Zes Kais Andrew Blakers uas yog ib tug coj pawg teeb txheeb txog cov zero emission energy ntawm txhooj faj lem (Tsev kawm qib siab) Australian National University (ANU) tau hais tias Australia yeej muaj peev xwm siv tau cov phiaj ziab tshav los sis cov phiaj ziab sab hnub (Photovoltaic), siv lub zog cua thiab siv lub zog dej ntsawj ntawm cov pas dej tauv coj los tsim tau cov hluav taws xob huv coj los siv yam tsis tso pa phem dab tsi paug tsuas rau tej ib puag ncig. Thiab nws pawg kws teeb txheeb twb tau mus nrhiav tau tshaj li nees nkaum tawm txheeb thaj chaw ntawm teb chaws Australia uas muaj cov chaw siab ntau tshaj plaws uas zoo siav los khaws dej tsim hluav taws xob ntawm lub xeev New South Wales, Australia Capital Territory (ACT) thiab Victoria ntawd.
Raws li Bin Lu uas yog ib tug me yes nyuam qhuav xeem ntawv tag thiab tseem yuav mus teeb txheeb txog cov 100% renewable energy system models hauv teb chaws Australia no thiab cov Geographic Information System (GIS) algorithm kom kawm tiav PhD ntawm lub chaw teeb txheeb Research School of Engineering, College of Engineering and Computer Science, Australian National University tau hais tias 2 cov kev tshawb fawb tawm los xyoo 2010 ces lawv tau tsim tau ib cov qauv uas siv cov sab hnub, cua thiab nqus dej rau tej chaw siab los tsim hluav taws xob no muaj peev xwm tsim tau cov hluav taws xob huv ib puas feem pua txog li 35% uas tsis tso pa phem rau tej ib puag ncig coj los siv rau Australia tej tuam txhab muag hluav taws xob.
Tab sis yog nug txog tias vim Australia twb tsis tau hluav taws xob txaus siv tam sim no lawm es ho yuav nrhiav tswv yim li cas los pab kom tsim tau hluav taws xob siv no ces Bin Lu teb tias, peb yuav tsum tau siv cov dej nqus ntawm tej pas dej tsim hluav taws xob mus rau qhov chaw siab coj los tsim kom tau hluav taws xob ntau ntxiv uas yeej tsim tau nruab hnub hmo ntuj tib si li cov teb chaws Asia tau siv ntawd, siv cov zog sab hnub, thiab zog cua kom tsim tau hluav taws xob ntau ntxiv coj los pab rau lub caij uas muaj neeg siv hluav taws xob ntau heev kom muaj txaus siv thiab ho muab cov kab xa hluav taws xob ntawm tej chaw tsim hluav taws xob no sib txua ua ke kom tau hluav taws xob ntau ces muaj peev xwm daws tau tej teeb meem no. Tab sis yuav tau tswj cov frequency thiab cov voltage kom zoo xwb.
Yog tias xav kom tsim tau cov hluav taws xob 100% los ntawm cov zero emission energy ntawd coj los siv tiag, ces yuav tsum tsim kom tau cov hluav taws xob no txog 500 Gigawatt hour (GWh) los yog 500 billion watts coj los khaw cia siv, uas yuav tau siv chaw pumped hydro power station txog li ntawm 1000 los yog 2000 lub chaw tsim hluav taws xob mas thiaj yuav tsim tau txaus li hais ntawd.
Tab sis tsoom hwv Australia tseem txhawb nqa kom siv cov roj zeb ntsuam no los ua cov peev txheej tseem ceeb coj los tsim hluav taws xob siv xwb thiab yeej tsis pom zoo nrog pab nom Labor los yog Greens lub tswv yim siv cov reneable energy li es yuav siv lub tswv yim twg los daws tej teeb meem no.
Nqe no ces Bin Lu hais tias siv tau 3 txoj hauv kev xws li yuav tsum tsim kom tau ib lub chaw khaws cov renewable energy kom tau tej hluav taws xob kom ntau heev, yuav tsum muab tej chaw tsim hluav taws xob no sib txuas sib cob ua ke ua tib lub chaw tsim uas xa tej hluav taws xob coj mus siv xwb, nqe peb ces yog los xyuas kom muaj peev xwm xa tau tej hluas taws xob rau tej neeg tau siv raws li qhov lawv xav tau.
Tab sis ntshe tseem yuav tau siv ntau caum xyoo mam li tsim tau tej hluav taws xob li hais no coj los siv, vim tam sim no kiag Australia twb tsis muaj tej hluav taws xob no txaus siv lawm es ho muaj txoj kev twg los pab?
Mr. Lu hais tias rau qhov Australia yeej tau teeb lub hom phiaj tseeg lawm tias txog xyoo 2020 ces Australia yuav tsum tsim kom tau cov hluav taws xob los ntawm cov renewable txog kom txog li 33 Terrwatt hour (33 trillion watt) thiab Australia yeej npaj yuav txo kom tau cov pa phem carbon tariff kom txog li 100 million tonnes rau xyoo 2030 thiab. Yog li ntawd thiaj tsim nyog los siv cov kev teeb txheeb no los tsim ua cai coj los siv.
Thaum nug Bin Lu tias nws puas xav kom tsoom hwv Australia los txhawb nqa txhua txhua yim neeg Australia los nruab cov phiaj ziab sab hnub ziab tshav ntuj rau saum lawv tej ruv tsev kom ho pab tsim tau hluav taws xob me tsi coj los siv thiab no ces nws hais tias yog tias ua tau li hais no, thiab tsim tau cov chaw siv sab hnub ziab phiaj loj loj thiab siv cua tshuab kiv cua kom tsim tau hluav taws xob ntau thiab tsim cov chaws los tsim hluav taws xob ntawm cov dej nqus rau qhov chaw siab kom tsim tau hluav taws xob ntau khaws tseg cia li hais no thiab ces, txog xyoo 2030 Australia yeej muaj peev xwm tsim tau cov hluav taws xob los ntawm cov renewable energy huv tsis muaj pa phem paug tsuas rau tej ib puag ncig thiab ua tau raws li cov hom phiaj renewable energy target los yog Paris tariff uas txo cov pa phem rau xyoo 2030 ntawd.
Tab sis tsoom hwv Australia tseem tsis tau muaj tej cai zoo coj los siv tswj tej hauj lwm no, tseem tsis tau muaj kev koom tes txhim kho los yog nqe peev lagluam rau cov technology no nrog cov chaw teeb txheeb tshawb fawb ntiag tug los yog tej lagluam no es puas yuav muaj peev xwm tsim tau cov hluav taws xob li hais no coj los siv tiag?
Bin Lu teb tias txij xyoo 2012 los, yeej tau muaj ntau cov kev teeb txheeb tsis hais yuav yog cov kev tshawb fawb los ntawm lub tuam txhab AEMO Market Operations, UNES Star Blue, Sydney University of Technology thiab ANU uas yog 4 cov kev teeb txheeb txog subzero emission electricity grid los yog cov hluav taws xob uas tsim tau los ntawm renewable energy li sab hnub ziab, cua thiab dej 100% ntawd uas lawv yeej tau tshawb fawb tau qhov tseeb lawm tias yog muab tag nrho tej chaw tsim hluav taws xob no los sib sau thiab sib txua ua ke ua tib lub xwb ces yuav siv tau hauj lwm zoo heev li lawm tsuas yog tos tus los txhawb nqa thiab nqe peev nyiaj txiag rau tej hauj lwm hais no lawm xwb.
Tab sis vim tsoom hwv Australia pheej tseem ntseeg tias yuav tsum tau siv roj zeb ntsuam los tsim hluav taws xob mas thiaj tsim tau tej hluav taws xob txaus coj los siv vim yuav tsum yob tshav tshav ntuj thiab cua hlob hhlob nkaus xwb mas thiaj yuav tsim tau hluav taws xob siv, ces ntshe nws tsis xav nqe peev nyiaj txiag los lis tej dej num no?
Bin Lu hais tias tam li peb yog cov kws teeb txheeb uas twb tshawb tau qhov tseeb lawm, tsis tas li no los tsoom hwv yeej kub siab thiab xav paub xav pom txog peb cov kev teeb txheeb uas tsawb fawb txog lub tswv yim yuav khaws kom tau tej hluav taws xob tsim tau ntau no lawm, ces tsuas tos cov kev txiav txim siab los nqes tes kiag lawm xwb.
Nws hais ntxiv tias tsaib no lawv tau tsim tau cov qauv tsim kom tau cov hluav taws xob 100% los ntawm cov zog sab hnub, cov zog cua thiab zog dej uas tsis tso pa phem rau tej ib puag ncig. Hos xyoo no los lawv kuj tau tsim tau ib cov qauv GIS (Geographic Information System) algorithm coj los txheeb xyuas ntau thaj chaw siab uas muaj peev xwm yuav siv khaws dej coj los tsim hluav taws xob kom xa tau cov hluav taws xob coj los sib sau sib txua ua ke kom tau ntau heev nrog rau lwm cov chaw tsim tau hluav taws xob los ntawm cov sab hnub thiab cua nrog uas twb tau nqe peev ntau ntawd lawm.
Yog thaum nug txog tus nqe lus tias yuav siv nyiaj txiag npaum li cas coj los nqe peev lagluam lawm no, ces Bin Lu hais tias yog tias tsim tau cov hluav taws xob uas siv tau thiab txuas tau ua ke ntawm txhua yam uas tsim tau ntawd lawm, ces kuj yuav ua rau tus nqe pheej yig thiab yeej tsim nyog nqes peev los txhawb nqa tej technology uas siv tsim cov hluav taws xob no lawm. Vim raws li peb cov kev teeb txheeb uas twb tau tshawb fawb tau ntawd, yeej tau qhia tias khaws tau tej hluav taws xob coj los cia siv thiab yog thaum muab tej chaw tsim hluav taws xob ntawm ntau cov xeev los sib txuas sib xyaw ua ke tib lub lawm xwb ces yeej tau hluav taws xob ntau heev coj los siv lawm.
Mloog tau hnub zwj Teeb (Thursday) 6 pm, hnub zwj Hnub (Sunday) 11am, los yog koom tau ntxiv ntawm , , thiab . Downloadthiab caum
