Xov xwm luv tshaj tawm rau hnub zwj Quag (Tuesday newsflash 26.03.2024):
Tau muaj ib rooj plaub ntawm New York uas tseem sib hais ntawd tau hais tias yog Meskas tus qub thawj tsav meem Donald Trump dhau los kam them ib nrab ntawm tej nqe hais plaub yuav laug txog $700 million dollars cuam tshuam txog nws cov kev ua tsis ncaj kom nws tau txais txiaj ntsim rau phab lagluam rau 10 hnub ntxiv no ces yuav tsis txeeb nws tej peev txheej.
David Littlepround uas yog tus coj ntawm pab nom Nationals kuj qhia tias nws yuav koom tes nrog pab nom koom tswj thiab lwm cov nom Liberals los tsim seb puas tau ib tsab cai los tiv thaiv kom tej tuam txhab subpermarket tsis txhob muaj fwj chim dhau heev lawm. Tab sis yog tsis tau txais kev pab los ntawm lwm cov nom me thiab tsoom fwv ces ntshe yuav tsis muaj peev xwm tsim tau tsab cai no siv.
Tuam txhab Qantas tej kws tsav hlau kuj raug yuam kom yuav tsum tau tsaws lub dav hlau uas ya ntawm Melbourne mus rau Perth ntawd, nyob rau ntawm Perth Airport yam tau txais kev nyab xeeb, tom qab uas tau muaj tej neeg caij lub dav hlau ntawd tau hnov ib lub suab tawg nrov heev li log tsheb twg.
Teb chaws Australia lub koom haum sawv cev rau tej neeg ua hauj lwm (Australian Council of Trade Union-ACTU) qhia tias tej nyiaj poob nqes ua rau Australia tej neeg yuav khwv tau nyiaj tsawg dua $5,000. Ces Sally McManus uas yog tus coj ntawm lub koom haum no thiaj hais tias Australia tej neeg ua hauj lwm khwv tau nyiaj tsawg yog cov ntsib teeb meem nyuaj tshaj plaws tam sim no, ces nws thiaj hais tias Australia tej tuam txhab lagluam yeej muaj peev xwm them tau tej nyiaj hauj lwm ntau tuaj ntxiv txog li 5% rau Australia tej neeg ua hauj lwm kwv tau nyiaj tsawg (minimum wages) thiab awards wages.
Tsoom fwv Askiv thiab Meskas tau qhia tias nkawv yuav rau txim tau ib lub tuam txhab thiab ob tug neeg ntiag tug uas muaj feem cuam tshuam nrog tsoom fwv Suav los tsim cov teeb meem cyber attack. Nom tswv Askiv tau qhia tej xov xwm ntxaws txog tej hauj lwm ua los ntev uas tau txais kev txhawb nqa los ntawm nom tswv uas tsim teeb mem rau tej nom tswv, thiab Askiv cov kev xaiv tsa.
Tej neeg Palestinians ntawm kuj tau mus tshawb tej vaj tse puas ntsoog uas raug Israel tej dav hlau tua rog tua uas tau ua rau muaj neeg raug tua tuag yam tsawg li 7 leej.
Dave Calhoun uas yog Boeing tus coj thiab Larry Kellner uas yog Boeing tus chair kuj qhia tias nkawv yuav tawm tsis ua tus coj lub tuam txhab no rau thaum xaus xyoo no lawm, tom qab uas tau muaj tej xwm txheej cuam tshuam txog cov kev tsis tau txais kev nyab xeeb rau Boeing tej dav hlau.
Nplog ob lub chaw nthuav xov xwm li KPL thiab the Laotian Times kuj tau tshaj tawm tias tsoom fwv Australia tau txhawb nqa Nplog thiab koom nrog ob lub tuam txhab nyiaj li World Bank thiab Asian Development Bank (ADB) los pab tsim Nplog tej hauv paus txhim kho rau sab qaum teb thiab Mekong subregion txuas rau Thaib teb thiab txuas rau teb chaws Nyab laj sab hnub tuaj kom Nplog ras los ua lub teb chaws sib txuas tau ntawm cheeb tsam no. Tsoom fwv Australia kuj tau pab $12 million rau Nplog ua tej hauj lwm no.
Bangkok Post tau tshaj tawm tias Thaib tus thawj pwm tsav Srettha Thavisin tau tib tias tos lub sij hawm 7 hlis los no nws ua tsis tau dab tsi los vim tsev tsoom fwv pheej ncua tsis pom zoo tso cai rau nws siv tej nyiaj puag xyoo los ua nws tej hauj lwm.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
