paub xav pom. Kuv yeej yog ib tug neeg uas nyiam tej kev zoo nkauj uas yog tej yam kuv nyiam heev. Kuv yeej nyiam mus tom tej hav zoov thiab mus thaij peb tej hav zoov, thiaj tej thaum kuj ua rau yus tus siab thaum yus pom lwm tus neeg mus xyuas pov khoom seem txeej rau los yog tsim kev puas tsuaj rau tej nroj tsuag xyoob ntoo.”
Thiab raws li Sophie tshab txhais ces yus yeej muaj peev xwm yees tau tej duab zoo nkauj heev yam tsis tas tsim kev puas tsuaj dab tsi rau tej ib puag ncig.
Nws hais tias “Thaum uas kuv mua taug kev thiab mus ncig ces kuv yeej mus raws tej kev xav kom tsis txhob muaj teeb meem dab tsi rau tej nroj tsuag xyoob ntoo. Thiab yus yeej muaj peev xwm yees tau tej duab zoo tso rau yus tej social media yam tsis tsim kev puas tsuaj dab tsi rau tej ib puag ncig los yog tsis ua rau muaj teeb meem tsis zoo dab tsi rau lwm tus neeg mus xyuas. Thiaj xav kom tsis txhob mus de tej paj qus — vim yog ib co kev ua txhaum cai ntawm teb chaws Australia, thiaj xav kom tsis txhob mus khawb tej paj qus los yog muab lawv tshem rau lwm qhov chaw uas tej zaum tsis haum rau lawv thiab yuav tsis ciaj, thiaj pov puag peb tej ntsiaj qus li tej nab qa los yog lwm cov tsiaj ntshav txias. Thiab tsis txhob coj lawv mus rau lwm qhov chaw.”
Tsis tas li ntawd los kuj yog tej yam tseem ceeb yuav tau xyuas tias tsim nyog tso tej duab dab tsi rau hauv online xwb thiab, kom thiaj tsis txhob muaj teeb meem rau tej yam uas muaj tsawg tsawg los yog tej tsiaj txhu uas tej zaum yuav tu noob, thiab tsis txhob qhia tias lawv nyob qhov twg vim tsam ho muaj lwm tus pheej xav mus yees duab ces raug kev puas tsuaj rau lawv thiab.
Originally from China, photographer Sophie Xiang uas yog ib tug kws yees duab ces tuaj ntawm teb chaws Suav tuaj nyob ntawm Perth thiab qhia tej neeg siv xov tooj tes yees duab paj qus.
Yeej muaj tej xwm txheej li tej neeg cia li txhob txwm caij lawv tej tsheb kiv plaub lub log mus rau tej chaw uas tsis tsim nyog mus uas tsim kev puas tsuaj rau tej nroj tsuag xyoob ntoo, tej av thiab tej nroj los yog tej zaum kis kab mob rau lwm thaj chaw; tej cwj pwm uas zoo li tsis tshua paub tab tsuas xav kom yees tau ib daim duab zoo nkauj kuj yuav ua rau yus mus tsuj los yog tsim kev puag tsuaj rau ib co nroj tsuag xyoob ntoo twg uas muaj tsawg thiab yuav raug kev phoj sij tau yooj yim thiab.Jonnie Cobby
Li Jonnie tshab txhais lawm, cov kev mus khaws taws ntawm tej National Parks thiab tej chaw ceev txuag tsis pub txov ntawm tej chaw uas tsis tsim nyog mus rau yuav ua rau muaj teeb meem rau tej paj qus los yog chaw uas muaj tej nroj tsuag xyoob ntoo thiab tej tsiaj nruab nrag tej chaw nyob. Tsis tas li ntawd los cov kev de tej paj thiab tshem tej nroj tsuag xyoob ntoo thiab tej tsiaj txhu tawm ntawm ib qho chaw twg ntawm tej National Park los yog tej chaw pov puag thiab ceev txuag tsis pub txov ntawm teb chaws Australia no yog ib co kev ua txhaum cai thiab.
Queen of Sheba orchid. Credit: Terry Dunham
Thiab Terry Dunham tshab txhais tias tsuas nyob ntawm seb yog qhov chaw twg ntawm teb chaws Australia uas yus mus xyuas xwb, muaj ib txhia chaw ces tej zaum tej nroj tsuag xyoob ntoo yeej muaj ib co kab mob uas yus tej khau tsuj tau los yog los rau tej twj siv thiab tej tsheb muaj peev xwm coj mus kis tau rau lwm thaj chaw thiab.
Terry hais tias “Piv txwv li sab qab teb hnub poob ntawm Western Australia ces muaj tej kab mob pwm hu ua Phytophthora dieback fungus uas ua rau muaj teeb meem loj heev rau Australia tej ib puag ncig thiab. Thiaj tsim nyog peb yuav tau nqa ib tug nplauv coj mus txhuam tej av los yog tej khoom los rau peb tej khau thiab cheb tej khoom paug rau peb tej twj siv mus taug kev ntawm hav zoov kom huv si thaum peb yuav rov qab los tsev, thiab tsuas mus raws li tej kev uas tsim rau sawv daws siv xwb.”
Tsis tas li ntawd los tej zaum kuj muaj tej noob nroj lo rau peb tej khau thiab tej khaub ncaws thiab, yog li ntawd thiaj xav kom txheeb xyuas peb tej khau rau thiab tej ris tsho thiab tej log tsheb thiab qab tsheb seb puas lo av nkos cheb los yog ntxuav kom huv ua ntej yuav ncaim ntawm thaj chaw ntawd mus.
Cov kev hwm tej ib puag ncig yuav pab kom Australia tej paj xyoob paj ntoo zoo nkauj heev thiab tej tsiaj txhu tau txais kev pov puag thiab muaj rau txhua leej txhua tus tau mus pom mus xyuas kom muaj kev lom zem.
Terry hais tias “Peb tej nroj tsuag xyoob ntoo yeej tau ntxeem nrog ntau yam uas yuav tsim kev phom sij rau yav pem suab, yog li peb thiaj yuav tau ua tib zoo xyuas kom ceeb txuag thiab pov puag tau txhua tsav yam tsis hais loj los me.''
“Tsis txhob tshem ib yam dab tsi tawm ntawm peb tej hav zoov, tsis hais yog tej noob nroj, noob txiv, paj, nplooj ntoo, tawv ntoo los yog ceg/pas ntoo ntawm ib qho chaw mus rau lwm qhov chaw. Vim cov kev ua li no yog ib co kev ua txhaum cai, thiab yog tias ib tug twg tshem ib yam khoom tseem ceeb ntawm Australia ib co neeg twg, tej paj twg, tej ceg ntoo ntawm ib thaj hav zoov twg ces yuav ua rau muaj teeb meem rau tej tsiaj tsis tau chaw nyob rau ntawm tej chaw uas lawv yuav raug teeb meem tau. Thiaj tsis xav kom mus luaj ib qho chaw twg kom zoo yees/thaij duab ntawm ib tsob ntoo twg. Thiaj xav kom ua tib zoo xyuas tej chaw yus mus rau thiab tsis txhob mus de tej paj qus ntawm hav zoov.”
Jonnie Cobby, National Park Ranger.
Jonnie tshab txhais tias uas ntej koj yuav mus xyuas Australia ib thaj hav zoov twg yog tej yam tseem ceeb yuav tau npaj yus cov kev mus xyuas thaj chaw ntawd kom thiaj —suav cov kev txheeb txog tej xov xwm ceeb toom thiab taw qhia txog tej xwm txheej ti tes ti li lub caij kaw tej kev los yog muaj kev ceeb toom txog tej hav zoov kub hnyiab.
Jonnie hais tias “Tej zaum tej chaw yus npaj yuav mus xyuas ntawd kuj yuav yog tej chaw uas yuav muaj huab cua phem li huab cua kub sov heev, yog li thiaj xav kom tej neeg yuav tau xub kub siab txog yus cov kev nyab xeeb ua ntej cov kev yuav mus xyuas tej chaw ntawd. Yuav tau npaj tej khaub ncaws tsim nyog hnav, npaj dej haus raws li qhov tsim nyog thiab npaj tias seb yuav sib txuas lus li cas nrog lwm tus, los yog teev zwm lub caij mus taug kev ntawm hav zoov kom ntev zog, thiab xyuas kom yus paub tias yuav ua li cas thaum yus mus rau tej hav zoov hav tsuag kom tau txais kev nyab xeeb yog qee yam ntawm ntau yam uas tej neeg sawv daws yuav tau nco txog.”
“Thiaj xav kom tsis txhob coj/nqa ib yam dab tsi ntawm tej hav zoov tej chaw yus mus xyuas nrog yus rov qab los tsev thiab tsuas nqa tej duab yus yees nrog yus rov qab los tsev xwb, tsis tas li ntawd los tsis txhob cia/tso dab tsi rau tej chaw yus mus xyuas dua ntawm cov kev cia yus tej hneev taw tseg xwb. Kuv xav tias yog ib tsab xo yooj yim qhia meej rau sawv daws kom ua tau yooj yim thiab.”
Thiaj xav kom npaj ua ntej, muaj kev hwm tej chaw yus tab tom mus xyuas, thiab Terry qhia txog qhov tseem ceeb tias cov kev mus xyuas Australia tej hav zoov kuj yuav yog tej yam experience zoo heev rau yus thiab.
“Peb tej hav zoov uas peb ceev txuag thiab pov puag, tej national parks, tej kev, tej ntug hiav txwv, tej hav zoov hav tsuag ntawm tej tswv ntiag tug los yog lwm cov chaw toj siab uas zoo nkauj thiab muaj neeg xav mus saib mus xyuas heev. Tej chaw no yog tej chaw txhawb siab rau peb, yog tej chaw kho peb thiab tej chaw pab kom peb muaj zog. Cov kev tau mus xyuas tej hav zoov nuj txeeg ntawm tej luaj puas ntawm lub ntiaj teb no yog tej yam uas peb yeej yuav ris tej txiaj ntsig mus ib txhis.”
Koj muaj peev xwm txheeb tau tej xov xwm ntau yam kom ntxaws ntxiv txog cov kev mus xyuas Australia tej national parks thoob teb chaws Australia no raws li tej links hauv qab no:
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
