Ntsiab lus tseem ceeb:
- Australia zej tsoom tej teej kawm yeej muaj ntau cov program thiab tej kev pab uas siv dawb kom tej neeg tau sib ntsib sib cuag thiab tau txais kev pab rau txhua yam neeg hnoob nyoog sib txawv.
- Tej chaw khaws ntawv/chaw saib ntawvmuaj lub luag hauj lwm tseem ceeb kom tej neeg tsiv teb tsaws chaw tshiab ua tau lub neej, qhia tej chav kawm ntawv Askiv, qhia tej kab lis kev cai, thiab qhia tej program pab txhim kho tej zejzog..
- Yeej muaj ib txhia chaw saib ntawv tam sim no ces yeej ntiav cov neeg ua hauj lwm pab zej tsoom (social workers) ua hauj lwm, thiab nrog xyuas kom sawv daws muaj feem koom siv, thiab hloov raws li tej zejzog cov kev pauv hloov.
Thoob teb chaws Australia no zej tsoom tej chaw saib ntawv yeej muaj cov phau ntawv tshaj 40 million phau ua ntawv Askiv thiab ua lwm yam ntawv. Tab sis lawv tej hauj lwm kuj muaj ntau tshaj qhov qev ntawv rau tej neeg saib lawm thiab.
Tej chaw saib ntawv yeej ib txwm yog thaj chaw pab kom sawv daws tau sib ntsib sib cuag
Lawv yeej muaj tej programs thiab tej koom txoos ua txhua yam pib txij li cov kev qhia dab neeg, tej neeg sau ntawv mus tham thiab qhia txog lawv cov phau ntawv qhia rau lwm tus paub, mus txog rau cov chav kawm kom paub siv digital technology, tej koom txoos kab lis kev cai thiab tej chav kawm qhia kom paub kho ntau yam.
Runti You ces yog ib tug librarian ua hauj lwm ntawm lub chaw saib ntawv yeej nco tau tias tau ua rau nws ceeb thaum nws tau tsiv ntawm teb chaws Suav ib lub zos me me tuaj nyob teb chaws Australia no thiab txheeb tau tias muaj txhua yam kev pab cuam ntawm Australia tej chaw saib ntawv pab rau tej neeg sawv daws. Tam sim no ces nws tab tom pab tej neeg tsiv teb tsaws chaw tshiab kom paub siv tej system no.
Nws hais tias “Thaum xub ces kuj yog tej yam ua rau kuv ceeb loj kawg thaum kuv paub tias ua li cas Australia tej zej tsoom tej teej kawm yuav muaj ntau cov kev pab cuam rau tej neeg sawv daws dua ntawm qhov uas qev ntawv saib lawm.''
Australia tej zej tsoom tej chaw saib ntawv yeej muaj ntau yam programs thiab ntau cov kev pab cuam pag tej neeg kom muaj peev xwm sib ntsib sib cuag nrog lwm tus thiab muaj ntau yam kev pab cuam rau txhua yam neeg hnoob nyoog sib txawv. Credit: The Wagga Wagga City Library
Tej chaw saib ntawv yog ib co chaw zoo heev rau tej neeg tsiv teb tsaws chaw tuaj tshiab rau teb chaws Australia
Yeej muaj ntau cov chaw saib ntawv hais tsis ntsees rau tej ntawm tej chaw muaj ntau tsav neeg coj ntseeg ntau yam kab lis kev cai yeej tsim ntau yam programs pab rau tej neeg tuaj tshiab, thiab pab kom lawv kawm tau ntawv Askiv, thiab pab kom lawv tau sib ntsib sib cuag nrog lawv tej zejzog thiab totaub txog neeg Australia txoj kev ua lub neej.
Leila Davendeh uas yog ib tug tsim tej program ntau yam tshab txhais tias lub chaw saib ntawv ntawm New South Wales ces yeej muaj ib co program qhia ntawv sawv daws nyiam kawm hu ua Language Café coj los qhia rau tej neeg tsiv teb tsaws chaw. Tsis tas li ntawd los yeej muaj tej neeg ua hauj lwm yeem thaj mus qhia ntawv Askiv rau lawv los sis mus nrog lawv sib tham ua lus Askiv los yog nrog lawv nyeem ntawv ua ke.
Nws los kuj npaj cov uas yog ib co exhibition coj los qhia txog tej tub koom siab uas mus siv lub chaw saib ntawv thiab qhia txog lawv cov kev tsiv teb tsaws chaw tuaj rau teb chaws Australia thiab. Uas tam sim no ces qhia txog ib tug ntxhais hlua neeg Yazidi.
Ntawm Doncaster los Runti You los kuj tau tswj ib pab neeg uas tuaj tshaib rau teb chaws Australia no kom tau nyeem ntawv thiab pab tej neeg uas twb tuaj nyob ntev ntawm teb chaws Australia lawm kom siv tau ntawv Askiv zoo tuaj ntxiv thiab.
Nws hais tias ''Lub caij uas pawg neeg no kawm tau zoo zuj zus tuaj lawm, ces lawv maj mam tsim tau ib cov kev phooj ywg zoo ntawm tej tub koom siab. Hais tsi ntsees rau pawg neeg no ces kuv mloog tau tias yog cov kev nrhiav ib qho chaw pab kom lawv kawm tau ntawv Askiv zoo tuaj ntxiv, tsis tas li no los kuj pab kom lawv muaj cib fim tau paub nrog lawm tus ntawm tej zejzog uas xav kawm kom siv tau lus Askiv zoo tuaj ntxiv thiab hais tsis ntsees rau tej neeg ntawm tej neeg coj ntseeg ntau yam kab lic kev cai, thiab kuj yog ib co kev pab kom lawv tau sib ntsib sib cuag nrog lwm tus thiab.''
Sawv daws yeej muaj peev xwm siv tau tej libraries
Yeej muaj ntau yam programs pab tej me nyuam yaus, pab tej hluas thiab tej cuab yig uas yog ib co tseem ceeb heev thiab.
Leila Davandeh hais tias "Kuv yeej yog ib tug leej niam tseem muaj ib tug me nyuam tseem yau heev, thiab tsis tau ua hauj lwm, thiab xav mus koom ua ib yam dab tsi, yog li tej libraries thiaj li yog ib qho chaw zoo heev rau kuv. Kuv tau totaub tias thaum kuv tau pib ua hauj lwm ntawm ib lub library lawm thiab tau pom tias tag nrho lwm tus leej niam hluas uas muaj tej me nyuam ces yeej tau mus siv tej library thiab. Tsis yog tias pab kom lawv tau ntsib tau pom thiab tau sib cuag nrog lwm tus xwb, tab sis tseem tau pab kom lawv tau nyeem ntawv, sib tham thiab saib ntawv thiab.''
Pamela López ces yog ib tug neeg siv ib lub library ntawm Melbourne, uas yeej nyiam mus koom cov program qhia rau tej me nyuam mob liab thiab qhia dab neeg rau tej me nyuam tseem yau li nws tus tub thiab: ''Kuv yeej tau koom nrog tej koom txoos ntau yam tam sim no, muaj kev lom zem, tau hu nkauj rau kuv tus me nyuam mob liab, thiab kuv kuj pom tias yog tej yam zoo heev rau kuv vim thaum kuv tig mus saib ib puag ncig kuv ces yeej muaj lwm tus ua tib yam li yus ua thiab.''
Tsis tas li ntawd lo syeej muaj ntau cov libraries uas yeej muaj tej program hais dab neeg ua ntau yam lus dua ntawm cov dab neeg hais ua lus Askiv thiab.
Dua ntawm cov program Language Café lawmc es lub Wagga Wagga City Library yeej muaj ib co program qhia tej hluas ntawm tej zejzog coj ntseeg ntau yam kab lis kev cai thiab.
Ms You hais tias ''Peb yeej qhia tej hluas ua yeeb yam, peb kawm paj nruag, peb kawm ntaus kistaj (guitar) thiab kawm ntaus nruas, kawm kos duab thiab muaj tej chav kawm qhia xov xwm rau tej neeg sawv daws thiab. Tsis tas li ntawd los peb yeej tau caw ib cov neeg ua ib co hauj lwm ntau yam sib txawv los tham tias seb lawv ua lawv tej hauj lwm li cas thiab qhia txog ntau cov kauj ruam pab tej neeg nyuam qhuav tuaj nyob tshiab ntawm teb chaws Australia tias ua li cas lawv thiaj tau tuaj rau teb chaws Australia thiab.''
Tej libraries yeej muaj ib lub luag hauj lwm tseem ceeb pab tej neeg tsiv teb tsaws chaw tuaj tshiab kom pib ua tau lub neej ntawm teb chaws no, muaj tej chav qhia ntawv Askiv, qhia kab lis kev cai thiab muaj tej programs ua coj los pab txhim kho tej zejzog. Credit: Wagga YMG Karate Session/ The Wagga Wagga City Library.
Lawv yeej muaj tej chav kawm qhia technology rau tej neeg hnoob nyoog txij 18 xyoo mus los yog qhia rau tej laus neeg, muaj tej book clubs thiab muaj tej chav kawm pab tej neeg npaj kom nrhiav tau hauj lwm ua thiab.
Lub caij uas tej chaw khaws ntawv/saib ntawv yuav tau hloov kom siv tau raws li tej digital technology ces yeej muaj ntau yam programs pab sawv daws tsis hais yog cov program pab tej neeg ua homework, thiab yeej muaj tej neeg sau ntawv mus qhia txog lawv cov ntawv uas lawv sau coj mus tso rau hauv online rau sawv daws tau saib, ces txawm tias yus tsis tau mus kiag rau ntawm tej chaw saib ntawv los yus yeej tseem koom tau hauv online thiab.
Bronwyn Arnold ces yog tus tswj lub chaw saib ntawv cov program pab kom zej tsoom muaj kev koom npoj thiab muaj kev sib raug zoo thiab kuj yog tus koom tswj lub koom haum ntawm Melbourne sab hnub tuaj. Nws hais tias tej neeg khaws ntawv thiab qev ntawv rau lwm tus yeej ib txwm npaj txhij yuav pab nej.
“Peb yeej ib txwm hais tias tej neeg ua hauj lwm khaws thiab tus thiab qev ntawv ntawm tej chaw saib ntawv yeej tsis paub txhua yam, tab sis yog thaum muaj tej neeg nug ib co lus nug dab tsi rau peb tias ''Kuv tsis paub ua yam no' los sis yog ''Kuv tsis paub tias yuav ua li cas rau yam no,'' ces peb yeej yuav saum tsaws nrog nej tham thiab taw qhia nej kom muaj peev xwm nrhiav tau lus teb rau nej tej lus nug ntawv.”
Muaj ib txhia chaw saib ntawv (Libraries) ces tam sim no yeej ntiav tej neeg ua hauj lwm social workers mus ua hauj lwm los pab kom zej tsoom muaj feem koom siv ntau yam kev pab cuam raws li tej zejzog cov kev pauv hloov thiab cov kev xav tau txais kev pab. Credit: The Wagga Wagga City Library
Tej neeg ua hauj lwm pab zej tsoom ntawm tej chaw saib ntawv yeej muaj lwm yam kev pab rau tej neeg thiab
Vim tej libraries tam tom ras los ua tej chaw tseem ceeb zujzus tuaj ntxiv rau tej neeg zejzog lawm ces thiaj pom tias tau muaj ib txhia ces tau ntiav tej neeg ua hauj lwm social workers (tej neeg ua hauj lwm pab zej tsoom) ua hauj lwm lawm thiab.
Lizzie Flaherty ces yog , ntawm lub chaw saib ntawv . Nws cia siab tias yuav muaj tej neeg ua hauj lwm social workers ntau tuaj ntxiv ua hauj lwm thoob plaws rau tej chaw saib ntawv ntawm haiv neeg no.
Nws hais tias “Tej chaw saib ntawv ces yeej tau loj hlob sai kawg nkaug li thiab yog tej chaw uas yeej muaj kev pauv hloov tas mus li kom siv tau haum raws li tej zejzog xav tau. Tej neeg yeej pib nkag siab lawm tias tej neeg ua hauj lwm pab zej tsoom ho ua hauj lwm li cas thiab ho muaj peev xwm ras los ua ib feem tseem ceeb ntawm tej zejzog li cas.”
Nws thiaj hais tias tej libraries ces yog ib qho chaw uas tej neeg muaj peev xwm koom tau ntau tshaj plaws.
Nws hais tias “Tej chaw saib ntawv ces yog ib qho chaw uas tsis hais yuav yuav zoo li cas li yeej muaj peev xwm koom tau thiab tsis tas yuav them nyiaj dab tsi los yeej koom tau; ntawm qhov chaw no ces txhua leej txhua tus yeej koom tau tej programs thiab ntau yam kev pab cuam dawb xwb. Thiab yeej tos txais sawv daws, tsis tas li ntawd los yeej yog ib qho chaw tau txais kev nyab xeeb thiab.''
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
