Ntsiab lus tseem ceeb:
- Neeg txum tim yeej tau ua lawv tej kab lis kev cai raws li qhov tsim nyog coj los tau ntau txheeb xyoo.
- Tej laus neeg Aboriginal yog cov tau txais kev hwm ntawm tej zejzog vim lawv yog cov neeg muaj txuj ci thiab paub tob txog tej kab lis kev cai.
- Tsis txhob txhawj txog cov kev nug txog tej txheej txheem kev ua lawv tej kab lis kev cai yog tias koj ua tib zoo nug yam muaj kev hwm.
- Cov kev siv tej lus raws li qhov tsim nyog siv thiab tsis txhob siv tej lus ua rau lawm tus tu siab yog ib txoj xub ke yooj yim qhia txog cov kev hwm lwm tus.
Neeg txum tim tej kab lis kev cai ces yeej ua raws li lub tswv yim uas tsim nyog ua coj lso qhia txog peb cov kev ua hauj lwm, cov kev sib raug zoo ntiag tug nrog neeg txum tim Aboriginal thiab Torres Strait Islander.
Thiaj yog tej yam tseem ceeb uas yuav tau nrog xyuas kom muaj tej kev sib raug zoo no vim lawv yog Australia cov neeg txum tim. Lawv yog cov neeg muaj txuj ci paub zoo txog lub teb chaws no uas muaj peev xwm yuav qhia peb kom paub txog tias yuav tu thiab saib xyuas peb tej ib puag ncig li cas.
Caroline Hughes ces yog ib tug laus neeg caj ceg neeg Ngunnawal ntawm ACT thiab tej zos cheeb tsam. Tam li yog ib tug laus neeg txum tim, ces yeej muaj neeg hwm tias nws yog ib tug uas paub zoo txog nws tej kab lis kev cai zoo heev.
''Peb yeej muaj peb cov kev ntseeg thiab tej cwj pwm coj raws li tej kab lis kev cai txij thaum peb xeev xwm los lawm ... thiab tej no yeej tseem yog ib feem ntawm peb lub neej niaj hnub niam no rau Australia tiam neej vam meej no,'' raws li nws hais.
Cov kev ua Australia tej neeg txum tim tej kab lis kev cai yog peb cov kev lees paub tej kev sib cuag tsis tu ncua ntawm neeg txum tim nrog lawv lub teb chaws thiab lawv tej kab lis kev cai qub qub uas tau ua los ntev heev lawm.
Rhoda Roberts ces yog SBS tus neeg txum tim ib tug coj tseem ceeb uas txhawb nqa kom ua neeg txum tim tej kab lis kev cai no txuas ntxiv.
Nws hais tias “Peb yeej tseem piav qhia peb tej dab neeg txuas ntxiv, thiab ua peb tej kab lis kev cai thiab yeej tau ua los ntev heev lawm. Thiab txawm tias tau muaj kev pauv hloov rau ntau yam - los peb yeej tseem yog tej neeg coj peb tej kab lis kev cai li qub - tsis hais peb lub teb chaws los peb tej lajlim tswv yim qhia tias peb yog leej twg ntawd ces yog peb cov kev tu saib xyuas peb lub teb chaws, peb tej hiav txwv, peb tej dej thiab peb lub ntuj.''
Tej neeg Aboriginal seev cev cov kev seev cev rau lub caij ua kev cai tos txais lwm tus mus rau lawv lub teb chaws ua ntej yuav muaj cov kev sib tw ncaws pob ntaus kev phooj ywg ntawm pab AC Milan thiab AS Roma ntawm lub tshav sib tw Optus Stadium rau hnub tim 31 lub 5 hlis ntuj xyoo 2024 ntawm nroog Perth, teb chaws Australia. Credit: Paul Kane/Getty Images
Tsim nyog peb hu Australia tej neeg txum tim li cas?
Caroline Hughes hais tias cov kev siv cov lo lus li ‘Aboriginal’ los yog ‘Torres Strait Islander’ yeej yog ib co lus tsim nyog siv tau thoob plaws Australia.
Tsis tas li ntawd los tej neeg txum tim kuj qhia tias lawv tuaj qhov twg tuaj thiab ho muaj kev cuam tshuam txog ib qho chaw twg li hu lawv tus kheej ua cov neeg txum tim 'Koori' uas yog tej neeg txum tim yeej ib txwm siv hu lawv tus kheej ntawm xeev New South Wales thiab xeev Victoria, hos tej neeg txum tim ntawm xeev Queensland hu lawv tus kheej hu ua 'Marray' thiab tej neeg txum tim ntawm xeev Tasmania hu lawv tus kheej hu ua 'Palawa.'
Ms Hughes los kuj hais tias ''kuv yeej xav kom tej neeg hu kuv tam li yog ib tug poj niam neeg Ngunnawal thiab vim yog kuv lub teb chaws.''
Kuv lub teb chaws yog qhia txog kuv tej lus thiab kev tsav neeg, thiab yog tej yam qhia rau lwm pawg neeg txum tim tias kuv tuaj ntawm lub teb chaws twg tuaj.Caroline Hughes
Muaj ob yam neeg txum tim sib txawv
Australia cov neeg txum tim Torres Strait Islanders ces yog ib co neeg nyob ntawm tej pov txwv ntawm suam av Cape York Peninsula thiab teb chaws Papua New Guinea uas yog tej xeeb leej xeeb ntxwv ntawm cov neeg Melanesian.
Thomas Mayo yeej yog ib tug neeg txum tim Torres Strait Islander thiab yog tus neeg ua hauj lwm pab tus coj ntawm lub koom haum Maritime Union of Australia. Nws hais tias neeg txum tim yeej yog ib cov neeg ntau yam sib txawv.
''Tag nrho tej neeg txum nyias yeej muaj nyias tej kab lis kev cai sib txawv me ntsis tab sis yeej pom tias muaj kev sib txawv txav kiag ntawm tej neeg txum tim nyob ntawm pov txwv (Islander) thiab av loj (Aboriginal) tej kab lis kev cai.''
Ces Australia ob co neeg txum tim Aboriginal thiab Torres Strait ob tug chij thiaj raug coj los tsa sawv ua ke nrog Australia tus chij coj los ua kev lees paub txog qhov sib txawv ntawm Australia tej neeg txum tim. Source: AAP / AAP Image/Mick Tsikas
Leej twg yog neeg txum tim tej laus neeg?
Neeg txum tim tej laus neeg ces yog ib co neeg uas tej tub koom siab ntawm tej neeg txum tim hwm thiab saib rau lub sam xeeb vim lawv yog tej neeg muaj txuj ci thiab paub zoo heev txog tej kab lis kev cai zoo. Ces thiaj pheej muab lawv hu ua ‘Aunty’ thiab ‘Uncle’. Tab sis kuj yog tej yam tsim nyog uas yog tej neeg tsis yog neeg txum tim xav hu neeg txum tim tej laus neeg li no ces yuav tau xub nug tias seb yus hu puas tau lawv li ntawv thiab tso mam li hu.
Tej laus neeg txum tim yeej yog tej neeg ib txwm ua tej kev cai tos txais lwm tus tuaj rau neeg txum tim lub teb chaws (Welcome to Country) thaum muaj ib co koom txoos tseem ceeb dab tsi.
‘Welcome to Country’ yog dab tsi?
Rhoda Roberts tau tsim cov kab lis kev cai no rau lub caij xyoo 1980, thiab Welcome to Country ces yog ib co kab lis kev cai qhib ib co koom txoos twg coj los nco txog yav tag los. Tsis hais yog cov kev los hais ib co lus, kev seev cev, los yog ua kev cai hlawv nplooj ntoos.
Thiab raws li Rhoda Roberts hais ces tej kev cai ‘Acknowledgement of Country’ los kuj muaj ntsis zoo sib xws thiab kuj yog ib cov kev ua kev tos txais rau lub caij muaj tej rooj sab laj tseem ceeb, uas ib tug twg muaj peev xwm ua tau.
“Acknowledgement ces yog cov kev lees paub tias tej zaum yus tab tom ua hauj lwm los yog tab tom nyob ntawm ib thaj chaw twg uas yus tsis ib txwm nyob. Tab sis yus yeej tseem yog ib feem ntawm thaj chaw ntawd thiab yus lees paub thiab ua tsaug rau tej tswv teb chaws thiab tej laus neeg tseem ceeb xwb.''
An Indigenous performer participates in a smoking ceremony. Source: Getty / Cameron Spencer/Getty Images
Tej lus tsis tsim nyog siv
Caroline Hughes hais tias cov kev raug cais tawm ntawm tsev neeg thaum tseem yog me nyuam yaus yog ib co keev kwm uas ua rau tej neeg txum tim ntshai thiab ua rau muaj teeb meem rau cov kev yuav los teb tej lus nug tias seb lawv yog tej neeg zoo li cas.
Nws hais tias “Yog tej yam tsis tsim nyog li uas pheej nug tias seb tus neeg txum tim ntawd muaj cov feem puas neeg txum tim npaum li cas, los yog nug txog nws caiv nqaij daim tawv, xim qhov muag los yog xim plaub hau, vim peb tej me nyuam ces peb yeej tu thiab qhuab qhia raws peb tej kab lis kev cai. Thiab tej neeg dawb los yog tej neeg tsis yog neeg txum tim yeej tsis lees paub tej me nyuam no, tab sis raws li peb tej neeg txum tim Aboriginal tej kab lis kev cai lawm, ces tej me nyuam no yog ib co khoom plig uas lub ntuj ntsuj plig pub rau peb, pub rau peb tej cuab yig, peb tej zejzog thiab peb yeej ib txwm lees paub lawv.”
Caroline Hughes tshab txhais tias peb yuav tau sau thawj tug niam ntawv loj rau cov lus no: ‘Indigenous’, ‘Aboriginal’, ‘Torres Strait Islander’, ‘Elder’. Thiab cov kev muab cov lus no sau ua los lus luv yog tej yam thuam thiab saib tsis tau tej neeg txum tim.
Nws hais tias “Kom tsis txhob muab lo lus 'Aboriginal' sau ua lo lus luv siv hlo li. Vim peb tsis yog ib cov neeg uas yuav siv ib co niam ntawv luv luv coj los sau sawv cev qhia tias yog peb, thiab cov kev siv tej ntawv luv luv no yog tej yam thuam saib tsis taus peb thiab ua rau peb tu siab heev.''
Kawm kom paub ntau tuaj ntxiv txog neeg txum tim coj los ua kev hwm lawv
Thomas Mayo hais tias tsis txhoab txhawj yuav nug tej lus nug txog tej txheej txheem ua neeg txum tim tej kab lis kev cai, yog tias yus yeej tau ua tib zoo xyuas kom nug raws li qhov tsim nyog nug thiab kom muaj kev hwm lwm tus.
Mr Mayo hais tias “Thiab qhov tseem ceeb tshaj plaws ces yog yuav tau mloog thiab lees tej kev tshab txhais thiab kom muaj peev xwm ua tau lub neej txuas ntxiv yam muaj kev sib hwm.”
Nws kuj tau hais ntxiv thiab tias kom sawv daws nyeem cov sob lus Uluru Statement from the Heart uas yeej muaj thiab pab cov kev xav thov hloov kho no.
SBS tus laus neeg txum tim tseem ceeb thiaj xav qhia kom peb ras txog cov kev ua neeg txum tim tej kab lis kev cai no tias yog tej yam tseem ceeb rau cov kev lees paub txog lwm tus tib neeg tib yam li yus thiab.
Vim yog ib cov kev ua siab dawb siab zoo thiab cov kev hlub tshua txog lwm tus, tsis tas li ntawd los kuj yog ib co kev coj cwj pwm zoo thiab.Rhoda Roberts
Tau coj zaj xov xwm no coj los nthuav tawm thawj zaug rau lub 5 hlis ntuj xyoo 2022.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
