Cov kev plees nkauj nraug hauv online (Online dating) yog ib cov lagluam tau nyiaj txog ntau tav (Multibillion-dollar industry).
Nyob rau lub caij muaj neeg nyiam siv cov online dating los nrhiav tus hlub ntau tuaj ntxiv no kuj muaj neeg ntawm teb chaws Australia los siv cov online dating coob tuaj ntxiv lawm thiab.
Raws li Australia lub koom haum Australian Bureau of Statistic cov kev txheeb pej xeem xyoo 2016 dhau los tau qhia, ces Australia yeej muaj tej hluas uas tsis tau yuav txij nkawm los yog cov neeg sib nrauj txog li 7 roob (million) tus diam.
Txawm li cas los cov neeg matchmakers and relationship counselors thiab psychotherapists xav ceeb toom rau sawv daws kom yuav tsum tau xyuam xim thiab ceev faj kom lawv tau txais kev nyab xeeb thiab txhob raug tej neeg phem ntxias dag hauv online.
Katherine Wei yog ib tug matchmaker thiab ho yog tus tsim tsa lub tuam txhab Contact AJ yeej tau pab ntau caum txheeb tus neeg nrhiav tau lawv tej hlub los tau ntau caum xyoo lawm. Wei tau qhia tias cov online dating yog ib cov hauj lwm nyuaj kawg, vim yeej tau muaj neeg coob leej ntau tus yeej tau sim ntau zaus kom nrhiav tau tus lawv hlub hauv online tab sis yeej nrhiav tsis tau li thiab tseem nkim caij nyoog ntau heev txij ntau hnub mus txog ntau xyoo diam los yeej tseem nrhiav tsis tau thiab.
Yog li Wei thiaj xav taw qhia tias tsis hais tej poj niam txiv neej yeej tseem tsis tau paub txog lawv tus kheej zoo tias lawv yog tus neeg zoo li cas thiab lawv yeej tsis paub tej poj niam los yog txiv neej ntawd tias tej neeg lawv xav tau los ua tus hlub ntawd tsim nyog yuav tsum tau yog cov neeg zoo li cas.
Yog li Mellisa Ferrari uas yog tus neeg Pychotherapist thiab relationship conselor thiaj xav kom yus yuav tsum tau teev ib co yam ntxwv los yog cuj pwm ntawm tus neeg ntawd tias yuav tsum zoo li cas kom thiaj nrhiav tau tus phim yus thiab haum rau yus.
Txawm Wei tau hais tias cov online dating ces zoo li cov game xwb thiab nkim sij hawm vim caij nyoog yog nyiaj yog txiaj xwb los Ferrari yeej tau qhia tias yog ib txoj xub ke yuav pab kom yus tau ntsib ntau tus neeg uas tej zaum yuav nrhiav tau yus tus hlub thiab tab sis yuav nyuaj me ntsi rau cov neeg tsis tshua paub siv technology.
Wei tau hais ntxiv tias tsis xav kom yus tsis txhob cia yus txoj kev nyob tib leeg kho siab khuav (Loneliness) ua rau yus raug lwm tus ntxias dag hauv online.
Tiffany Valluruz los kuj xav ceeb toom rau sawv daws thiab kom tsis txhob lam tau lam tso siab thiab qhia yus tej xov xwm ntiag tug li xov tooj los yog cuam tshuam txog nyiaj txiaj rau tej neeg yus ntsib thiab tham hauv online. Vim tej neeg no tsis yog yuav xav nrog yus tham tam kev nkauj nraug tab sis lawv tsuas xav nrog yus tham nug kom paub txog yus tus kheej seb ua dab tsi, yus tsev neeg zoo li cas, yus khawv puas tau nyiaj tseg cia xwb. Yog thaum lawv paub tej no tag lawm ces lawv yuav siv tom txwv ntxias dag yus kom siab muag thiab qaug quav kom yus pab lawv vim lawv tsev neeg ho muaj mob xav tau txais kev pab cuam ces lawv yuav dag thiab ntxias kom tau yus tej nyiaj thiab yuav ua rau yus poob nyiaj thiab raug dag tau.
Wei tseem tau qhia tnxiv tias nws tsis xav kom tej neeg maj ntug maj teb thaum tau ntsib tus neeg yus tham hauv online ntawd tim ntsej tim muag ua thawj zaug. Nws xav kom yus yuav tsum tau ceev faj thiab xyuam xim tias thaum yus ntsib tus neeg ntawd ne yus ho puas meem txom los yog tsis nyiam ib yam dab tsi, los sis puas yog ua rau yus siab qaug laim thiab nyiag nyiam nws thaum pov thawj zaug siab dhia nyob tsis tus, seb yus puas nyiam nws lub cev ntaj ntsug, puas nyiam nws laj lim tswv yim, puas nyiam nws txoj kev xav ua ntej tso. Tsis tas li no yuav tsum tau pub sij hawm rau nws thiab yus los ntau kev phooj ywg sib ho puas sib haum yuav nyob tau ua ke ntev ntxiv mus rau yav pem suab. Tsis yog tias pom dheev xwb ces txawm siv hais tias, wb twb sib tham hauv online lawm, kuv hlub koj lawm los yog koj twb hlub kuv lawm ces wb cia li mus sib sau nyob ua ke thiab sib yuav ua txij nkawm kiag xwb. Yog li thiaj tsis xav kom maj thiaj tsis muaj teeb meem rau yus tab sis yuav tau siv caij nyoog los luj lim seb tus neeg ntawd puas yog tus yus hlub los yog nws ho puas hlub puas nyiam yus tiag es thiaj yuav sib sau ua tau lub neej ntev ntxiv mus rau yav tom ntej.
