பூனை ஒரு அற்புதமான செல்லப்பிராணியாக பார்க்கப்படுகிறது. மனநல மேம்பாட்டுக்கு உதவும் அதேநேரம் நல்லதொரு தோழமை உணர்வையும் தரக்கூடிய இப்பூனைகளை வளர்ப்பது பல்வேறு பொறுப்புகளையும் உள்ளடக்கியது.
உரிய முறையில் வளர்க்கப்படாமல் வீடுகளுக்கு வெளியே அலைய விடப்படும் பூனைகளால் வீதிவிபத்துகள், பூனைச் சண்டைகள் மற்றும் நோய்கள் ஏற்படலாம் என்பதால் இவ்விடயம் கவனமாக அணுகப்படவேண்டும்.
எனவே, ஆஸ்திரேலியாவில் ஒரு வளர்ப்புப் பூனையின் பொறுப்பான உரிமையாளராக இருப்பதில் என்னனென்ன அடங்கியிருக்கிறது என்பதைப் பார்ப்போம்.
அண்டார்டிகாவைத் தவிர, உலகில் தனக்கென பூனை இனங்களைக் கொண்டிராத ஒரே கண்டம் ஆஸ்திரேலியா. ஆனால் ஆஸ்திரேலிய குடும்பங்களில் மூன்றில் ஒரு பகுதியினர் செல்லப்பிராணிகளாக பூனைகளைக் கொண்டுள்ளனர். அதாவது சுமார் 5.3 மில்லியனுக்கும் அதிகமான பூனைகள் செல்லப்பிராணிகளாக ஆஸ்திரேலியாவில் உள்ளன.
READ MORE
வீட்டின் செல்லப் பிராணி பூனை
நாட்டின் பல பகுதிகளில் உள்ள பூனை உரிமையாளர்கள் தமது செல்லப்பிராணிகளை காணிகள் மற்றும் வெளிப்புறங்களில் அலைந்து திரியவிடும்போது, பல்லிகள் மற்றும் தவளைகள் உட்பட ஆஸ்திரேலியாவிற்குச் சொந்தமான பல விலங்குகளுக்கு அச்சுறுத்தலாக இருக்கின்றன.
சுற்றித் திரியும் ஒவ்வொரு வளர்ப்புப் பூனையும் ஆண்டுக்கு 186 விலங்குகளைக் கொல்வதாக ஆராய்ச்சியாளர்கள் மதிப்பிட்டுள்ளனர். ஆனால் இது பெரும்பாலும் அப்பூனை உரிமையாளர்களால் கவனிக்கப்படுவதில்லை.
ஆஸ்திரேலியாவிற்குச் சொந்தமான வனவிலங்குகளில் வளர்ப்புப் பூனைகள் ஏற்படுத்தும் தாக்கத்தை தவிர, மில்லியன் கணக்கான காட்டுப் பூனைகளும் ஆஸ்திரேலியா முழுவதும் சுற்றித் திரிகின்றன.
Charles Darwin பல்கலைக்கழகத்தில் வனவிலங்கு பாதுகாப்பு பேராசிரியராகவும், Biodiversity கவுன்சிலராகவும் உள்ள Sarah Legge, ஆஸ்திரேலியாவின் வனவிலங்குகளில் பூனைகளின் தாக்கங்களை ஆய்வு செய்வது உட்பட பாதுகாப்பு பிரச்சினைகளில் கடந்த 30 ஆண்டுகளாக பணியாற்றியுள்ளார்.
செல்லப்பிராணிகளாக வளர்க்கப்படும் பூனைகள் பற்றி அனைவருக்கும் நன்கு தெரியும் எனவும் ஆனால் ஆஸ்திரேலியாவில் உள்ள காட்டுப் பூனைகள் மக்களைச் சார்ந்து வாழாதவை எனவும், இவற்றில் பெரும்பாலானவை நகரங்களிலிருந்து வெகு தொலைவில் உள்ள காடுகள் மற்றும் புதர்களில் வாழ்கின்றன எனவும் பேராசிரியர் Sarah Legge தெரிவித்தார்.
Cats make great companions and will happily let you live beside them.
ஆஸ்திரேலிய கண்டத்தில் குடியேறவென 1788ம் ஆண்டு பிரிட்டன் நாட்டவர் கப்பல்களில் முதன்முதலாக வந்திறங்கிய போது ஆஸ்திரேலியாவிற்கு பூனைகள் அறிமுகப்படுத்தப்பட்டன. பின்னர் பெர்த் மற்றும் ஹோபார்ட் உட்பட பிற இடங்களுக்குப் பரவிய இக்காட்டுப் பூனைகள் இருபதுக்கும் மேற்பட்ட ஆஸ்திரேலியாவின் பூர்வீக விலங்கு இனங்களை அழித்ததில் முதன்மையான குற்றவாளியாக உள்ளன.
ஆஸ்திரேலியாவின் தனித்துவமான வனவிலங்குகளில் வளர்ப்புப் பூனைகள் மற்றும் காட்டுப் பூனைகள் ஏற்படுத்தும் தாக்கத்தை சேர்த்துப் பார்த்தால், ஒவ்வொரு நாளும் பூனைகள் 3.1 மில்லியன் பாலூட்டிகள், 1.8 மில்லியன் ஊர்வன மற்றும் 1.3 மில்லியன் பறவைகளைக் கொன்று வருகின்றன.
பூனைகளால் ஏற்படும் இத்தகைய வியக்கத்தக்க அளவு பாதிப்பானது மேலும் பல பூர்வீக வனவிலங்கு இனங்களின் முடிவுக்கு வழிவகுக்கலாம் என பேராசிரியர் Sarah Legge எச்சரிக்கிறார்.
காட்டுப் பூனைகள் ஒரு பாரிய பிரச்சனை என்பதை நாம் அனைவரும் அறிவோம் என்றபோதிலும் வளர்ப்புப் பூனைகளால் ஏற்படும் பாதிப்புகளை நாம் உணர்வதில்லை எனவும், வெளியில் சுற்றித் திரிவதற்கு அனுமதிக்கப்படுகின்ற பூனைகள், பல அரிய உயிரினங்களின் அழிவுக்குக் காரணமாக இருக்கலாம் என்பது அப்பூனையின் உரிமையாளருக்கு தெரியாமலிருக்கலாம் எனவும் பேராசிரியர் Sarah Legge சுட்டிக்காட்டுகிறார்.
Feral Cat in Arid South Australia. Credit: Hugh McGregor
ஒவ்வொரு பூனை உரிமையாளரும் செய்யக்கூடிய பல முக்கிய செயல்கள் உள்ளன என்று கூறும் பேராசிரியர் Sarah Legge, இது வளர்ப்புப் பூனைகளைப் பாதுகாப்பாக வைத்திருக்கும் அதேநேரம் வனவிலங்குகளையும் பாதுகாப்பாக வைத்திருக்க உதவும் என்கிறார்.
குறிப்பாக உங்கள் பூனையைப் பதிவுசெய்து அதற்கு மைக்ரோசிப் பொருத்துவது முதல், அது வெளிப்புறங்களில் அலைந்து திரிவதைத் தடுப்பதற்கான நடவடிக்கைகள் வரை, பலவற்றை செய்வதன் மூலம் பூனை வளர்ப்பை சமூகப்பொறுப்புடன் மேற்கொள்ளலாம் என அவர் ஆலோசனை சொல்கிறார்.
பூனைகளை வீட்டிற்குள் வைத்திருப்பது பூர்வீக வனவிலங்குகள் பாதுகாப்பாக இருக்க உதவுகிறது. அதுமட்டுமல்லாமல் அவை வீட்டு எல்லைக்குள் இருப்பதால் வீதி விபத்துகள் மற்றும் பூனைச்சண்டைகளில் சிக்குவதும், வேறு விலங்குகளிடமிருந்து நோய்களைக் காவிவருவதும் தடுக்கப்படும்.
நீங்கள் ஒரு பூனையை வளர்த்துவந்தால் உங்கள் அருகிலுள்ள கால்நடை மருத்துவரிடம் அதை தவறாமல் காண்பிப்பது உங்கள் பூனை ஆரோக்கியமாகவும் மகிழ்ச்சியாகவும் இருக்க உதவும்.
பூனை உரிமையாளர்களுக்கான சுகாதாரத் தகவல்களைப் பெறுவதற்கான முதன்மை ஆதாரமாக கால்நடை மருத்துவர்கள் இருக்க வேண்டும் என்று கூறுகிறார் ஆஸ்திரேலிய கால்நடை மருத்துவ சங்கத்தின் மேற்கு ஆஸ்திரேலியா பிரிவின் தலைவராக உள்ள கால்நடை மருத்துவர் Dr Garnett Hall.
தமக்குள் சண்டையிடும் வழக்கம் பூனைகளுக்கு உள்ளதால், உங்களது வளர்ப்புப் பூனை வெளியில் சுற்றித் திரியும்போது தேவையற்ற சண்டைக்குள் இழுக்கப்பட்டு காயங்கள் மற்றும் நோய்கள் ஏற்படும் ஆபத்து உள்ளதாக Dr Garnett Hall விளக்குகிறார்.
Impacts of urban cats in Australia. Threatened Species Recovery Hub. Note the estimate of the pet cat population shown in this poster (4.9 million) has been surpassed; recent surveys put the figure at 5.3 million.
எங்களைப் போலவே அவற்றுக்கும் பாதுகாப்பான வீட்டுச் சூழல், வழக்கமான ஆரோக்கியமான உணவு, தடுப்பூசிகள் மற்றும் நிறைய அன்பு ஆகியவற்றை உள்ளடக்கிய நல்ல சுகாதாரம் தேவை என அவர் வலியுறுத்துகிறார்.
நீங்கள் ஆஸ்திரேலியாவில் வசிக்கும் இடத்தைப் பொறுத்து, ஒரு செல்லப்பிராணியாக பூனையை வளர்ப்பதற்கான சட்டங்கள் மாறுபடும் என Charles Darwin பல்கலைக்கழகத்தில் வனவிலங்கு பாதுகாப்பு பேராசிரியராகவும், Biodiversity கவுன்சிலராகவும் உள்ள பேராசிரியர் Sarah Legge விளக்குகிறார்.
உங்கள் உள்ளூர் பகுதியில் உள்ள சட்டங்களைப் பற்றி அறிய, உங்கள் கவுன்சில் இணையதளத்தைப் பார்ப்பதே சிறந்த வழியாகும்.
பல உள்ளூர் கவுன்சில்கள் செல்லப் பிராணிகளுக்கான desexing திட்டங்கள் அல்லது இலவச மைக்ரோசிப்பிங் திட்டங்களுக்கு மானியம் வழங்குகின்றன.
இதேவேளை ஒரு வளர்ப்புப் பூனை உரிமையாளராக பொறுப்புடன் நடந்துகொள்வது அந்த நபருக்கும் பூனைக்கும் மற்றும் சூழலிலுள்ள உயிரினங்களுக்கும் நன்மைபயக்கும் என Sarah Legge கூறுகிறார்.
வளர்ப்புப் பூனை உரிமையாளராக பொறுப்புடன் இருப்பது எப்படி என்பது பற்றிய கூடுதல் தகவல் வேண்டுமா? பின்வரும் இணைப்புகளைப் பார்க்கவும்:
- Safe Cat, Safe Wildlife website with expert advice on keeping cats indoors:
- The Threatened Species Recovery Hub website to learn more about cat impacts:
- The Australian Veterinary Association website to locate your local veterinarian:
SBS தமிழ் ஒலிபரப்பை திங்கள், புதன், வெள்ளி மற்றும் ஞாயிறு ஆகிய நாட்களில் இரவு 8 மணிக்கு SBS Radio 2 வழியாக கேட்கலாம். உங்களது பிரதேசத்துக்குரிய அலைவரிசை என்னவென்று தெரிந்துகொள்ள எமது
செவிமடுக்க ‘SBS Radio’ எனத் தேடுங்கள்.
