Xov xwm luv tshaj tawm hnub zwj Quag (Tuesday news 06.05.2025):
Lub koom haum tswj cov kev xaiv tsa tseem tab tom suav tej ntawv xaiv tsa ntawm 16 lub rooj nom uas tseem tsis tau txiav txim tias pab nom twg yeej txuas ntxiv rau lub caij uas Zali Staggle kuj tau cov suab xaiv nom sib tw muaj ceem heev nrog pab nom Liberal tus nom Tim Wilson lub rooj nom Goldstein, thiab tau kwv yees tias tej zaum nws yuav swb yog suav tej ntawv xaiv nom ntau tuaj ntxiv.
Anthony Albanese tau qhia tias nws tus tsoom fwv rov qab tau los ua nom zaum ob tam li yog tus thawj pwm tsav ntawm teb chaws Australia, tom qab uas pab nom Labor tau yeej cov rooj nom feem coob hauv tsev kis xeev qes txog 86 lub. Nws thiaj hais tias cov kev xaiv tsa yog lub neej pem suab. Nws hais ntxiv tias ''Kev xaiv tsa yog lub neej pem suab, tsis yog yav tag los. Tej neeg yeej xav paub tias seb peb yuav ua dab tsi rau yav pem suab. Thiab yeej yog ib co uas peb tau kawm tau txij xyoo 1983 los lawm.''
Pab nom Liberal los kuj tseem yuav los nrhiav seb leej twg yuav ua nws tus coj tshiab tom qab uas lwm pab nom teb chaws tau swb cov kev xaiv tsa tsoom fwv teb chaws. Angus Taylor kuj yog tus neeg tseem ceeb los sib tw, ntxiv ntawd yog Jane Hume uas yog tus nom tswj lub txhab nyiaj, Dan Tehan uas yog tus nom tswj tej dej num tsiv teb tsaws chaw thiab Susan Ley uas yog tus lwm coj ntawm pab nom Liberal uas yog cov neeg xav los sib tw seb puas tau ua tus coj.
Raws NSW lub tsev tsoom fwv tsab cai uas xav thov tsim hnub tim 06.05.2025 no ces yog tsim tau los siv tiag ces sai sai tom ntej no tej neeg raug lwm tus ua phem rau yuav muaj cai paub tias tus neeg ua txhaum rau lawv ntawv raug kaw tsev laj cuj qhov twg, raug teem txim dab tsi, puas muaj cai thov hais kom txo txim los yog puas raug kaw ze lawv uas tej zaum ua rau lawv yuav tsis tau txais kev nyab xeeb.
Tsoom fwv teb chaws Australia tau qhia tias nws yuav ua tib zoo los pov puag cov lagluam ua yeeb yaj kiab (Movies) rau lub caij uas Meskas tus President Donald Trump hais tias yuav tsub se rau tej films/movies ua txawv teb chaws txog 100 feem pua. Ces tej neeg ua tej hauj lwm no ntawm Screen Australia thiaj hais tias yuav ua rau muaj teeb meem rau ntiaj teb tej movies.
Kremlin tau qhia tias tsim nyog muaj ib lub rooj sab laj uas Meskas tus President Donald Trump thiab Russia tus President Vladimir Putin koom, tom qab tau muaj xov xwm qhia tias Trump thiab nws tus neeg sab laj tawm tswv yim tau sab laj tias yuav xaus tej tsov rog Ukraine thiab Russia li cas.
Tsoom fwv xeev Victoria cia siab tias yuav xaiv New Zealand tus hau tub ceev xwm Mike Bushe los ua xeev Victoria tus hau tub ceev xwm uas nws yuav los pib nws txoj hauj lwm no txij hnub tim 27 lub 6 hli ntuj 2025 no mus.
Nom tswv Nplog kuj tau txwv tsis pub yuav ntau yam nqaij li nqaij nyuj, nqaij npuas, nqaij nees, thiab nqaij yaj ntawm teb chaws Thaib los noj hauv teb chaws Nplog tom qab txheeb tau tias muaj ib tug txiv neej Thaib tau tas sim neej cuam tshuam txog tej nqaij. Tab sis nom tswv kuj tsis qhia tias tias thaum twg thiaj rov qab pub yuav tej nqaij no los noj. Tau muaj ib tug kws kho mob ntawm Thaib lub tuam chav tswj thiab tiv thaiv kab mob tau qhia tias kis tau tus kab mob Anthrax raws 3 txoj xub ke li: hlais tej nqaij nyoos ntawm tus tsiaj muaj tus mob no, noj tej nqaij nyoos ntawm tus tsiaj muaj tus mob no los yog nqus tau tej spores uas ya raws cua raws li The Laotian Times tau tshaj tawm.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
