Australia lub koom haum tswj cov lagluam nyiaj txiag tab ntawv cej luam tshiab tau qhia tias nws txheeb tau ib cov teeb meem cuam tshuam txog Australia tej pej xeem cov kev siv credit card thiab tiv nuj nqe rau cov card no yog ib cov teeb meem txaus txhawj xeeb kawg nkaus li.
Lub koom haum The Australian Securities and Investments Commission (ASIC) tsab ntawv cej luam tshiab tau qhia tais muaj ib tug ntawm txhuam txhua 6 tus pej xeem Australia twg ces yeej tsis muaj peev xwm yuav them tau lawv tej nuj nqe credit card thiab ntshe yuav tsis muaj peev xwm them tau tej nyiaj no rov qab rau tej txhab nyiaj uas muab cov credit card no rau lawv siv li, ces thiaj yog ib cov teeb meem txaus txhawj xeeb loj heev rau cov neeg siv tej credit card no.
Beverley Ferguson uas muaj hnoob nyoog 70 xyoo tau pib muaj cov teeb meem nyiaj txiaj no txij thaum nws tus txiv tau nruam sim 10 lub xyoo dhau los. Thiab tej txhab nyiaj phej xa cov credit card tuaj rau nws lub tub txais ntawv ces txij ntawd los nws txawm pib siv cov credit card no ntau zuj zus, thiaj ua rau nws tiv nuj nqes ntau heev lawm.
"Ua rau kuv txhawj tiag tiag li ho. Kuv tsis paub tias xyov kuv yuav them tau cov nyiaj $10,000 rov qab rau lawv li cas, vim kuv yeej tsis muaj nyiaj li. Kuv yeej tau ntshai txhua ntxhau hnub thaum muaj neeg hu xov tooj tuaj los yog xov tooj nrov. Thiab kuv yeej paub tias txawm zaum no hu tsis tau kuv los lawv yeej yuav rov qab hu dua lwm zaus tuaj nrog kuv tham ntxiv thiab. Ces kuv thiaj tsis pom qab yuav ua li cas li lawm," raws li Ferguson tau qhia.
Ntxiv ntawd los nws thiaj tau mus sab laj nrog cov neeg paub txog fab nyiaj txiag kom nws rov qab muaj peev xwm ua tau nws lub neej li qub.
ASIC chief Michael Saadat uas yog tus coj ntawm lub koom haum ASIC tau hais tias "Kuv xav tias ib nqe tseem ceeb uas peb txheeb tau los ntawm peb tsab ntawv cej luam (report) no tau qhia rau peb lawm tias, txhua txhua ib tug neeg Australia ntawm 6 tus twg yeej tsis muaj peev xwm yuav them tau tej nqe credit cards rov qab raws li qhov tsim nyog. Qhov no txhais tau tias, lawv poob qab thiab them tsis tau tej nqe no raws caij nyoog teem kom lawv yuav tsum them, los yog lawv tsuas them tsawg tsawg thiab yuav tau them ua ntuv zus rau lub sij hawm ntev heev. Tsis tas li no tseem muaj ib txhia siv tag nrho tej nyiaj los sis cov credit uas daim card pub rau lawv siv ntawd lawm thiab. Thiab cov neeg uas muaj teeb meem them tsis taus cov nyiaj credit cards uas tseem tiv nuj nqes ntawd yuav tau them cov paj rau daim credit card lawv siv ntawd kim los yog siab heev thiab yuav tau them ntev heev."
Yog muab tag nrho tej nuj nqe los yog cov nyiaj uas tej neeg siv credit card coj los sib sau ua ke ces twb raug nyiaj txog li $45 tawv (billion) lawm. Tab sis ras li ASIC tau mus txheeb xyuas tag nrhov cov credit cards tshaj 21 roob (million) daim, ces tej neeg sawv daws kuj muaj lwm txoj hauv kev los pab kom lawv txuag tau cov nyiaj no txog li $621 roob (million) thiab.
Yog li no Christopher Zinn uas yog ib tug neeg pab cov neeg yuav khoom siv thiaj xav taw qhia kom sawv daws yuav tsum tau los ua tus tswj lawv ntiag tug cov kev siv nyiaj.
"Yus yuav tsum tau los ua tus tswj yus tus kheej cov kev siv tej nyiaj no lawm xwb. Ntxiv ntawd, yeej muaj cov credit cards uas Australia 4 lub tuam txhab nyiaj tseem ceeb nrog rau lwm cov txhab nyiaj yeej muaj rau sawv daws siv uas tsuas tau them nqe paj pheej yig li 8% ntawd xwb thaum yus siv tej nyiaj no yuav khoom, uas yuav zoo dua cov credit cards uas yuav tau them paj txog 21% diam. Yog li thiaj xav kom sawv daws yuav tau hloov mus siv cov credit card uas tau them nqe paj pheej yig kom tswj tau yus cov kev siv nyiaj txiag tsis yog yuav cia tej teeb meem no tswj yus tab sis yus yuav tsum yog tus tswj."
Ntxiv ntawd los kuj muaj xov xwm cej luam tias cov neeg siv tej credit cards no tseem muaj teeb meem thiab thaum lawv hloov ntawm cov credit card uas them paj kim mus siv cov them paj pheej ywg ntawd.
Txawm li cas los lub koom haum The Australian Securities and Investments Commission (ASIC) yeej xav thov los tsim kom tau ib cov cai los tswj cov credit cards no, thiab tsuas pub cov nyiaj tsawg tsawg rau tej neeg siv lawm xwb, thiab lawv yuav tsum tau them tej nuj nqe no rov qab rau lub tuam txhab muab daim credit card rau lawv siv kom tas rau lub sij hawm 3 xyoos lawm xwb. Yog tias nws tsim tau tej cai no los siv tiag ces yuav pib siv txij lub ib hlis ntuj xyoo 2019 no mus lawm.#
Listen more news in Hmong and English at SBS Radio Hmong Program on Thursday at 6pm AEDT-Australian Eastern Standard Time and Sunday at 11 am AEDT.
You can download SBS Radio App from App Store at and from Google Play at or you can download podcasts news in Hmong and English from . you can also listen to Hmong news on iTune at
Besides, you can follow us, click like, share and comments at #SBSHmong website at .
Call to have a chat with SBS Radio Hmong Program on + 61 3 9949 2259 or sent your comments to .
