Tau muaj UN ib tsab ntawv cej luam ntawm lub koom haum tau raug coj los cej luam qhia tsis ntev los no, uas tau teev txog ntiaj teb cov kev teeb txheeb tshaj 6,000 tsab, ces lawv tau qhia tias, yog tias ntiaj teb txo tau cov kev kub kev sov txog 1.5 degrees ces tsis yog yuav tau txais txiaj ntsim rau ntiaj teb tej toj roob hauv pes hav zoov hav tsuag nroj tsuag xyoob ntoo xwb tab sis yuav tau txais txiaj ntsim rau txhua txhua tsav txuab zeej txuab sim tib si. Tsis li ntawd ces yuav muaj teeb meem loj heev rau ib txhia teb chaws. Ces thiaj li muaj neeg tau nqua hu kom tej lagluam thiab tej tsoom hwv yuav tsum tau ua tus ntaus thawj hlo los nrog daws cov teeb meem hloov quag ntuj no.
Tsab ntawv cej luam no kuj tau ua rau muaj pej xeem Australia coob leej ntau tus xav tau xav tswv yim tias, tej zaum cov neeg yuav khoom siv yuav muaj peev xwm los koom nrog daws cov teeb meem no tau. Tab sis tseem muaj ib txhia ntseeg tias tsim nyog tsoom hwv yuav tsum tau kub siab tshaj no thiab yuav tsum tau nqes tes kiag los nrog xyuas tej teeb meem no.
Lub koom haum IPCC tau qhia tias yog Australia tso tseg tsis txhob siv roj zeb ntsuam rau xyoo 2040 thiab ntiaj teb ho txo tau cov kev kub kev sov txog li 1.5 degrees ces, tej zaum tseem yuav pab cawm tau Australia cov paj pob zeb hiav txwv Great Barrier Reef thiab, tab sis yuav tsum yog ntiaj teb tej pej xeem yuav tsum tau muaj kev pauv hloov rau lawv txoj kev ua lub neej los yog tej cuj pwm ua lub neej loj heev mas thiaj li yuav daws tau tej teeb meem no.
Lub koom haum thiaj tau hais tias yeej muaj ntau txoj xub ke coj los daws tau ntiaj teb cov teeb meem kub sov no. Thiab txhua leej txhua tus yeej muaj feem xyuam los nrog pab daws tau tib si.
Lub koom haum IPCC tsab ntawv cej luam yeej tau qhia meej tseeb lawm tias, yuav tsum tau muaj ntau yam kev pauv hloov xws li tej neeg yuav tau nruab phiaj ziab tshav ntuj rau saum ruv tsev kom tau hluav taws xob siv, yuav tsum tau tig los siv tej peev txheej ntau yam tsis hais sab hnub, zog cua, pa kub pa sov (thermo energy), zog dej coj los tsim kom tau tej hluav taws xob huv uas tsis tso pa phem paug tsuas rau tej ib puag ncig siv, peb yuav tau siv cov roj tsheb huv dua tej niaj hnub siv, yuav tau siv cov tsheb siv hluav taws xob. Los sis yog thaum txog caij ntuj so, peb yuav tsum tau kaw tej qhov rooj qhov rais kom ntom nti kom peb tej vaj tse tsis txhob kub kub los yog sov sov thiaj tsis tau siv hluav taws xob ntau thiab thiaj yuav tsis tau them nqe hluav taws xob kim.
Ms Rictcher ntawm lub koom haum WWF tau hais tias tej neeg yuav khoom siv yuav tsum tau hloov lawv cov cuj pwm siv nyiaj. Vim lawv cov nyiaj yog ib lub zog tsub nias muaj zog heev rau tej lagluam kom kub siab los hloov thiab teeb cov hom phiaj thiab zeem muag kom siv tau ntev rau yav pem suab thiab kom tig los siv cov renewable energy source coj los tsim cov clean energy coj los siv thiab coj los ua ib cov tswv yim daws cov teeb meem hloov quag ntuj. Vim nyiaj nyob ntawm lawv tes thiab lawv yog cov yuav siv coj los pab kom tej lagluam loj hlob huam vam tau. Tab sis txawm li cas los, nom tswv yeej tsim nyog yuav tsum kub siab tshaj tam sim no los nrog daws cov teeb meem no.
Txawm tias lub koom haum IPCC tsab ntawv cej luam no yuav ua rau muaj neeg txhawj xeeb txog tej teeb meem huab cua kub sov, ntuj nqha teb nqhuab ntuj qhuav teb nkig, hav zoov kub hnyiab, dej nyab, hiav txwv tshoom siab tuaj lawm los, yeej tseem tsis tau ua rau tus tsoomhwv xeev Queensland yuav kub siab los tso tseg nws lub tsev yim txhawb nqa nws cov lagluam khawb peev txheej roj zeb ntsuam dab tsi li. Tsoom hwv Morrison los yeej tseem tawm los qhia tias nws twb txog tau cov pa phem (Emission) txog li 26% lawm thiab. Yog li ntawd, nws yuav tsis kho los yog yuav tsis muaj kev pauv hloov dab tsi rau nws tsab cai Renewable Energy Target rau xyoo 2020 lawm. Thiab Mr. Morrson tseem tau qhia ntxiv tias tseem muaj ntau lub teb chaws tsim nyog yuav tau kub siab los daws cov teeb meem no ntau tshaj teb chaws Australia lawm thiab.
Thiaj ua rau lub koom haum tus coj hu ua Glen Klativsky thiaj tau hais tias, tsoom hwv Australia tsis kub siab txog nws lub lub hauj lwm thiaj li ua rau nws tsis muaj peev xwm daws tau cov teeb meem hloov quag ntuj no. Nws tseem tau hais tias yog tej yam ua rau Australia poob ntseg muag kawg nkaus thiab, vim tsoom hwv Australia tseem xav tias yuav koom nrog lub ntiaj teb nyob tau li no txuas ntxiv thiab nws ho xav txawv ntiaj teb.
Yog li txawm twb txog xyoo 2018 no lawm los Australia tus tsoom hwv tam sim no yeej tsim tsis tau tsab cai National Climate Change Policy coj los siv li. Ces peb thiaj yuav tau haub thiab nqua hu kom nws yuav tsum tau thim xav los nrog daws cov teeb meem no ua ntej yuav muaj cov kev xaiv tsa tsoom hwv Australia tshiab rau tom ntej no.
UN kuj tau qhia tias cov teeb meem hloov quag ntuj uas ua rau ntiaj teb kub sov tuaj no, yuav tsim teeb meem loj heev rau ib txhia teb chaws xws li cov teb chaws pov txwv, cov teb chaws ntawm hiav txwv Mediterranean thiab cov teb chaws nyob thaj tsam qab hav suab puam Sahara ntawm nrim av Africa (African continent) uas tam sim no twb raug cov teeb meem no lawm haj yam yuav raug cov teeb meem no phem tshaj qhov no ntxiv thiab, yog tias ntiaj teb tsis kub siab los nrog daws cov teeb meem no tiag.#
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis download tau ntawm thiab ntawm iTunes los yog mloog tau ntawm tuaj koom ua tub koom siab thiab koom mloog tau tau ntawm #SBSHmong lub Facebook page tau.
