Yeej muaj tej neeg coob tshaj 5 roob tus (5 million) tau txais kev tso cai ntawm nom tswv ras los ua pej xeem Australia txij li xyoo 1949 los lawm.
Thiab muaj ib kauj ruam tseem ceeb ntawm cov kev thov xeem thiab ras los ua pej xeem Australia ntawd ces yog cov kev mus koom lub koom txoos tos txais thiab muab ntawv pov thawj rau Australia cov pej xeem tshiab, uas tej neeg no yuav tau los cog lus tias yuav tsis ntxeev siab, yuav lees paub lawv txoj cai thiab tej luag hauj lwm tasm li yog ib tug pej xeem Australia.
زایرا الیوا، مایکل ادواردز و آمنه خوجائوا در یک مراسم اعطای شهروندی شورای شهر وانیرو در پرت. Source: AAP
Permanent Residency
Ruby Fowdar yog ib tug neeg Migrant agent uas paub khiav tej ntaub ntawv pab cuam rau tej neeg tsiv teb tsaws chaw tuaj nyob teb chaws Australia ntawm lub nroog Brisbane thiab ua hauj lwm nrog lub koom haum Australian Immigration Agency.
Nws tshab txhais tias muaj ntau yam txuam thawj tej neeg yuav tsum tau muaj ua ntej yuav muaj cai mus thov xeem kom ras los ua tau pej xeem Australia.
Fowdar hais tias " Cov neeg tsiv teb tsaws chaw yuav tsum yog cov neeg nyob ruaj (permanent resident) ua ntej tso. Yog tias koj thov ntau yam visa li cov student visas los yog work visa tuaj rau teb chaws Australia no ces koj yeej tseem tsis tau yog cov neeg nyob ruaj txog rau thaum koj thov tau cov permanent residency visa. Yog li ntawd koj yuav tsum yog cov neeg uas twb thov tau cov visa no thiab nyob txwm 4 xyoos hauv teb chaws Australia thiab tau cov permanent residency no txwm ib lub xyoos lawm mas thiaj muaj cai mus thov xeem ua tau pej xeem Australia."
Source: AAP
Ntev npaum li cas mam ua tau tej ntaub ntawv no tiav.
Lub tuam chav Department of Home Affairs yeej xav kom sawv daws mus thov tej ntaub ntawv no hauv online vim rau qhov yuav tau sai dua.
Raws li Damien Kilner uas lis cov dej num Family and Citizenship Program ntawm lub tuam chav no tau qhia, yeej yuav siv sij hawm li ntawm 14 hlis los yog 1 xyoos 2 hlis thiaj tiav.
Cov kev tshau seb puas tau ras los ua pej xeem Australia (Citizenship test)
Cov neeg xav thov xeem ua pej xeem Australia yuav tsum xeem kom tau thiaj li yuav paub tias seb lawv ho paub thiab nkag siab txog teb chaws Australia zoo npaum li cas, paub txog tej txiaj ntsim thiab ntau yam hauj lwm tam li yog ib tug pej xeem Australia zoo npaum li cas.
Damien Kilner hais tias "Cov kev tshau txuj (xeem) no xav xyuas seb koj paub lus Askiv zoo npaum licas? Seb koj puas muaj peev xwm mus siv computer tshau txuj, uas yeej yog ib cov txheej txheem yooj yooj yim thiab tsuas siv sij hawm li ntawm 30 ntiag tiv (30 minutes) xwb."
Koj yuav tau teb 20 nqe lus nug uas muab los ntawm phaub ntawv los uas yeej qhia txog lub teb chaws Australia, nws cov kev tswj hwm democracy, pej xeem txoj cai, tsoom hwv thiab tej cai lij choj uas siv ntawm lub teb chaws no.
"Tej neeg sawv daws yuav tsum tau saib phau ntawd no los npaj lawv tus kheej ces tom qab ntawd lawv mloog tau tias nkag siab lawm ces mus thov xeem ua pej xeem Australia tau."
Tej neeg feem ntau yeej xeem tau txog li 75% ntawm tej lus nug no thiab. .
Yog tias koj ho xeem tsis tau los koj yeej muaj peev xwm rov qab xeem dua ntxiv kiag tom qab ntawd ntxiv rau tib hnub uas koj mus xeem los kuj tau thiab yog tias yog ua tau li hais ntawd, los sis yog koj ho rov qab teem caij mus xeem dua tshiab kom koj ho muaj caij nyeem ntawv thiab npaj kom koj thiaj li teb tau tej lus nug ntawd zoo dua, tab sis koj yuav tsis tau them nyiaj thov rov qab xeem dua ntxiv lawm.
.
An Australian citizenship recipient poses for a photo after a citizenship ceremony on Australia Day in Brisbane. Source: AAP
Cov kev cog lus los lees ua pej xeem Australia
Thaum uas nom tswv pom zoo tias ib tug neeg twg xeem tau los ua pej xeem Australia lawm ces tus neeg ntawd yuav tsum tau mus koom lub koom txoos tos txais thiab muab ntawv pov thawj rau nws thiab yuav tsum tau los cog ib cov lus thiab los lees ua pej xeem teb chaws Australia.
Muaj 2 sob kev cog lus uas teev txog tswv ntuj thiab tsis teev tswv ntuj seb koj xaiv hais sob twg.
Damien Kilner ntawm lub tuam chav the Department of Home Affairs hais tias “Cov kev cog lus no yog ib feem ntawm kauj ruam kawg los qhia tias koj yeej kub siab thiab xav ras los ua ib tug pej xeem ntawm teb chaws Australia no tiag.”
“Yog li ntawd tej neeg feem coob yeej yuav tau los cog lus kom lawv muaj peev xwm qhia tau tias lawv yuav ua siab dawb siab ncaj tsis ntxeev siab rau teb chaws Australia, los lees paub lawv lub luag hauj lwm thiab tej txiaj ntsim lawv yuav tau txais tam li yog Australia ib tug pej xeem. Tsis tas li no los tseem yog ib lub cim qhia tau tias tus neeg ntawd yeej kub siab thiab xav ras los ua ib tug tub koom siab ntawm peb lub teb chaws no tiag thiab.”
Prime Minister Scott Morrison with newly sworn citizens at an Australia Day Citizenship Ceremony and Flag Raising event in Canberra,January 26, 2019. Source: AAP
Lub koom txoos txais tos cov pej xeem tshiab
Yeej muaj tej neeg kwv yees li ntawm 100,000 yeej tau mus koom ntau cov koom txoos tos txais pej xeem tshiab thoob teb chaws Australia rau ib lub xyoo twg diam thiab feem ntau tej neeg yeej xaiv mus koom rau hnub Australia Day uas yog hnub tim 26 lub 1 hlis ntuj los lees paub thiab cog lus ua ib tug pej xeem Australia.
Thiab tej nom tswv zejzog yog cov ua tswv cuab tswj tej koom txoos no uas tsuas siv sij hawm li 1 los yog 2 teev xwb ua tiav tag lawm.
Tab sis tsuas yog tom qab 3 mus txog rau 6 lub hli uas tej neeg xeem tau los ua pej xeem Australia lawm xwb lawv thiaj raug nom tswv xav ntawv caws kom mus koom lub koom txoos no yog nom tswv tso cai tias pub tus neeg ntawd ras los ua tau pej xeem Australia.
Kilner hais tias feem ntau yeej yog cov nom ntau tus li mayor or lord mayor los yog tus hau zos yog tus los nyeem cov ntawv qhib lub koom txoos no raws li tau teev tseg cia rau hauv tsab cai Citizenship Act, uas yog tus xav tej xov xwm rau txhua tus neeg muaj cai mus koom tau lub koom txos ua kev zoo siab thiab tos txais tej neeg xeem tau los ua Australia tej pej xeem tshiab no.
“Yeej muaj cov kev hais lus zoo siab tos txais tej pej xeem tshiab los koom nrog lub teb chaws Australia, muaj kev nyeem thiab teev txog tus pwm tsav tswj tej dej num cuab yig thiab pej xeem cov lus thiab muaj kev nqua Australia zaj nkauj haiv, ces tom qab ntawd ces tej neeg uas xeem tau los ua Australia cov pej xeem tshiab yuav tsum tau hais ib cov lus cog lus los lees paub txog tej txiaj ntsim thiab lub luag hauj lwm tam li Australia ib tug pej xeem yuav yuav tau txais thiab yuav tau ua ntawd.”
Tsis tas li no los cov neeg uas nyuam qhuav xeem tau ua Australia cov pej xeem thiab yuav mus koom lub koom txoos tos txais thiab lees txais kom ras los ua tau Australia tej pej xeem yuav tsum tau nqa lawv tej ntawv cim thawj li personal identification nrog lawv mus koom lub koom txoos no thiab, vim rau qhov nom tswv zos tej neeg ua hauj lwm yeej yuav los txheeb xyuas tias tej neeg mus koom ntawd puas yog tej neeg uas xeem tau los ua pej xeem Australia tiag, raws li Kilner qhia. Thiab feem ntau ces tej neeg yeej nqa lawv cov ntawv tso cai tsav tsheb thiab tej passport nrog lawv mus xwb.
