Xov xwm luv tshaj tawm hnub zwj Feej (Wednesday news 07.05.2025):
Tim Wilson uas yog pab nom Liberal tus nom ntawm lub rooj nom kuj tau sib tw yeej cov kev xaiv tsa nrog Zoe Daniel uas yog ib tug nom ywj pheej rov qab los tswj nws lub rooj nom li qub lawm.
Anthony Albanese tau npaj yuav los qhia tias seb nws yuav xaiv cov nom tseem ceeb twg los tswj nws tej tuam chav hauj lwm tom qab uas pab nom koom tswj tau swb cov kev xaiv tsa tsoom fwv teb chaws thiab nws yuav tau rov qab los txheeb thiab xaiv dua nws tus coj tshiab. Pab nom Labor tej nom tseem yuav sab laj hnub zwj Kuab (Friday) no seb yuav xaiv tej nom twg los tswj tej tuam chav twg, tab sis kuj cia siab tias tej zaum tej nom tseem ceeb uas ua lawv tej hauj lwm tam sim no tseem yuav tau lawv tej hauj lwm li qub txuas ntxiv mus.
Scott Bessent uas yog Meskas tus nom tswj nyiaj txiaj rau tsoom fwv Trump hais tias tej zaum nws yuav qhia txog cov kev sib khom pom zoo lagluam nrog ntau lub teb chaws ua lagluam nrog teb chaws Meskas thaum ntxov limtiam no. Uas nws hais tias President Donald Trump tab tom tau sib khom nrog 17 lub teb chaws ua luam nrog nws, tab sis tseem tsis tau nrog Suav tuam tshoj uas yog ntiaj teb lub teb chaws ua lagluam loj ua zum ob hauv ntiaj teb no tham.
Lub koom haum Australia's National Research Organisation for Women's Safety (ANROWS) kuj tau teeb tsa nws ib pawg coj tshiab los tsim ib co tswv yim npaj tseg yuav los xaus tej kev tsim kev kub ntxhov rau poj niam thiab me nyuam. Tej coj tshiab no thiaj yuav yog tej kws teeb txheeb paub zoo txog tej teeb meem kub ntxhov hauv lub cuab yig, tej kws paub zoo txog cov kev tsim cai rau zej tsoom siv thiab kws paub nrog xyuas kom tau txais vaj huam sib luag rau poj niam txiv neej. Thiab tej neeg ua hauj lwm tsim cov kev pab cuam rau tej neeg raug tej teeb meem no yeej tau qia tias tau muaj tej teeb meem kub ntxhov uas yuam tej poj niam me nyuam, thiab tej teeb meem kub ntxhov muaj rau tej hluas ntau tuaj ntxiv ces thiaj tau muaj cov kev nqua hu kom siv tej tswv yim muaj pov thawj tim khawv qhia tau zoo tias siv tau hauj lwm zoo coj los kho tej teeb meem no.
Tau muaj ob kwv tij hnoob nyoog 6 xyoo thiab 7 xyoo tau tas sim neej ntawm ib lub tsev ntawm lub zos Coonabarabran ntawm qaum teb hnub poob ntawm xeev New South Wales uas tub ceev xwm hais tias nkawv cov kev nruam sim yog ob lub txim tua neeg. Lawv kuj tau muab nkawv pog uas muaj 66 xyoo ceev tseg cia ntawm lub tsev kho tej neeg nyuaj siab ntxhov plawv ntawm Orange thiab tseem tos yuav rau txim rau nws.
Nom tswv Israel hais tias lawv yeej tsis ntshai yuav siv lo lus tswj thiab nam nias Gaza ntxiv lawm rau lub caij Israel tus thawj pwm tsav Benjamin Netanyahu tau hais tias Israle yuav siv tub rog mus tawm tsam thiab txeeb tswj Gaza thiab tswj tag nrho txhua cov kev pab cuam xa mus pab Gaza.
Australia lub tuam chav Department of Agriculture, Fisheries and Forestry tau pab nyiaj thiab sab txuj mus qhia rau Cob tsib lub tsev kawm qib siab Nha Trang Univesity coj los qhia tej kev txhom ntses txhaum cai uas tau ua rau EU tau muab npav daj rau teb chaws Cob Tsib raws li Tuoitre News tau qhia.
Tau muaj cov kev pom zoo ntaw Nplog lub tuam txhab hluav taws xob (Electricy du Laos -EDL) thiab lub tuam txhab Sisan International Joint Development Sole Co Ltd tau kos xyeem mem tes pom zoo yuav los ua ib cov kev teeb txheeb thiab yuav npaj los muab tej xov tooj thiab tej xov hluav taws xob faus rau hauv av kom tau txais kev nyab xeeb. Yuav ua cov hauj lwm no 3 theem, li pib hav plawv tuam ceeb Vientiane, ntxiv ntawm mam ua rau tej zos ib puag ncig ces theem peb mam li ua kom txhua rau txhua lub xeev raws li Vientiane Times qhia.
Nom tswv Thaib ntawm xeev Mukdahan kuj tau txheeb tau tias muaj tus neeg 4 uas kis tau tus mob Anthrax lawm vim tej zaum yog noj tej nqaij nyoos. Tsis ntev los no nom tswv Nplog kuj tau txwv tsis pub yuav ntau yam nqaij ntawm teb chaws Thaib los noj li nqaij nyuj, nqaij npuas, nqaij yaj, nqaij nees los noj vim txhawj tsam tsis tau txais kev nyab xeeb. Thiab kuj tau muaj Thaib tej kws kho mob qhia tias muaj 3 txoj xub ke kis tau tus mob Anthrax no los ntawm cov kev hlais tej nqaij uas muaj tus kab mob no, noj tej nqaij nyoos uas muaj tus kab mob no thiab tej zaum ua tau tej pa uas muaj tus kab mob no tej qe raws li Bangkok Post qhia.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
