Tau muaj cov koom haum tswj kev noj qab haus huv uas cov neeg ua hauj lwm pab poj niam yug me nyuam thiab cov koom haum pab cuam cov neeg tsiv teb tsaws chaws uas coj ntseeg ntau hom kev cai dab qhuas thiab hais ntau hom lus tau nqua hu kom tsoom hwv teb chaws Australia yuav tsum tsim kom tau ib cov ante-natal clinic uas cov midwife paub txog tej neeg cov kab lis kev cai zoo thiab paub lus ntau hom los yog nrhiav neeg los txais lus rau lawv thaum lawv mus siv cov maternity services.
Midwife Ismat Ouaida uas yeej tau teeb tsa ib lub clinic los pab rau cov poj niam neeg Arabic los tau yuav laug txog 20 lub xyoo no tau qhia tias nws lub clinic yog ib qho chaw uas qhia thiab tham rau tej poj niam txog cov kev pub mis rau me nyuam noj, kev noj zaub mov pab rau lawv lub cev, kev npaj seb xav yuav me nyuam tsawg tus los yog tiv thaiv kom txhob muaj me nyuam mus txog rau tham txog qee yam teeb meem tsis tshuaj zoo tham rau lwm tus paub, uas tsuas tham tau ntawm nws lub clinic no nkaus xwb.
Ouaida qhia tias nws yeej paub tias tej poj niam xeeb me nyuam yuav nug nws dab tsi, vim yeej muaj tej neeg tus hais kom tej poj niam no ua li cas los muaj tag uas yog tej yam txawv cov lus cov poj niam no niam los yog pog qhia kom lawv ua.
Ntxiv ntawd los vim ib txhia poj niam tau tuaj ua lub neej tshiab tib leeg hauv teb chaws Australia thiab tsis muaj leej twg pab ces thiaj yuav tau ua txhua yam los pab lawv tus kheej. Ces thiaj yog ib cov kev nyuaj siab ntxhov plawv loj kawg nkaus rau lawv, vim ib txhiab hnoob nyoob tseem yau tab sis twb muaj ib tug me nyuam thiab tseem xeeb dua ib tug ntxiv hauv plab thiab.
Kuj tau muaj cov poj niam yug me nyuam txog li 25% tau yug me nyuam txij li xyoo 2015 uas tsis yog cov neeg tsiv teb tsaws chaws uas tsis tshua paub lus as kiv zoo thiab tuaj txawv teb chaws tuaj nyob teb chaws Australia no. Uas yog muaj cov xwm txheej no ntau tuaj ntxiv txog li 17% txij xyoo 2005 los txog tam sim no lawm.
Tsis tas li no ib txhiab tseem tau nqua hu kom cov midwife yuav tsum paub zoo txog tej poj niam neeg tsiv teb tsaws chaws los yog neeg thoj nam no tej kab lis kev cau thiab kom nrhiav neeg los txhais lus pab rau tej poj niam no thiab.
Professor Hannah Dahlen uas yog ib tu qhia txog fab txuj pab poj niam yug me nyuam ntawm txhooj faj lem Western Sydney University thiaj hais tias muaj ntau yam laj thawj qhia tau lawm tias tsim nyog muaj cov maternity services no hloov kho.
"Peb yuav tsum nco ntsoov los npaj tej dej num hais no kom nrhiav tau neeg txhais lus pab rau tej pojniam no. Vim yeej yog ib feem ntawm cov marternity care no thiab," raws li Professor Dahlen tau hais.
Sandra Elhelw Wright, ntawm lub koom haum Federation of Ethnic Communities Councils of Australia (FECCA), los kuj hais tis tej zaum cov neeg ua hauj lwm midwife xav tias cov poj niam no paub lus zoo lawm ces tsis tas nrhiav neeg txhais lus rau pab lawv.
"Wright tau hais tias' tab sis qhov tseeb tiag ces tej poj niam no yeej tsis muaj peev xwm siv tau lus av kiv zoo sib txuas lus nrog tej neeg ua hauj lwm tswj kev noj qab haus huv, vim muaj ib txhia lus siv rau cov kev kho mob uas lawv tsis nkag siab, thiab tsis paub piav tias seb lawv moog tau lawv lub cev li cas los yog puas muaj teeb meem cuam tshuam txog fab kev kho mob thiab tshuaj li cas rau lawv."
Tej hais no thiaj yuav tsim tau teeb meem phom sij tshwm sim tau rau tej poj niam no.
"Tej zaum kuj cov kev tsis paub lus thiab tsis muaj peev xwm sib txuas lus los yog totaub yuam kev rau lub caij ti tes ti taw uas tej kws kho mob yuav tau ua hauj lwm sib tw nrog caij nyoog ntawd kuj yuav ua rau muaj teeb meem pheej hmoo tau rau tej poj niam no,'' raws li Wright tau qhia.
Yog li lub koom haum FECCA thiaj tau qhia tias kom tsoom hwv Australia yuav tsum kub siab los tsim kom tau ib cov tswv yim los nrog xyuas cov poj niam ntawm ntau cov neeg zejzog coj kev cai dab qhua sib txawv thiab hais ntau hom lus no kom thiaj li tsim tau ib cov maternity services uas siv tau rau cov poj niam no thoob plaws teb chaws no kom tsis txhob muaj kev tus ncua rau cov services no lawm.
"Wright qhia tias peb yeej xav txhawb nqa kom tsim ib cov services tsi ntsees rau cov poj niam no tau siv thiab lees paub tias lawvxav tau cov kev pab cuam dab tsi thiab."
Professor Hannah Dahlen los kuj tau qhia tias kom xyaum cov midwife kom paub zoo txog lwm cov neeg tej kab lis kev cai kom tsis txhob muaj cov kev cais lwm cov neeg vim zoo li cov maternity services no tseem tsim los rau cov neeg Europe siv ntau xwb.
''Peb paub tias cov chaw yug me nyuam thiab cov kev yug me nyuam tom tsev ntawd feem ntau ces tseem yog cov poj niam neeg dawb uas khwv tau nyiaj nrab ntawd siv ntau xwb. Tab sis peb yuav tsum nug tias yog vim li cas thiaj zoo li ntawd? Thiab vim li cas peb ho tsis tsim kom muaj lwm cov kev xaiv rau cov services no uas tej poj niam coj ntseeg lwm cov kev cai thiab hais lwm hom lus uas tuaj lwm lub teb chaws tuaj nyob hauv Australia no muaj peev xwm siv tau thiab?'' raws li Dahlen tau hais.
Kuj tau muaj lub koom haum pab cuam hu ua Births for Human Kind hauv Melbourne no tau pab cov neeg tsiv teb tsaws chaw tuaj nyob tshiab hauv Australia kom paub zoo txog cov kev tswj kev noj qab haus huv rau tej ua niam hauv tebchaws Australia no.
Jen Branscombe uas yog tus program manager ntawm lub koom haum no tshab txhais tias lawv tau coj cov poj niam paub ntau hom lus los xyaum ua cov neeg ua hauj lwm yeem thaj coj los pab tej poj niam xeeb me nyuam no kom lawv txhob nyuaj siab thiab mloog tau tias tseem muaj neeg kub siab thiab pab lawv thiab.
"Peb cov neeg ua hauj lwm yeem thaj no yeej nrog tej poj niam xeeb me nyuam mus ntsib kws kho mob tom tsev kho mob raws li lawv tau teem kom cov neeg no ho pab qhia kom tej chaw kho mob nrhiav neeg txhais lus pab rau cov poj niam no, los yog siv sij hawm me ntsis tom qab ntsib kis kho mob tag lawv piav rau cov poj niam no tias yog li cas tiag. Vim thaum ntsib cov midwife thiab doctors ces lawv maj thiab hais lus ceev heev ces tej zaum cov poj niam no yuav tsis nkag siab,'' raws li Branscombe qhia.
Yog li nom tswv tseem yuav los txheeb xyuas cov tswv yim tsim cov maternity services no kom tiav rau nrab xyoo lub xyoo tshiab tom ntej no.#
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab Downloadthiab caum
