Yeej muaj ntau yam laj thawj ua rau tej neeg thoj nam thiab neeg tawg tsov tawg rog mloog tau tias lawv nyob tib leej twm zeej kho siab khuav ntawm teb chaws Australia, vim feem ntau ces lawv yeej tau ncaim lawv tsev neeg, tej phooj ywg, thiab tseem tsis paub lus zoo los yog tsis muaj nyiaj mua koom tau lub teb chaws no txoj kev ua lub neej thiab.
Xyoo 2018, tau muaj ib cov hauj lwm yeem thaj (Volunteer program) hu ua coj los txhawb nqa tej neeg thoj nam thiab cov neeg tuaj tshiab kom lawv muaj feem koom los tsim ib cov programs dab tsi los pab rau tej neeg no nrog City of Sydney thiab lub koom haum (SSI) uas tasm sim no yeej raug coj mus siv rau ntau lub zos lawm.
Supplied
Paula Ben David ntawm lub koom haum SSI qhia tias cov program no los txhawb nqa kom tej neeg coj ntseeg ntau yam kev cai dab qhuas uas tuaj tshiab thiab nyob rau tej zos sab hnub poob ntawm Sydney "uas yeej tsis tau tawm mus nyob rau lwm qhov chaw li los sib pauv hloov tswv yim nrog cov neeg Sydney. Vim kuv xav tias zoo li lawv raug cais nyob twmzeej xwb. Muaj qee zaus lawv kuj raug cai tsis muaj feem koom nrog tej zejzog los yog lawv tsev neeg ces lawv thiaj li nyob tib leeg twmzeej xwb."
Paula los yeej ntsib tej teeb meem nyob tib leej kho siab khuav thaum nws mus nyob txawv teb chaws dua los lawm thiab. Nws hais tias "Qhov tseem ceeb tshaj plaws rau kuv ces kuv yuav tsum tau tsim kom tau kev phooj ywg nrog rau ib tug neeg zejzog, thiab siv sij hawm 2 xyoos kuv mam nrhiav tau ib tug phooj ywg diam. Vim ua rau kuv mloog tau tias kuv tsis yog ib feem ntawm lub zejzog ntawd txog rau thaum kuv tau ntsib ib tug neeg zos ces thiaj ua rau muaj kev pauv hloov txhua yam lawm, raws li kuv nco tau."
Tej neeg ua hauj lwm yeem thaj pab cov program Welcome2Sydney ces yeej ua ntau yam pab rau tej neeg. David hais tias “Lawv yeej mus ntsib tej neeg mus koom cov program no rau tom tej chaw nres thiab tos cai tsheb ciav hlau zejzog, mus qhia kom lawv paub siv lawv cov Opal cards thiab kom paub txhab nyiaj rau tej card no. Tsis tas li no los kuj qhia kom lawv paub nyeem tej phiaj qhia kev tias tsim nyog lawv mus rau kab twg mus rau qhov twg los yog tsuas coj tej neeg tuaj tshiab no mus cai tsheb ciav hlau ua thawj zaug los yog zaum 2 kom lawv paub siv tej public transport uas yog cov tsheb ciav hlau no, nyob ntawm seb lawv ho mus caij tej tsheb ntau ntau npaum li cas lawm xwb."
Supplied
Habib yog ib tug eneg tuaj ntawm teb chaws Syria tuaj nyob tau tshaj ib xyoo ntawm teb chaws Australia no lawm. Nws yeej yog ib tug engineer thiab yeej tau pab lwm tus neeg thoj nam uas yog cov engineers tib yam li nws kom raug lees paub tias lawv kawm tiav engineer txawv teb chaws hauv teb chaws Australia no thiab. Nws los kuj yog ib tug neeg ua hauj lwm yeem thaj nrog cov program Welcome2Sydney los pab lwm tus neeg thiab.
“Kuv nyiam cov program no heev, ces kuv thiaj txiav txim siab los ua ib tug neeg ua hauj lwm yeem thaj. Kuv kuj nrhiav tau ib tug zoo phooj ywg thiab. Wb yeej tseem sib ntsib sib cuag ua ke tas mus li-vim li no ces kuv thiaj txiav txim siab los ua ib tug neeg ua hauj lwm yeem thaj."
Tab sis yeej tsis yog tej yam yooj yim uas yuav cia li mus ntsib tau ib cov neeg twg rau thaum yus tuaj txog tshiab ntawm teb chaws Australia li.
Nws hais tias “Nyuaj kawg nkaus li. Vim yog ib lub teb chaws tshiab, kev cai dab qhuas tshiab, lus tshiab thiab tej neeg tshiab nrog rau txhua tsav yam los tshiab tag li lawm. Yog li thiaj ib nyuaj zog. Cov program Welcome2Sydney cov kev mus noj tawm rooj ntawm lub zos Parramatta ua rau tej neeg no muaj kev sib cuam tshuam uas yog tej yam zoo. Thiab kuv xav tias yam tseem ceeb tshaj plaws ces yuav tsum khwv kom tau nyiaj thiaj yuav ua tau lub neej, tab sis yam tseem ceeb tshaj plaws ntawd mas yuav tsum tau txais kev txhawb siab thiab.
Supplied
Nassim Kuj yog ib tug neeg thoj nam tsiv ntawm teb chaws Iraq tuaj nyob ntawm teb chaws Australia thiab. Tab sis vim nws kub siab kawm ntawv thiab lus Askiv heev tab sis yeej tseem tsis tau paub cov sob lus siv hauv teb chaws Australia no zoo.
“Australian slang los cov cov sob lus tej neeg Australia siv mas yog tej yam nyuaj heev rau kuv, vim tej lus hais ntawd yeej muaj cov suab txawv ntawv Askiv heev. Yog li kuv thiaj yuav tau nqa ib phau ntawv txhais lus nrog nraim kuv kom thiaj kawm tau cov los lus tshiab los yog cov sob lus tshiab."
Nassim hais tias ”Yog koj xav ua lub neej nrog neeg Australians ces koj tsim nyog yuav tau kawm kom paub tias seb lawv hais lus li cas, lawv siv lawv cov lus li cas, lawv zaum li cas, noj li cas, nrog lawv noj mov ua ke thiab ua los yog xyaum txhuam yam li lawv ua mas thiaj yuav ua rau yus mloog tau tias yus yog ib feem ntawm lub teb chaws no."
Txawm li cas los yeej muaj ntau cov programs pab kom cov neeg thoj nam muaj peev xwm sib cuag thiab sib txuas lus tau nrog tej neeg ntawm teb chaws Australia no ntawm lub nroog Melbourne tib yam thiab. Piv txwv li lub koom haum uas yeej tau coj tej hluas neeg thoj nam mus pw hav zoov nuv ntses ua si, muaj cov program rau tej niam thiab cov me nyuam mos kom tej poj niam zoo li lawv ho tau sib ntsib sib cuag thiab ho tau ua ntau yam ua ke los yog tau mus koom cov koom txoos sib tw ntau yam thiab.
