Pajzaub Vaj (Pajau Vangay), yog Hmoob tug tug ntxhais yug hauv yeej thoj nam ntawm Thaib teb thiab tau mus au neej tshiab nyob teb chaws America los tau 40 xyoo no tseem sam sim kawm thiab lis nws cov kev teeb txheeb txog tej kab mob ntau yam hauv cov neeg tsiv teb tsaws chaws li Hmoob thiab Karen uas yog neeg Phabmab tej plab hnyuv seb puas yog tim tsis muaj tej kab mob bacteria ntau es thiaj ua rau lawv lub cev rog muaj ceeb thawj thiab muaj mob ntau yam.
Pajzaub yog ib tug neeg tshaj lij rau fab txuj zauv thiab kawm ua hauj lwm tam li yog ib tug computer science uas nws tau sau cov program coding thiab ua hauj lwm nrog Silicon Valley dhau los. Tab sis vim nws pom tau tias zoo li phab txuj no tseem tsis tau raug siv kom tau txiaj ntsim nthuav dav raws li qhov tsim nyog.
Ces thaum nws tau ntsib Dr. Dan Knights uas yog ib tug Computational biologitst thiab Dr. Kathleen Pera uas yog tus neeg kho mob tswj kev noj qab haus huv pab rau cov neeg tsiv teb tsaws chaw ntawm University of Minnesota, nws thiaj tau los koom cov kev teeb txheeb microbiome project kom kawm tiav PhD.
Mloog tau Neeb Thoj (Neng Thao) uas yog kawm Human Regenerate Biology ntawm Havard Unversity thiab Paj Zaub Vaj (Pajau Vangay) uas yog ib tug ntxhais Hmoob uas kawm Computer Science thiab tam sim no tab tom kaw PhD thiab teeb txheeb txog cov kab mob hauv tej plab hnyuv tawm tswv yim tias yog vim li cas thiaj tsim nyog txhawb nqa koj tej me nyuam mus kawm cov sob kawm Science, Technology, Engineer, Mathametics (STEM) tau ntawm no.
Dr. Kathlenn Pera yog ib tug cov neeg Hmoob pheej mus ntsib nws thiab yws rau nws tas li tias 'ua li cas tsim nyog peb tuaj nyob rau lub teb chaws vam meej muaj noj muaj hnav yuav pab kom peb tau txais kev noj qab nyob zoo tshaj qub tab sis haj yam ua rau peb mob ntau ntxiv tuaj xwb no, thiaj tau ua rau Pajzaub Vaj txiav txim siab los kawm PhD thiab los tsim cov kev teeb txheeb microbiome project nrog lub tsev kawm qib siab University of Minnesota los txheeb xyuas tias yog tim dab tsi thiaj ua rau cov neeg Hmoob thiab neeg Phabmab Karen lub cev rog muaj ceeb thawj thiab muaj mob tshaj cov tseem nyob ntuj qub qab.
Txij ntawd los nws thiaj tau los tswj cov kev teeb txheeb uas tau coj cov kab mob bacteria ntawm cov neeg no tej plab hnyuv mus tso rau hauv nas sim seb yog tim li cas.
Ces thiaj txheeb tau tias cov kab mob ntawm cov neeg Hmoob thiab Karen no tau ua rau cov nas uas coj los sim ntawd muaj teeb meem rau tej plab hnyuv. Qhov no txhais tau tais cov Hmoob thiab Karen nyob teb chaws America tsis muaj cov kab mob ntau yam hauv lawv tej plab hnyuv ces thiaj ua rau lawv tej plab hnyuv o, voos thiab ua rau lawv muaj mob tshaj yog piv rau cov tseem nyob ntuj qub qab ntawm Thaib teb.
Yog li thiaj yog thawj cov kev teeb txheeb tau muaj rau Hmoob thiab cov neeg Karen tam li yog cov neeg tsiv teb tsaws chaw no. Thiab cia siab tias tom qab tau txais kev pom zoo los ntawm tsev dawb lawm, tseem yuav muaj cov kev teeb txheeb no txuas ntxiv rau lwm cov neeg zejzog li Oromo, Latino, Somali, Nepali txuas ntxiv rau yav pem suab thiab.
Yam ob uas Pajzaub thiab nws cov neeg teeb txheeb tshawb tau thaum muaj cov neeg no txog 500 leej koom ntawd ces pom tau tias tau muaj kev pauv hloov thiab muaj cov kab mob bateria hauv cov neeg Hmob thiab Karen no tsawg dua cov nyob ntuj quab qab lawm. Thiab lawv nyob ntev npaum li cas ntawm teb chaws America ces haj yam ua rau lawv muaj cov kab mob zoo tib yam li cov neeg meskas dawb uas yog thaum los txheeb cov kab mob microorganism hauv tej plab hnyuv no xwb ces yeej tsis paub tias cov neeg no yog neeg tawv daj li lawm vim lawv tej plab hnyuv yeej zoo tib yam li cov neeg caucasian lawm xwb.
Pajzaub Vaj hais tias, txawm nws cov kev teeb txheeb tsis tau tshuaj ntsuam txog ntau yam tab sis nws ntseeg tias vim lub neej qub qab, ces Hmoob thiab cov neeg no yeej cog lawv tej zaub qoob loo noj thiab noj zaub ntau xwb tsis rau chiv, noj nqaij tsawg, khwv nce toj nqes taug thiaj ua rau lawv tau txais kev noj qab nyob zoo thiab muaj cov kab mob bacteria ntau yam hauv lawv tej plab hnyuv pab kom lawv tsis muaj mob, hos cov mus nyob rau teb chaws America ces txawm cev yiag thiab noj tej zaub mov li ib txwm noj los vim txawv tebchaws txawv ib puag ncig lub neej thiab txoj kev noj haus txawv ces tej qoob loos cog tau los yeej rau chiv, txawv tsis muaj ntau thiab noj nqaij ntau, noj zaub tsawg, noj qab zib daw ntsev thiab khub roj rau lub cev, ib txhia tseem tsis nyiam qoj ib ce kom tawm hw thiab nyob tsev xwb tsis mus hauj lwm, ces thiaj ua rau lawv lub cev muaj ceeb thawj cev rog thiab muaj mob ntau yam li mob ntshav qab zib ua yog ib hom ntawm ntau hom mob ntawd.
Ntxiv ntawd los Pajzaub Vaj kuj qhia ntxiv tias yeej tau muaj ib cov kev teeb txheeb ntau yam dhau los kuj tau qhia tias yog leej twg xav kom muaj ntau yam kab mob microbiome (microorganism bacteria) hauv lawv tej plab hnyuv ces yauv tsum tau noj ntau yam zaub mov uas muaj cov hlab (Fibre) ntawd thiaj yuav pab kom lawv tau txais kev noj qab nyob zoo.
Tab sis qhov tseem ceeb uas Paj zaub Vaj xav qhia, ces nws yeej xav kom tej neeg zejzog Hmoob ceev txuag Hmoob tej kev ua lub neej thiab tej khoom noj khoom haus uas yeej ib txwm noj xws li noj zaub ntau noj nqaij tsawg, nquag plias qoj ib ce kom tawm hw thiaj yuav tau txais kev noj qab nyob zoo thiab tsis tau ntau yam mob.#
Listen to SBS Radio Hmong program at on Thursday 6pm AEST (Australian Eastern Standard Time) and Sunday 11am AEST.
You can download SBS Radio App from App Store at and from Google Play at or you can download podcasts news in Hmong and English from . and listen to Hmong news in iTunes at
Besides, you can follow us, click like, share and comments at #SBSHmong website at .
Call to have a chat with SBS Radio Hmong Program on + 61 3 9949 2259 or sent your comments to .
