Raws li Zooxis Lis hais ces cov kev ua hauj lwm nurse no yog ib txoj hauj lwm ua cuam tshuam txog 'cov kev noj qab haus huv.'
Nws qhia tias yeej muaj ntau hom nurse li certified nursing assistant (CNA), licesed practical nurse (LPN) thiab kawm cov public health nurse los yog cov Bachehor of Nursing.
Ms Lis qhia tias nws kawm public health nurse thiab bachelor of nursing tiav lawm tab sis kuj tseem kawm ntxiv thiab ua hauj lwm thiab. Nws qhia tias nws kawm ua cov holistic nurse uas siv txhua yam xub ke kho mob li siv tej kev kho mob tiam vam meej thiab tej tshuaj lwm yam los yog lwm yam tswv yim kho mob uas tsis yog tej tshuaj kho mob tiam vam meej.
Zooxis hais tias ''Cov kuv kawm ces yog los ua ib co neeg kho mob uas yuav tau xyuas seb yuav ua li cas kom thiaj pab tau yus kom tsis txhob muaj mob muaj nkeeg, tsis txhob siv tib txoj kev noj tshuaj pab kho xwb, tab sis kuj siv lwm lub tswv yim pab los yog noj tshuaj ntsuab pab yus tus kheej.''
Nws qhia ntxiv tias nws tau ua nurse hauv tsev kho mob 10 xyoo dhau los lawm tab sis tam sim no nws ua hauj lwm tam li yog ib tug case worker nurse los yog tus care coordinator nurse.
''Cov nurse no ces yog mus nrog tej neeg tham txog lawv tej kev noj qab haus huv thiab tham txog thaum lawv mus ntsuam mob nrog tsev kho mob los lawm, los yog tej xub ke los pab kom ib tug neeg twg zoo mob, tsis paub tias yuav noj tshuaj li cas, ces yus yog tus nurse mus qhia kom tej neeg paub noj tshuaj, los yog ib tug twg xav siv laub hauv tsev yuav ntsib thiab thov kev pab qhov twg. Ces kuv yog tus ua tej hauj lwm no pab tej neeg,'' raws li Zooxis hais.
''Cov laus feem ntau mas lawv mus kuaj hoo mom (see doctor at hospitals/clinics/GPs) lawv tsis paub tias ua li cas pheej yuav tau mus. Tab sis qhov tseem ceeb tiag ces yog ib cov kev tiv thaiv, yog yus mus ntsib kws kho mob ces yuav paub thaum tseem mob me, hos yog tias yus tsis mus ntsib kws kho mob li ces thaum mob loj tuaj ces kws kho mob pab tsis tau yus lawm. Ces ib xyoos thiaj xav kom mus ntsib kws kho mob ib zaug.''
Nws hais tias 'nurse ces yog cov neeg uas yuav nug thiab soj qab seb tej neeg mob puas noj tshuaj li kws kho mob hais. Thiab tus laus twg mus siv tsev kho mob thiab ntsib kws kho mob tsis paub tias kws kho mob hais dab tsi txog yus tej mob thiab yus tej tshuaj los yeej muaj peev xwm hais kom tej chaw kho mob ntawd nrhiav neeg txhais lus rau yus tau. Kom yus txog vaj txog tsev los kom thiaj paub tias yuav ua li cas kom thiaj tau txais kev noj qab nyob zoo thiab tsis muaj mob ntxiv lawm'.
Zooxis thiaj hais ntxiv tias yeej muaj Hmoob 2 lub koom haum Nurse thiab Doctor Association uas yeej tau hais kom coob leej ntau tus paub txog tej hauj lwm no mus qhia tej zejzog tsis hais qhia txog tshuaj ntsuab Hmoob los yog tham txog tias yuav daws kev nyuaj siab ntxhov plawv li cas.
Nws hais tias 'tej koom haum no kuj txhawb kuv zog kawg thiab. Yog tias yav pem suab ho muaj tej tub ki mus kawm ua nurse los nws yeej muaj kev tso siab tias yuav muaj tus pab thiab tsis txhawj lawm'.
Nws thiaj hais tias cov kev ua ib tug nurse mas yus yuav tau kub siab tu thiab saib xyuas yus tus kheej kom tau txais kev noj qab nyob zoo thiab tsis txhob pub tej hauj lwm los muaj kev cuam tshuam rau yus lub neej, vim 'yus mus pom ntshav, pom zis, pom quav pom ub pom no, mus pom lwm tus tej kev nyuaj siab ntau yam txawv ces yus yuav tsum tau ua siab loj vim yus yog ib tug nurse, ces yus yuav tsum tau xyuas kom paub tias yuav tu thiab saib xyuas yus tus kheej li cas kom tau txais kev noj qab nyob zoo rau yus.'
Txawm tias tsis ntev los no tej nurse thiab tej neeg ua hauj lwm kho mob yuav tau ua hauj lwm hnyav heev thiab sab heev thiab muaj ib txhia tsis xav ua lawm los Zooxis Lis hais tias:
''Kav tsij ua siab loj xwb vim yus xav tau nyiaj, thiab ua hauj lwm nursing no lawv yeej them nyiaj zoo. Txoj hauj lwm nurse no ces yeej yog mus tu neeg nkaus nkaus xwb. Txawm yus tham xov tooj los yeej tus neeg mob, txawm ntsuam ib yam dab tsi los yeej yog tu tej neeg mob, tsis hais mob dab tsi li yus yog tus mus tu qhov ntawd ntag. Yog tias tej neeg muaj mob es teb chaws muaj mob tag ces yus yog tus neeg mus tu saib xyuas ntag. Ces nyob ntawm yus tus kheej seb yus yuav tus yus tus kheej li cas thiab yuav tus lwm tus li cas, thiab yus ho xav pab tej neeg li cas. Ces yog tias koj muaj pluaj siab xav ua ib tug nurse los kuv yeej txhawb nqa tias peb xav tau ib tug neeg los pab thiab twb yog yus muaj lub siab zoo, yus thiaj kam mus ua tau ib txoj hauj lwm siv sij hawm thiab siv zog npaum no kom sawv daws thiaj ntxeem dhau tej mob nkeeg. Rau qhov thaum yus muaj tiag ces yeej yog tus nurse nyob ntawm yus ib sab txaj pab yus xwb. Yog li ntawd yus yog nurse ces yus yuav tau saib xyuas yus tus kheej thiab, vim yog tsis muaj nurse ces tsis muaj neeg tu saib xyuas tej neeg mob hauv tsev kho mob.''
Zooxis Lis hais tias yog ''Yus yog ib tug nurse ces yus tej lus txhawb nqa lawv (tej neeg mob) kuj yog ib qho tshuaj zoo pab lawv, lus zoo yog lus tshuaj, ces yog yus yog ib tug nurse ces yus yuav tsum tau paub hais lus zoo rau tej neeg, ces yog yus tsis paub los yus yeej kawm tau xwb xwb li yog yus kawm tau yus daim degree lawm.''
Thiab yog tias koj xav kawm los ua nurse ces: ''Yog koj muaj siab kawm tiag ces yeej meem kawm, hos yog yus tsis pau tias seb yus puas nyiam no los yeej muaj ib cov sob kawm xyaum ua hauj lwm (internship) los yog shadowing raws ib tug nurse ua hauj lwm hauv tsev kho mob seb lawv ho ua hauj lwm li cas. Kawm ua nurse los tsis yog kawm ua hauj lwm hauv tsev kho mob nkaus xwb thiab. Muaj ib txhia nurse yeej mus txheeb tej neeg mob tom vaj tom tsev, muaj ib txhia los tswj ntaub ntawv ntau yam xwb, li txheeb tej neeg mob tej tshuaj, tej ntaub ntawv noj tshuaj, ces thiaj muaj ntau yam hauj lwm koj ua tau. Yog yus nyiam ua dab tsi los kuj tshawb fawb seb muaj tej nurse ua hom hauj lwm dab tsi uas yus nyiam ua. Ua nurse los yeej yog ib txoj hauj lwm zoo tshaj plaws rau yus tus kheej thiab, yog tias yus nyiam los yeej meem kawm.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
