Xov xwm luv tshaj tawm hnub zwj Feej (Wednesday newsflash 22.05.2024):
Russia tus President Vladimir Putin hais tias Russia npaj txhij yuav pab teb chaws Iran mus tshuaj ntsuam xyuas cov xwm txheej ib lub nyob hoom kiv tshuab tau poob uas ua rau lub teb chaws no tus president Raisi thiab nws lwm cov nom tas sim neej rau hnub zwj Hli (Monday) dhau los. Ces Vyacheslov Volodin uas yog tus tswj Russia lub tsev tsoom fwv thiaj sawv cev rau Russia mus koom President Raisi lub ntees ntawm Tehran.
Neeg Australia poob nyiaj rau tej neeg phem cov kev ntxias dag tsawg zog lawm raws li tau muaj kev cej luam tias muaj neeg raug dag coob ntxiv tuaj. Ces thiaj ua rau muaj tej neeg raug dag tsawg dua 11 feem pua rau lub caij peb hlis los txog lub 3 hlis ntuj (2024) raws li tsab ntawv cej luam National Anti-Scam Centre report tau qhia, ces tsuas muaj neeg poob nyiaj tshaj $73 million dollars rau lub sij hawm 3 lub hlis xyoo no xwb.
Pab nom Labor tsis lees paub cov kev muab tsoom fwv Israel thiab Hamas sib piv, tom qab pej kum haiv lub tsev hais plaub International Criminal Court (ICC) tau tawm ib daim ntawv yuav txom tej nom tseem ceeb ntawm ob tog cuam tshuam no. Thawj pwm tsav Anthony Albanese raug lwm pab nom teb chaws (Federal opposition) tib nag hmo txog nws tej lus tawm tswv yim txog daim ntawv txhom, tom qab nws tsis kam tawm tswv yim dab tsi rau lub caij tseem muaj tej hauj lwm ntawm pej kum haiv lub tsev hais plaub no txawv teb chaws.
Tsoom fwv teb chaws Australia kuj zoo siab rau cov kev ''koom tes zoo'' nrog Israel los tshuaj ntsuam xyuas tej xwm txheej tau ua rau Zomi Franckom uas yog ib tug neeg Australia ua hauj lwm pab tej neeg txom nyem ntawm Gaza uas raug tua tuag. Tau muaj ib tug kis ntawm Australia lub tuam chav lis laj fai pej kum tau qhia tias Australia yeej xav kom mus ua tib zoo tshuaj ntsuam seb yog tim li cas thiab muaj txoj kev dawb huv rau cov kev tshuaj ntsuam no thiab Israel los yeej tab tom koom tes.
Kuj tau muaj neeg Australia yam tsawg li 8 leej raug coj mus kho ntawm tsev kho mob tom qab tau muaj tej xwm txheej huab cua phem saum nruab ntug rau lub caij Singapore Airlines ib fij dav hlau uas ya tawm ntawm London raug yuam kom los tsaws ntawm Bangkok. Tau muaj ib tug txiv neej neeg Askiv hnoob nyoog 73 xyoos uas lawv ntseeg tias plawv nres thiab tau tas sim neej thiab kuj muaj 30 tus neeg caij fij dav hlau ntawd raug mob thaum muaj huab cua phem tsim teeb meem rau fij dav hlau uas yav ntev txog 10 teev, uas tau muab tej neeg caij nchos mus nchos los ntawm qhov chaw zaum caij dav hlau. Thiab kuj muaj 56 tus ntawm tej neeg 211 tug uas caij fij dav hlau no yog neeg Australia.
Queeland tus nom kis xeev qes hu ua Brittany Lauga tau muab nws lbu chaw ua hauj lwm kaw vim tau muaj nws ib tug neeg ua hauj lwm raug neeg phem hawv yuav ua phem rau tom qab tau ntau limtiam uas nws tau qhia tias nws raug neeg muab tshuaj lom thiab tau muab nws yuam deev.
Cov kev xav tsim kom tau ib lub chaw tsim hluav taws xob nuclear power plant ntawm Australia yuav ua rau yuav tau siv nyiaj yam tsawg li $8.5 billion raws li CSIRO uas yog Australia ib lub koom haum tshawb fawb tau qhia. Thiaj yog thawj zaug ntawm Australia uas xav tsim kom tau ib co chaw tsim hluav taws xob nuclear power plant los tsim hluav taws xob siv thiab raug coj los xam tias raug nqe ntau npaum li cas rau tej kev txiav txim siab uas npaj tias yuav tsim dab tsi ntev ntxiv tuaj coj los tsim hluav taws xob siv. CSIRO thiaj cej luam tias cov kev siv nuclear los tsim hluav taws xob siv ces yuav ua rau tau them tej nqe kim tshaj cov kev siv tej renewable technology uas yog ib cov technologies tshiab siv ntawm yuav laug txog li ntawm ob npaug, thiab cov renewable techonlogy yog cov pheej yig tshaj plaws.
Nplog phau ntawv xov xwm Vientiane Times tau tshaj tawm tias tau muaj ib lub rooj sab laj sib tham ntawm Indonesia txog cov teb chaws nyob raws tus dej Mekong los sab laj txog cov kev yuav sib faib thiab sib qhia txog tej xov xwm txog ntau yam xwm txheej txog tus dej no li tej xwm txheej ntuj qhuav nkig, dej nyab thiab tej tswv yim los tiv thaiv dej nyab kom zoo tshaj qub ntxiv.
Bangkok Post tau tshaj tawm tias yog thawj zaug uas Thaib tus thawj pwm tsav Srettha Thavisin yuav mus koom Thaib tej neeg LGBTQI+ lub koom txoos Pride Parade ntawm Bangkok rau lub 6 hli ntuj 2024 no, uas yog thawj zaug uas nom tswv Thaib tau mus koom, tom qab uas FBI thiab Meskas lub tuam chav tswj kev ruaj ntseg haiv tau ceeb toom tias tsam yuav muaj neeg phem tsim teeb meem rau tej koom txoos no rau lub hli Pride Month.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
