Lub koom haum Cancer Council cov kev teeb txheeb tsis ntev los no tau qhia tias Australia cov neeg muaj hnoob nyoog tsis tau ua exercise txaus.
Yog li ntawd yog peb xav kom peb tau txais kev noj qab nyob zoo thiab thxob mob cancer los yog mob lwm yam mob ces yuav tsum tau kub siab los exercise thiab noj tej zaub mov zoo pab rau peb lub cev.
Lub koom haum no qhia tias muaj ntau yam laj thawj xws li tsis muaj sij hawm thiaj ua rau muaj cov neeg mus koom cov kev teeb txheeb txog 61% qhia tias lawv thiaj tsis mua ua exercise. Ntxiv ntawd ces muaj cov teeb meem li tawm hw, mob ib ce thiab sawv hlwv rau lub caij exercise thiaj ua rau muaj cov neeg no txog li 14% tsis nyiam mus exercise. Thiab ho muaj txog 13% ntawm cov neeg no qhia tias nqe them mus siv gym kim heev ces lawv thiaj tsis exercise.
Lub koom haum Cancer Council tseem txheeb tau ntxiv thiab tias yot txhua tus pej xeem Australia tswj kom lawv lub cev txhob muaj ceeb thawj, nquag mus exercise thiab noj tej zaub mov zoo pab rau lawv lub cev rau lub sij hawm li 25 xyoos ntxiv tom ntej no ces yuav pab tau cov neeg tshaj 200,000 tus kom txhob mob cancer.
Los yog tias Australia yuav muaj peev xwm tiv thaiv kom tej neeg txhob mob cancer txog li 1800 tus rau txhua txhua lub xyoo yog tej neeg mus exercise ib plua (week) yam tsawg li 150-300 ntiag tiv (Minutes) raws li cov kev taw qhia tiv thaiv kab mob cancer ntawd.
Qhov zoo tshaj ntawd, lub koom haum no tseem tau qhia ntxiv tias tej zaum cov neeg uas twb mob cancer lawm nquag mus exercise ces kuj yuav tiv thaiv tau kom lawv txhob rov qab mob tau cov cancer ntxiv lawm thiab.
Wendy Watson ntawm lub koom haum Cancer Council tau tshab txhais tias tsim nyog tej neeg yuav tsum tau xyaum ib cov cuj pwm kom swm rau txhua hnub ntawm yus txoj kev ua lub neej xws li, xyaum taug kev mus tos caij tsheb me, nres tsheb kom nrug qhov chaw yus yuav mus kom tau taug kev me ntsis, los sis nrog yus tej phooj ywg taug kev me ntsis thaum noj sus ntawd.
Emmanuel Stamatakis uas yog ib tug zeskais (Professor) uas paub zoo txog cov hauj lwm Physical Activity thiab Lifestyle ntawm txhooj faj lem (Tsev kawm qib siab) University of Sydney tseem tau qhia tnxiv tias kom peb yuav tsum pom txog tej txiaj ntsim yuav tau txais los ntawm cov kev ua exercise no ntev ntxiv mus, tsis yog mus ua exercise me ntsis xwb es txawm siv xav kom yus yuag sai sai mas tsis yog li hais ntawd. Thiab xav kom peb yuav tsum nco ntsoov tias yog tsuas ua exercise nkaus xwb, tab sis ho tsis tswj tej zaub mov yus noj kom hauj sim los yog tsis noj tej zaub mov zoo muaj txiaj ntsim pab rau yus lub cev ces yeej pab tsis tau dab tsi li. Vim yeej tau muaj pej kum haiv ntau cov kev teeb txheeb tau qhia lawm tias tej neeg sawv daws noj zaub mov phem zuj zus tuaj rau ntau caum lub xyoo dhau los no lawm, ces thiaj ua rau sawv daws tsis tau txais kev noj qab nyob zoo thiab noj qab haus huv lawm. Yog li peb yuav tsum nco qab ntsoov tias yuav tsum tau kub siab txog ntau yam ua ke xws li tej kev noj zaub mov zoo muaj txij ntsim pab rau lub cev, noj hauj sim, coj cov cuj pwm zoo xws li txhob haus dej haus cawv txhob haus luam yeeb thiab nquag mus exercise no ua ke mas thiaj yuav pab kom peb tsis muaj mob.
