Cov kab theem muaj me nyuam

The Soliola family Source: SBS

SBS Hmong

View Podcast Series

Get the SBS Audio app

Other ways to listen

Lub sij hawm 50 xyoo dhau los no tau muaj ntiaj teb cov kab theem muaj me nyuam tsawg heev yuav laug txog ib nrab lawm. Peb ho mus txheeb ntxiv tias yog tim dab tsi thiaj ua rau muaj neeg yug me nyuam tsawg lawm.

Raws li tau muaj ib cov kev teeb txheeb los ntawm lub koom haum HSBC ces kuj tau kwv yees tias yog tias tseem muaj cov kab theem muaj me nyuam li tam sim no txuas ntxiv ces ntshe txog rau xyoo 2040 ces ntiaj teb yuav pib muaj pej xeem tsawg lawm. Thiab yuav muaj peev xwm tshawg txog li ib nrab rau thaum xau tiam no. Thiab kuj yog ib cov kev muaj pej xeem tsawg sai tshaj tej uas UN tau kwv yees tseg rau xyoo 2022 lawm.

James Pomeroy uas yog ib tug Global Economist ntawm lub koom haum HSBC thiaj hais tias ''5 los yog 10 xyoo dhau los yeej tsis muaj neeg xav li tias ntiaj teb tej kab theem muaj me nyuam yuav nqe sai ua luaj li. Kuj yog tej yam zoo thiab uas muaj tej poj niam tau ua hauj lwm ntau tuaj ntxiv lawm. Ces thiaj ua rau lawv hloov cov kev xav rau cov kev pib yim neej thiab ncua yav lig mam muaj me nyuam. Tsis tas li ntawd los vim muaj tej nuj nqes ntau yam cuam tshuam txog cov kev pib ib yim neej thiab zoo li tej tsoom fwv thoob ntiaj teb los tsis kub siab txog tej no. Txuas ntxiv ntawd los zoo li tej nqe tsev los tseem kim tshaj tej nyiaj hauj lwm ua khwv tau lawm thiab. Tsuas yog tias ntshe tej hlua ho tau tej peev txheej faib los ntawm lawv niam lawv txiv, los sis yog raug lej tau nyiaj xwb mas thiaj xav pib lawv lub neej. Tsis li ntawd ces ntshe txog rau thaum hnoob nyoog 30 tawm xyoo kom tau txais kev ruaj ntseg tso ma thiaj mam pib muaj lub neej.''

Txawm li cas los tsis yog cov kev muaj tib co kab theem muaj me nyuam tsawg xwb, tab sis yog tej neeg muaj hnoob nyoog zujzus tuaj ntxiv, ces kuj muaj cib fim muaj taus me nyuam tsawg zuj zus lawm thiab. Tej zaum kuj yog tim tej nqe ntau yam cuam tshuam txog cov kev yug me nyuam, tej chaw nyob, kam noj kev haus thiab tej cwj pwm ua lub neej, los sis yog tim lub cev li tim tsev me nyuam los sis yog muaj kab tub kab ntxhais tsawg ces ib txhia thiaj muaj tsis tau me nyuam thiab. Ib txhia ces kuj yog tim nom tswv tej cai, piv txwv li tsoom fwv Suav tuam tshoj tej cai tau siv dhau los ua tsuas pub ib yim neeg twg muaj cai yug tau tib tug me nyuam nkaus xwb, tab sis tam sim no kuj tso tseg thiab pub yug ob tug me nyuam lawm.

Tsis tas li ntawd los ntiaj teb lub koom haum tswj dej num noj qab haus huv tseem qhia tias txhua txhua ib tug neeg ntawm 6 tus twg hauv ntiaj teb no ces yeej ntsib teeb meem yuav muaj tsis taus me nyuam thiab.

Txhua txhua 18 tug me nyuam yug ntawm Australia twg ces yeej muaj ib tug uas siv cov In Vitro Fertilisation (IVF) pab yug. Tab sis tej neeg yeej tseem tsis tshua muaj peev xwm siv tau cov kev pab cuam no raws li qhov tsim nyog thiab.

Ces cov kev muaj pej xeem tsawg no thiaj yuav ua rau muaj teeb meem rau tej lagluam, vim tsis muaj neeg txaus los ua hauj lwm pab tej lagluam, thiab ntiaj teb tej pej xeem muaj hnoob nyoog los muaj coob zuj zus tuaj thiab ua lub neej nyob tau ntev ntxiv tuaj lawm. Tab sis yeej tseem ua lub neej nyob nrog ntau yam mob uas mob ntev thiab.

Thiab tej kws paub zoo txog tej huab cua pauv hloov hais tias muaj ntiaj teb tej pej xeem tsawg zog los yeej pab daws tsis tau tej teeb meem huab cua pauv hloov thiab.

Professor Bonnie McBain n uas yog ib tug zeskais paub zoo txog phab txuj Sustainability Science ntawm tsev kawm qib siab University of Newcastle hais tias ''Pej xeem, cov kev nplua nuj thiab technology yog tej ua rau muaj teeb meem rau tej ib puag ncig.'

Yog li ntawd HSBC tsab ntawv cej luam thiaj muaj cov kev taw qhia tias kom pab nyiaj zov me nyuam rau tej niam txiv, xyuas kom tej neeg muaj peev xwm ua tau hauj lwm thiab muaj caij los yug thiab tu me nyuam raws li qhov tsim nyog, kho tej cai kom tej cuab yig muaj me nyuam coob ntxiv, thiab hloov tej kev xav cuam tshuam txog tej kab lis kev cai rau cov kev tab cuab yig (tu vaj tse tub ki), tsim paj tshab txo se rau tej nyiaj khwv tau, los sis yog pab nyiaj rau tej niam txiv yug coob tus me nyuam.

Ntxiv ntawd los tej zaum kuj hloov lub caij tej neeg so tsis ua hauj lwm kom hnoob nyoog siab tuaj ntxiv uas yog tej yam tej nom tswv tsis tshua xav ua vim ntshai tsam poob nom, los sis yog yuav siv tej tshuab tooj tshuab hlau los ua hauj lwm kom ntau tuaj ntxiv, tab sis yuav tsum tau ua tib zoo xyuas kom tej neeg tau xyaum kom muaj txuj ci thiab paub ua hauj lwm, thiab nrhiav tau hauj lwm ua.