Ntsiab lus tseem ceeb:
- Tau muaj ib tsab ntawv cej luam tshiab qhia tias muaj ntau yam teeb meem ua rau ''rov qab muaj tej teeb meem yuam neeg ua qhev tiam tshiab'' ntawm New South Wales ntau tuaj ntxiv lawm.
- Tsab ntawv cej luam no hais tias tej neeg ua hauj lwm Pacific workers thiab backpackers uas ua hauj lwm rau ntau cov lagluam thiab tej zos toj siab thiab tej zos cheeb tsam ntawm NSW yog cov ntsib tej teeb meem no.
- Cov kev yuam neeg ua qhev tiam tshiab no ces yog cov kev tiv nuj nqe, raug yuam siv dag zog, raug yuam ua qhev rau lwm tus deev, thiab raug nyiag coj mus siv ntau yam yam tsis raug kev raug cai.
Raws li tau muaj ib tsab ntawv cej luam tshiab qhia ces tej neeg Pacific workers thiab backpackers (Tej neeg ntoj ncig ev hnab ncig teb chaws) uas tab tom ua hauj lwm rau ntau yam lagluam ntawm NSW ces yuav raug tej teeb meem tiv nuj nqe, raug yuam siv dag zog, raug dag ntxias tias yuav tau hauj lwm ua, raug yuam ua qhev deev lwm tus thiab raug coj mus siv ua ntau yam tsis raug kev raug cai.
Ces tej kev txhawj xeeb no thiaj raug teev ntxaws rau hauv ib tsab ntawv cej luam uas NWS lub tuam chav tawm tsam tsis pub yuam neeg ua qhev thiab lub koom haum uas ntiav tej neeg tsiv teb tsaws chaw tuaj ua hauj lwm ib ntus ntawm tej zos toj siab thiab zos cheeb tsam ntawm NSW tau coj los qhia rau hnub zwj Feej (18.09.2024).
Ces tus coj ntawm lub koom haum NSW anti-slavery commissioner thiab report author James Cockayne uas yog tus sau tsab ntawv cej luam no thiaj tau hais tias "Tej neeg ua hauj lwm no ces yeej khuam daig thiab poob rau tej xwm txheej raug lwm tus yuam siv yam tsis raug cai, thiab tau kwv yees tias muaj tej neg no txog li ntawm 16,400 tus poob rau tej xwm txheej raug yuam ua qhev rau lub neej tiam tshiab ntawm NSW.''
Raws li tsab ntawv cej luam no tau qhia ces ''tej xwm txheej phom sij loj'' ntawm cov kev yuam tej neeg ua qhev tiam tshiab no ''yog ib cov teeb meem sib chab sib chaws heev'' vim rau qhov yog tej yam nyuaj heev tsis muaj peev xwm yuav tswj tau tej lagluam ua liaj ua teb, cog qoob loo thiab cog xyoob ntoo thiab tej lagluam hlais nqaij.
Tsis yog tias tej lagluam no ntiav tej neeg tsiv teb tsaws chaw ua hauj lwm uas yuav ntsib teeb meem li tej neeg ua hauj lwm raws cov program hu ua Pacific Australia Labour Mobility (PALM) workers thiab backpackers los yog Working Holiday Makers (WHM), tab sis tej nom tswv tswj cai kuj tsis muaj peev xwm nrhiav tau tej neeg no txaus rau tej tswv lagluam xiv ntawm ntau thaj chaw thiab lub caij uas yuav saub tej qoob loo los sis cog xyoob cog ntoo ntawd siv.
Ces thiaj li yuav tau tos tej tuam txhab ntiav neeg ua hauj lwm ntawm NSW, ACT, Victoria, South Australia thiab Queensland pab nrhiav tej neeg no xwb. Thiab lawv yeej tsis tas ua raws ib co cai dab tsi tsis ntsees.
Cov kev ntiav tej neeg ua hauj lwm WHM ces tsis tas teev zwm dab tsi li, ces thiaj yog tej yam nyuaj heev rau tsoom fwv xeev thiab tsoom teb chaws yuav txheeb tau tias nyob rau qhov twg thiab leej twg yog tej tswv lagluam.
Tsis tas li ntawd los, ntau yam kev txwv rau tej visa ntawm cov neeg ua hauj lwm tuaj raws cov program PALM ua rau lawv tsis muaj cai hloov tau mus ua hauj lwm rau tej tswv lagluam tshiab rau lub lawv tseem nyob ntawm teb chaws Australia. Thiab yeej muaj tej neeg ua hauj lwm no txog li ntawm 70 feem pua ntawm NSW yog cov uas tuaj ua hauj lwm ntev thiab yeej muaj tej contracts txog 4 lub xyoos.
Ib tug neeg ua hauj lwm raws cov program PALM ces tsuas muaj peev xwm mus ua tau hauj lwm rau lwm tus tswv lagluam yog tias thawj tug tswv lagluam tso cai xwb los yog tsuas nyob ntawm lub tuam chav Department of Employment and Workplace Relations ua cov tso cai xwb.
Sophia Kagan, ces yog ib tug neeg sab laj txog tej cai txog cov kev tsis teb tsaws chaw mus uas zog ntawm lub koom haum NSW Anti-slavery Commissioner, thiab kuj yog tus koom sau tsab ntawv cej luam no tau hais tias, tej poj niam neeg tsiv teb tsaws chaw ua hauj lwm yog cov yuav raug yuam ua qhev.
Nws tau hais tias ''Tej program uas muaj siv tam sim no yeej tsis muaj peev xwm nrhiav tau neeg ua hauj lwm txaus ces thiaj ua rau muaj tej poj niam ua hauj lwm raws cov program PALM tsis qhia txog tej xwm txheej kub ntxhov, cov kev raug yuam rau tswj thiab cov kev raug yam deev. Tsis tas li ntawd los tej poj niam neeg tsiv teb tsaws chaw ua hauj lwm no thaum muaj me nyuam lawm ces yeej tsis tau mus siv cov kev tu saib xyuas rau lub caij lawv muaj me nyuam li thiab. Lwm cov poj niam ces yeej ras los ua cov neeg tsis muaj vaj tse nyob thiab tej zaum kuj yuav raug muab xa rov qab, tab sis lawv yeej ntshai tsis kam mus hais plaub kom tau txais kev ncaj ncees rau lawv.''
Tsab ntawv cej luam no tseem tau qhia txog qhov tseem ceeb tias vim muaj tej kev pab cuam thiab raus tes tsawg tsawg ntawm tej nom tswv xeev xwb, ces tej nom tswv zos thiab tej koom haum pab cuam zejzog thiaj yog cov yuav tau los daws tej teeb meem no, uas lawv yeej tsis tshua muaj tej peev txheej txaus yuav los pab tej neeg no.
Ces tsab ntawv cej luam no thiaj tau hais tias yog xav kom los daws tau thaib tiv thaiv tau kom tsis txhob muaj 'tej xwm txheej phom sij loj tuaj ntxiv' cuam tshuam txog cov kev yuam neeg ua qhev tiam tshiab no, ces yuav tau xyuas kom muaj ib co kev tshuaj ntsuam txog tej neeg uas ntsib tej teeb meem no kom totaub zoo txog tej xwm txheej no; thiab yuav tau teeb tsa ib co koom haum pab tej neeg tsiv teb tsaws chaw; thiab yuav tau tshwm nyiaj pab rau tej koom haum zejzog puas pab tej neeg no.
Moe Turaga uas yog ib tug neeg uas dim ntawm cov xwm txheej raug yuam ua qhev tiam tshiab no thiab kuj yog ib tug pab thiab txhawb nqa lwm tus tau hais tias:
''Tej neeg zoo li kuv uas tuaj rau teb chaws Australia no yeej cia siab tias yuav muaj tej cib fim nrhiav tau ib txoj hauj lwm zoo dua ua thaib yuav pab kom peb tsev neeg ua tau lub neej pem suab zoo dua, tab sis coob leej ntau tus kuj tau ntsib teeb meem nyuaj ntau tsav ntau yam thiab paub txog qhov tseeb tias zoo li cas thaum lawv tuaj txog. Tam sim no kiag, los yeej muaj tej neeg no coob heev tsis muaj cai dab tsi li. Peb thiaj xav kom yuav tsum tsim kom tau tej cai zoo dua thiab tej system pab cuam zoo dua kom NSW thiaj yog ib lub xeev uas zoo siab hlo tos txais tej qhua tuaj ua hauj lwm tiag tiag.''
READ MORE
Australia tej visa ua teb
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
