Pab nom koom tswj (Coalition) yuav qhia tias yuav siv nyiaj ntau npaum li cas los ua tej hauj lwm li nws tej cai tau teev tseg rau hnub zwj Teeb (Thursday 01.05.2025), thiab cog lus tias yuav pab kom haiv neeg Australia no tiv nuj nqes tsawg dua $40 billion rau lub sij hawm 4 xyoos ntxiv no, thiab yuav txiav tsoom fwv tej nyiaj uas nws siv ntau tshaj $60 billion.
Lub caij tav su dua hnub tim 1.5.2025 no cesAngus Taylor uas yog tus nom tswj nyiaj txiaj ntawm lwm pab nom teb chaws thiaj tau qhia txog pab nom koom tswj (Coalition) tej nyiaj yuav siv los ua ntau yam programs tom qab raug Jim Chalmers uas yog tus nom tswj nyiaj txiaj rau tsoom fwv Albanese tsub nias kom qhia, ces nws thiaj qhia tias yuav tau nyiaj qhov twg los li no:
- Tsis txo Labor cov tub kawm tej nuj nqe $16 billion.
- Txo se rau tej neeg muaj nyiaj super tshaj $3 million.
- Txiav cov nyiaj $10 billion Housing Australia Future Fund
- Txiav cov nyiaj $20 billion txuas xov thiab tsa nce hluav taws xob siv.
- Txo se rau tej laguam khawb cov critical mineral thiab tsheb siv hluav taws xob kom pheej yig.
- Txiav tej nyiaj uas tsoom fwv teb chaws yuav tsim Subruban Rail Loop ntawm Melbourne.
Pab nom koom tswj thiaj qhia tias nws yuav txuag tau nyiaj $14 billion rau 4 xyoos, tab sis thawj ob xyoo ces tus tsoom fwv Dutton yuav poob peev rau tej nyiaj puag xyoo ntau dua.
Thiab tau kwv yees tias yuav poob txog $5.6 billion xyoo 2025-26 thiab xyoo tom qab ntawd yuav poob txog $2.3 billion piv rau tej tau xub kwv yees ua ntej yuav muaj cov kev xaiv tsa. Tab sis ob co financial years ntxiv yuav tau nyiaj $9.5 billion zoo tuaj ntxiv thiab tau $2.2 billion.
Angus Taylor thiaj hais tias ''yog ib cov kev pab tau tej nyiaj puag xyoo zoo tshaj plws piv rau tej nqe ntau yam uas siv tam sim no rau lub caij yuav laug txog 15 xyoos dhau los.''
Nws tau hais tias vim tej tswv yim no ces ''thiaj yuav daws tau tej nqe siv ua lub neej kom pab tau neeg Australia tej cwj pwm ua lub neej zog tuaj ntxiv''. Tsis tas li ntawd los Coalition kuj npaj yuav txiav cov nyiaj pab txawv teb chaws tshaj $800 million tab sis kuj tsis txiav tej pab rau Indonsia thiab cheeb tsam Pacific.
Ua ntej uas yuav los qhia tej nyiaj no ces Coalition tau qhia tias yuav txiav tej nyiaj ''ntawm tej kev ntiav tej neeg ua hauj lwm uas siv tsis tshua tau zoo.''
Thaum raug nug thaum teb tej lus nug uas nrog tej neeg nthuav xov xwm tham hnub zwj Teeb (Thursday) ces Jane Hume uas yog tus nom ntawm lwm pab nom teb chaws uas tswj tuam chav nyiaj txiaj thiaj rov qab hais tias cov kev txiav tej neeg ua hauj lwm no yuav tsis muaj teeb meem dab tsi rau tej kev pab cuam tseem ceeb thiab tsis muaj teeb meem cuam tshuam txog haiv neeg no txoj kev ruaj ntseg.
Nws tau hais tias yeej muaj tej hauj lwm txog li ntawm 5,000 txog ntawm 41,000 txoj ntawd yuav raug txiav tawm vim yeej tseem tsis tau tsim cov hauj lwm no los yog tseem nrhiav tsis tau neeg ua.
Tab sis thaum nug tias Coalition puas tseem npaj yuav txiav tej hauj lwm ntawm Canberra, ces Hume teb tias ''Tsuas txiav tej ntawm Canberra xwb.''
Ua ke no los lwm pab nom teb chaws ces yuav ua rau yuav tau siv nyiaj puag xyoo txog $118 txog rau xyoo 2050 thiab.
Richard Marles uas yog tus lwm thawj pwm tsav tau hais hnub zwj Teeb (Thursday) tias tsis tas kub siab dab tsi ntau txog lwm pab nom teb chaws tej nyiaj yuav siv los ua ntau yam hauj lwm no.
Ces cov kev qhia txog tej nyiaj no ntau hnub ua ntej yuav muaj cov kev xaiv tsa no thiaj ua rau tej neeg xaiv nom tsis muaj cai txaus los ua tib zoo txheeb.
Txawm li cas los pab nom koom tswj yeej raug tus tsoom fwv no tsuab nias txog lub caij uas nws qhia txog tej no, tab sis Labor los yeej tos txog hnub Thursday no ua ntej nws yuav qhia txog nws tej nyiaj yuav siv los ua ntau yam rau cov kev xaiv tsa xyoo 2022 thiab.
Australia cov credit rating AAA
Txawm tias ntiaj teb tseem ntsib tej xwm txheej nyiaj poob nqe ntau tuaj ntxiv tom qab ntxeem dhau tus mob COVID-19 thiab Russia tau nam nias Ukraine, los Taylor tau hais tias tej nqe siv ua lub neej no tsis yog ''raug tej hmoov phem xwb'' tab sis yog tim ''cov kev tsis muaj peev xwm tswj tau lagluam zoo.''
Nws tau hais tias ''Labor yog tus ua rau Australia tej lagluam tsis zoo ntev tshaj plaws thiab yog tus ua rau Australia ua tsis tau lub zoo neej tshaj plaws ntawm tej teb chaws vam meej,''
''Tom qab uas nws txuag tau nyiaj yuav laug txog $400 billion, Labor tseem muag siv tab sis tsis txuag cia, ces thiaj yuav ua rau neeg Australia yuav ntsib teeb meem yog muaj lagluam tsis zoo ntxiv tom ntej no.''
Hume tau hais tias ''vim Labor cov kev ua rau tej nyiaj puag xyoo poob peev txog 10 xyoo'' no yog ''ib co cim teeb toom rau peb lawm.''
''Lawv tsis kub siab txog IMF thiab tej koom haum credit rating cov kev cej luam ces thiaj yuav ua rau muaj teeb meem rau Australia cov credit rating,''
''Tej no tsis yog tias yuav ua rau muaj teeb meem rau tej lagluam xwb tab sis tseem yuav muaj teeb meem rau txhua tus neeg Australia thiab.''
Ua ntej pab nom koom tswj (Coalition) yuav poob nom xyoo 2022 ces yeej tau kwv yees tias Australia tej nyiaj puag xyoo yuav poob peev rau lub caij 10 xyoo, tab sis Labor kuj tswj tau ob co nyiaj puag xyoo tsam vim tje nqe khoom kim thiab muaj neeg tau ua hauj lwm ruaj.
Tej economist thiaj tau tib ob pab nom loj no cov kev cog lus tias yuav siv nyiaj li cas los ua dab tsi rau cov kev xaiv tsa no, li yuav sib tw cog lus tias yuav txo se tab sis yeej tsis muaj tswv yim dab tsi tias yuav kho tej nyiaj puag xyoo li cas.
Pab nom Labor puas tau qhia tias nws yuav siv nyiaj los ua dab tsi?
Labort tau qhia rau hnub zwj Quag (Tuesday) tias yuav pab txuag tau nyiaj puag xyoo $7 billion, li txo tsis siv cov consultants, contractor thiab ntiav dag zog thiab yuav thiab tej nqe ntoj ncig, tos txais qhua thiab tej property.
Yog nws raug xaiv rov qab los ua nom tiam ob ntxiv ces nws yuav nce tej nqe no txij tim 1 lub 7 hli ntuj ntawm $1,600 mus ua $2,000 kom thiaj txuag tau nyiaj $760 million rau 4 xyoos. Tej nyiaj txuag tau no thiaj pab kom tej nyiaj puag xyoo poob peev tsawg zog ntawm $151.6 billion ua $150.5 billion xwb.
Pab nom koom tswj los kuj yuav nce tej nqe international student visa no ua $5,000 yog tias mus kawm Australia 8 lub tsev kawm qib siab nto npe, thiab yuav nce visa ua $2,500 yog kawm lwm cov tsev kawm qib siab rau txhua tus tub kawm pej kum haiv uas tuaj kawm ntawm Australia.
Txheeb tau kom thiaj muaj peev xwm nyeem tau cov zaj xov xwm, tej xov xwm kaw ua suab thiab saib tej yeeb yaj kiab (videos) ntawm SBS News, NITV thiab peb cov program xov xwm ua 60 yam ntawv thiab lus.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
