Xov xwm tshaj tawm hnub zwj Feej (Wednesday news 09.04.2025):
Pab nom koom tswj kuj tau los qhia txog nws tsab cai gas policy tom qab ob tug coj ntawm ob pab nom tseem ceeb tau sib teev theev nag hmo (tim 8/4/2025). Uas nws yuav xyuas kom muaj gas txaus siv rau tej nroog sab hnub tuaj thiab xyuas kom muaj gas txaus siv ntawm teb chaws Australia, thiab txo kom nqe gas pheej yig txog 23%. Tab sis Claire O'Neil uas yog tsoom fwv tus nom tswj dej num vaj tse hais tias tsab cai no siv tsis tau zoo vim rau qhov pab nom koom tswj tej cai tsis kub siab daws tej nuj nqes siv ua lub neej.
Jason Clare uas yog tus nom tswj dej num kev kawm hais tias tsis yog lub caij yuav los tham txog cov tias ntiaj teb tej lagluam yuav ntog tom qab Meskas tus Presdient Trump tau tsub se rau tej khoom xav muag rau teb chaws Meskas. Nws thiaj tau nrog ABC Breakfast tham thiab pov puag tus nom tswj nyiaj txiaj tias yog tej yam tsim nyog tsoom fwv ua. Nws thiaj hais tias ''Sawv daws yeej yuav plam txiaj ntsim ntawm tej tsov rog lagluam no thiab peb tsis xav kom coj Meskas lub tswv yim txiav nyiaj los yog qog qab raws li Meskas ua coj los siv ntawm teb chaws Australia no.''
Thawj pwm tsav Anthony Albanese tseem tsis tau qhia meej tias seb nws pab nom puas yuav sib khom nrog pab nom Greens cov kev cheem tsis pub nce nqe ntiav tsev, tsis siv negative gearing thiab cov capital gain tax, tab sis Jason Clare uas yog tus nom tswj dej num kev kawm yeej tau qhia tias yuav tsis pab pab nom Green tej hauj lwm no.
Australia ob pab nom tseem ceeb tej coj kuj tau los sib teev theev qhia txog lawv tej tswv yim tias yuav daws tej teeb meem nuj nqes siv ua lub neej li cas. Tau muaj 100 tus neeg xaiv nom ntawm Western Sydney thiaj tau nug ntau yam txog kev kawm, kev kho mobthiab tej nqe them hluav taws xob nrog rau ntau yam. Thiaj pom tias muaj ib nrab ntawm tej neeg no hais tias lawv yeej tsis tshua muaj peev xwm ua tau lub neej. Dutton yeej raug nug txog cov hauj lwm tsiv teb tsaws chaw tas los rov qab nug ntxiv, thiab muaj ib tug hais tias kom tsis txhob ntaus nqe yuam kev rau lawv (neeg tsiv teb tsaws chaw). Mr Dutton hais tias tsim nyog Australia ua kev zoo siab rau cov kev tsiv teb tsaw chaw tab sis nyuaj heev tam sim no vim muaj neeg tsiv teb tsaws chaw tuaj coob heev ces thiaj ua rau tsis muaj tsev txaus nyob. Mr Albanese los kuj hais tias Labor kuj txhawj txog tej nqe tsev thiab tej vaj tse tsis muaj txaus nyob thiab yeej tau txwv 2 xyoos tsis pub neeg txawv teb chaws yuav tsev nrog lwm yam tswv yim kom muaj tsev txaus nyob.
Meskas tseem tab tom tsub se lagluam 104% rau Suav tej khoom xa muag rau nws txij hmo no mus tom qab tsoom fwv Suav tsis kam tshem tej se tsub rau Meskas tej khoom xav muag rau Suav coj los pauj rau tej Meskas tsub rau Suav.
Tsab cai energy policy ces yog ib tsab cai uas muaj kev sib cov nyom tshaj plaws ntawm thawj pwm tsav thiab tus coj ntawm lwm pab nom teb chaws lub caij sib teev theev ntawm lub chaw nthuav xov xwm Sky News. Thawj pwm tsav Albanese thiaj tawm tsam nrog lwm pab nom teb chaws tsab cai nuclear energy policy thiab nug Mr Dutton tias seb nws yuav them $600 billion li cas. Nws hais tias '' Koj yuav txiav dab tsi los them? Vim tej lagluam ntiav tsis kam them lawm, ces tshe txhua tus neeg ua hauj lwm them se yuav tau them koj lub tswv yim no.'' Tab sis Mr Dutton tsis teb thiab cia li hais tias tej nqe hluav taws xob los tau kim tuaj thaum tsoom fwv Labor tseem ua nom. Nws hais tias ''Anthony yeej tsis qhia qhov tseeb rau nej. CSIRO yeej qhia tias nuclear energy siv nyiaj $120 billion xwb, thiab lub koom haum Frontier Economics thiab tej economist yeej hais tias Labor cov renewable energy tsuas siv nyiaj txog li $600 billion xwb.''
Lub caij xaus cov kev sib teev theev thawj zaug no ces thawj pwm tsav thiab tus coj ntawm lwm pab nom teb chaws kuj tau los kub siab txog tej tswv yim daws nuj nqes siv ua lub neej uas yog ib co hauj lwm tseem ceeb tshaj plaws rau cov kev xaiv tsa tsoom fwv teb chaws zaum no. Mr Albanese thiaj twv nrog Mr Dutton kom nws qhia tias seb puas yuav txiav nyiaj pab kho mob los tsis txiav, vim Coalition tsis ua li nws cog lus xyoo 2013. Mr Dutton hasi tias lub sij hawm 3 xyoos uas Labor ua nom ntawd ces nws tus tsoom fwv yeej tsis kub siab tiag tiag los xyuas kom nyiaj tsis txhob poob nqe. Thiab tus tsoom fwv koom tswj xwb thiaj yog tus muaj peev xwm tswj tau tej lagluam zoo.
Meskas hais tias nws yuav tsis ua siab ntev rau cov kev sib khom los yog cov kev yuam tsis ua raws li cov kev sib khom pom zoo xaus tsov rog ntawm Ukraine. Dorothy Shea uas yog Meskas tus kis Ambassador ntawm tau qhia rau Security Council tias nws mam li txiav txim raws li Russia tus President Vladimir Putin tej cwj pwm seb puas kub siab xaus tsov rog xwb. Thiaj tau muaj tej xwm txheej no tom qab Russia tau tua ib lub foob pob rau Ukraine lub nroog Kryvyi Rih ua rau 11 tus neeg thiab 9 tug me nyuam yaus raug tua tuag.
Kaus lim qaum teb lub chaw nthuav xovxwm qhia tias nws yuav tsis thim nws lub teb chaws tias yog ib lub teb chaws muaj nuclear txawm tias Meskas thiab ntau lub teb chaws Asia xav kom nws tso tseg nws tej riam phom nuclear. Thiaj tau muaj tej lus tawm tswv yim no hnub zwj Feej (Wednesday) tim 9/4/2025 nothaum tau muaj ib cov kev sab laj ntawm Meskas, Kaus Lim qab teb, Japan thiab NATO sib tham limtiam dhau los. Ua Kim Yog Jong uas yog Kim Jong Un tus muam hais tias yeej yuav tsis pauv dab tsi.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
