Yingyee Lor yog tus teeb tsa thiab yog tus coj lub koom haum Faithful Consulting LLC uas tau kawm tiav Ph.D. rau phab txuj education (ABD) thiab kawm Master Degree txog Organizational Psychology in Counseling, mus txog rau kawm Bachelors Degree rau cov hauj lwm pab cuam zej tsoom (Social Work) thiab ho tau ua ntau tus coj rau ntau lub koom haum tau qhia rau xov tooj cua SBS Radio Hmong Program ntawm nroog Melbourne xeev Victoria teb chaws Australia tias, nws xav kom Hmoob tej neeg zejzog tau txais kev noj qab nyob zoo thiab kev noj qab haus huv rau sab kev xav thiab cev ntaj ntsug tib sis rau hnub Mental Health Day, Mental Health Week and Mental Health Month no.
Ms. Lor qhia tias yeej tau muaj cov kev teeb txheeb tau qhia tias muaj ntau yam txuam thawj (factors) tau ua rau tej neeg ntsib thiab raug cov teeb meem nyuaj siab ntxhov plawv xws li tim muaj cov teeb meem no raws caj ceg thiab tim tej teeb meem ib puag ncig.
Tham txog cov kev tau cov teeb meem nyuaj siab ntxhov plawv raws cej ceg ntawm ib tsev neeg twg, ces yog tias tsev neeg ntawd muaj cov neeg raug cov teeb meem no ces yuav ua rau ib tug neeg ntawm tsev neeg muaj cov teeb meem no. Hos yog tham txog tej teeb meem ib puag ncig uas rau yus raug thiab ntsib cov teeb meem nyuaj siab ntxhov plawv no li tim tej kab lis kev cai, txoj kev ua lub neej, kev ua hauj lwm, kev kawm txuj kawm ci uas tshiab thiab txawv ntawm tej yus ib txwm coj thiab ib txwm ua vim cov kev tsiv teb tsaws chaw pib dua lub neej tshiab rau ntuj tshiab teb tshiab ntawd kuj muaj peev xwm ua rau yus ntsib teeb meem nyuaj siab ntxhov plawv tau tib yam thiab.
Yengyee Lor thiaj xav kom Hmoob tej neeg zejzog yuav tsum tau hloov lawv txoj kev xav thiab qhib siab thiab txais tos los yog nrhiav dua cov tswv yim tshiab coj los daws cov teeb meem nyuaj siab ntxhov plawv no. Yengyee yeej paub tias cov teeb meem nyuaj siab ntxhov plawv no tseem yog ib cov teeb meem tshiab heev rau Hmoob tej zejzog, vim tseem muaj tej kab lis kev cai, muaj cov kev raug lwm tus thuam thiab ntaus nqe yuam kev rau, ces thiaj ua rau tej neeg ntsib cov teeb meem nyuaj siab ntxhov plawv no tsis kam tham qhia txog tej teeb meem no rau lwm tus paub, los yog tsis kam mus nrhiav kev pab cuam coj los tiv thaiv, kom cov neeg raug tej teeb meem no txhob khwv tswv yim tua los yog txov txo lawv tus kheej txoj sia los yog lwm tus neeg txoj sia, los sis xav tsim teeb meem rau lawv tus kheej lub cev.
Yog li ntawd Ms Lor thiab xav kom Hmoob tej zejzog yuav tsum lees paub thiab muab cov teeb meem nyuaj siab ntxhov plawv no saib ua ib cov teeb meem tseem ceeb uas yuav tsum tau tham qhia rau cov kws daws kev nyuaj siab (Psychologists) kom thiaj pab tiv thaiv lawv kom txhob raug cov teeb meem txov txo lawv tus kheej txoj sia, es Hmoob tej neeg zejzog thiaj tau txais kev noj qab nyab xeeb rau phab kev xav thiab cev ntaj ntsug tib si.
Yog tias koj tus kheej, koj tej phooj ywg, koj tsev neeg ib tug twg, koj tej txheeb ze los yog ib tug neeg koj hlub tshua twg raug cov teeb meem nyuaj siab ntxhov plawv uas tsim nyog yuav tau txais kev pab ciam kom sai sai kiag tam sim no, ces xav kom koj hu rau lub koom haum tus xov tooj 13 11 14 los yog hu rau lub koom haum tus xov tooj 1300 22 4636 tau.#
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis download tau ntawm thiab ntawm iTunes los yog mloog tau ntawm tuaj koom ua tub koom siab thiab koom mloog tau tau ntawm #SBSHmong lub Facebook page tau.
