Ntsiab lus tseem ceeb:
- Yeej muaj cib fim ntau yam rau Australia tej neeg qhia ntawv uas yuav pab kom cov kev qhia ntawv yog ib co hauj lwm uas ua tau ntev rau tej neeg xaiv ua.
- Thiab yeej muaj ntau txoj xub ke yog tias koj xav ras los ua ib tug xibfwb qhia ntawv ntawm teb chaws Australia.
- Yog tham txog tej neeg tsiv teb tsaws chaw uas muaj txuj ci thiab paub ua hauj lwm lawm ces kuj tsuas nyog rau ntawm seb koj yog cov neeg tuaj ntawm cov teb chaws twg tuaj thiab koj ho xav ua hauj lwm rau lub xeev twg yuav ua cov txiav txim tias seb muaj txoj xub ke twg rau koj ras los ua tau ib tug lees kais qhia ntawv xwb.
Tej lees kais yeej yog ib tug txhawb siab, txhawb nqa kom tej tub kawm kub siab, thiab paub tau tej yam zoo rau tej tub kawm lub neej, thiab pab lub neej pem suab ntawm tej neeg ntiag tug, tej zejzog thiab teb chaws.
Australia ces yeej kub siab zuj zus tuaj ntxiv txog kev kawm tam li yog tej yam yuav pab tsim kom tau lub teb chaws zoo dua thiab tau txais kev vaj huam siab luag dua thiab kuj muab cov kev kawm no coj los ua ib cov kev txhawb siab rau tej neeg qhia ntawv thiab yog tej yam hauj lwm rau lwm tus neeg xav hloov los ua hauj lwm qhia ntawv.
Zena Dabaja ces yog ib tug coj uas tswj tej hauj lwm txheeb txog ib tug twg cov kev tawm tsis ua hauj lwm rau tej coj ntawm lub koom haum Chullora Network thiab kuj yog tus coj teej kawm tseem ceeb ntawm ntawm ib lub teej kawm highschool rau tej me nyuam ntxhais ntawm Sydney.
Nws los yeej yog ib tug lees kais uas paub qhia ntawv Askiv thiab keeb kawm rau NSW Department of Education txij xyoo 1995 los lawm.
Ms Dabaja thiaj qhia tias yog li cas nws thiaj xav los ua txoj hauj lwm qhia ntawv.
Nws hais tias "Kuv yeej muaj qee tus lees kais uas qhia tau zoo heev thaum kuv tseem yog ib tug tub kawm tseem yau rau lub caij loj hlob tuaj ces thiaj xav ua rau kuv nyiam kawm. Thiab yog tej yam uas pab tau kuv thiab kuv lub neej. Tab sis lwm yam ntxiv uas txhawb siab heev rau kuv kom ras los ua ib tug lees kais ces yog muaj cib fim ntau yam heev rau cov kev qhia uas yus muaj peev xwm pab tau rau tej tub kawm.''
Benny Ng yeej pom zoo.
Nws kuj yog ib tug lees kais uas kub siab qhia ntawv heev ntawm Melbourne. Nws yeej tau qhia physical education (PE) los tau ntev tshaj 14 xyoos ntawm Victoria tej teej kawm thiab qhia ntawv Askiv tam li yog hom lus ob ntawm Hong Kong.
Mr Ng ntseeg tias cov kev ua ib tug lees kais yog tej yam tseem ceeb, thiab yeej muaj ntau yam txiaj ntxim ua rau nws kub siab xav qhia kom zoo tshaj qub ntxiv.
Nws hais ntxiv tias "Kuv tau pom kiag ntawm kuv qhov muag lawm tias kev kawm muaj fwj chim pauv hloov tau ib tug neeg ntiag tug twg lub neej li cas lawm. Cov kev yog ib tug lees kais qhia PE tsis yog tias yuav muaj peev xwm pab tej me yes kom tau txais kev noj qab nyob zoo xwb tab sis tseem pab kom lawv tau txais kev kaj siab thiab.''
Cov kev muaj cib fim ntau yam ntawm Australia tej chaw qhia ntawv zej tsoom thaib qhia ntawv ntiav ua rau cov kev qhia ntawv yog ib co hauj lwm uas tej zaum yuav muaj peev xwm ua tau ntev. Credit: SolStock/Getty Images
Thaum nws tau xub pib qhia ntawv ces nws yeej tau qhia ib pab tub kawm ntawm ntau cov neeg zejzog sib txawv kom paub sib teev theev, suav ib tug tub kawm uas tsis tshua hnov lus zoo tab sis kuj yog ib tug tub kawm tshaj lij heev.
Ms Dabaja hais tias "Tus tub kawm ntawd kuj yog ib tug uas muaj txoj kev txhawb nqa zej tsoom cov kev kawm heev, yog ib tug muaj tsab peev xwm heev uas tag nrho tej tub kawm yeej tsis pom tias nws cov kev puas cev yuav yog tej yam ua rau nws tsis muaj peev xwm tiv thaiv kom nws tsis txhob muaj peev xwm koom tau cov kev kawm yam pub npo dab tsi li.''
Nws hais ntxiv tias nws pab tub kawm thiaj muaj peev xwm sib teev theev tau zoo heev rau cov kev sib tw. Tsis hais thaum twg uas tus tub kawm no tau sawv cev rau lawv lub teej kawm, ces nws yeej ua tau zoo tshaj qhov tej neeg ntaus nqe yuam kev rau nws lawm. Nws yog ib tug ua rau tej neeg hloov lawv cov kev xav rau lwm tus tias muaj peev xwm ua tau dab tsi los yog ua tsis tau dab tsi.
Cov kev qhia yog ib cov kev pab rau lub teb chaws
Ms Dabaja qhia txog qhov tseem ceeb ntawm lees kais lub luag hauj lwm ces yog qhia kom tej tub kawm muaj txuj ci thiab muaj kev paub, pab kom lawv kub siab kawm thiab txhawb nqa tias lawv muaj peev xwm ua tau dab tsi rau lawv lub neej pem suab.
Nws hais tias ''Kuv yeej ib txwm hais tias yus saib ntawm tej chaw me nyuam yaus ua si lawm ces, tej me nyuam yaus yeej yog ib cov zog peev xwm thiab yog ib co yuav muaj peev xwm ua tau ntau yam heev. Tej zaum ib tug twg kuj yuav yog Beethoven (Germany tus kws sau nkauj thiab paub piano nto npe tshaj plaws) txuas ntxiv thiab los kuj tau, los sis tej zaum kuj yuav muaj ib tug me nyuam yaus twg uas tseem tab tom zaum ntawm tej chaw ua sis yuav yog tus yuav muaj peev xwm kho tau kab mob cancer tau thiab.''
Professor Therese Keane, uas yog tus lwm coj lub tuam chav Faculty of Education ntawm tsev kawm qib siab Latrobe University yeej tau siv sij hawm tshaj 25 xyoos los txhawb nqa tej me nyuam ntxhais kom kawm tej txuj STEMs li Science, Technology, Engineering, thiab Mathematics. Nws hais tias cov kev qhia yog ib cov kev npaj lub hauv paus tseem ceeb ntawm lub teb chaws.
Ms Keane hais tias "Teej kawm yog ib qho chaw zoo rau tej me yes kawm raws li ib cov kev qhia twg. Txawm tias lawv raug teeb meem los kuj tseem muaj peev xwm tswj tau tej xwm txheej no, kom lawv thiaj totaub tias lawv tau ua dab tsi yuam kev, thiab kom lawv kawm los ntawm tej kev ua yuam kev ntawd.''
Mr Ng thiaj hais ntxiv tias tej lees kais yeej tau pab kom ib tug me nyuam twg tau muaj kev loj hlob thiab txhim kho ntau yam tsis hais pib txij li preschool mus txog rau high school thiab npaj tej tub kawm seb lawv ho xav mus ua dab tsi kawm dab tsi tom qab kawm tiav lawm.
Cov kev qhia ntawv yog ib cov hauj lwm tau ua ruaj thiab muaj kev nce qib
Yeej muaj ntau yam cib fim ntawm teb chaws Australia no tsis hais ntawm zej tsoom tej chaw qhia ntawv los yog tej chaw qhia ntawv ntiav uas ua rau cov kev qhia ntawv kuj yog ib txoj xub ke uas pab kom tau hauj lwm ua ruaj ntev thiab.
Li Ms Dabaja yeej hais lawm tias, tej lees kais uas tshaj lij thiab nyiam qhia ntawv yeej muaj ntau yam cib fim yuav muaj feem koom los ua hauj lwm tswj ib lub teej kawm twg.
"Yeej muaj ntau yam cib feim zoo yuav coj los txhawb nqa tej lees kais kom tau ua tej hauj lwm theem siab tshaj qub ntxiv, tsis hais yog los coj tej pawg neeg tswj kev noj qab haus huv, los yog ua cov tswj tej tuam chav los sis yog ua cov coj ib lub tuam chav uas qhia ib cov kev kawm tseem ceeb twg tsi ntsees thiab.
''Ces thiaj muaj ntau yam cib fim thiab ntau txoj xub ke, thiab yog tham txog cov kev kawm thiab xyaum ntxiv, los yeej ib txwm muaj ntau txoj xub ke yuav muaj peev xwm los ua cov hauj lwm qhia ntawv mus txog rau theem qhia ntawm tej tsev kawm qib siab thiab,'' raws li Ms Dabaja tshab txhab.
Nws hais ntxiv tias kuj yeej tseem rov qab muaj ib co program coj los qhia tej neeg ua hauj lwm rau tej lagluam kom muaj peev xwm los ua tau hauj lwm rau ntau cov tuam chav tswj dej num kev kawm li mathematics, computer sciences, sciences, los yog Technology thiab Applied Science (TAS) thiab.
Tej lees kais yeej muaj peev xwm qhia ntau ntau yam sob kawm uas qhia tau hauv online los sis yog qhia tim ntsej tim muag thiab.
Ms Dabaja hais ntxiv tias "Tsis tas li ntawd los peb kuj muaj ntau cov kev txhawb nqa kom koom tes nrog tej tsev kawm qib siab ntau lub thiab. Peb kuj tau koom nrog ntau cov research projects, thiab kuj muaj ntau cov professional learning ntawm ntau cov tsev kawm. Ces thiaj yog tej yam ua rau peb kub siab siab heev, yog tej yam txhawb siab rau sawv daws, thiab yog tej yam uas peb lub tuam chav npaj coj los pab rau zej tsoom cov kev kawm.''
Tej lees kais yeej muaj peev xwm qhia ntau ntau yam sob kawm uas qhia tau hauv online los sis yog qhia tim ntsej tim muag thiab. Credit: JohnnyGreig/Getty Images
Txawm tias tej lees kais tej nyiaj hli yeej khwv tau li qub rau ib ntus no yog piv rau lwm cov neeg ua lwm yam hauj lwm, los ntau yam cib fim pab kom tej neeg muaj peev xwm tau ua tej hauj lwm nce qeb zoo taj ntxiv li tau ua ib tug coj, tau ua cov hauj lwm qhia theem siab zog ntxiv kuj muaj peev xwm yuav pab kom lawv khwv tau nyiaj ntau ntxiv tuaj thiab.
Mr Ng tshab txhais tias "Cov kev qhia ntawv yeej pab kom yus tau ib txoj hauj lwm ruaj khov ua. Txawm lub caij lagluam tsis zoo li thaum muaj kab mob COVID los, raws li ntawm kuv kiag lawm, ces tsis hais ntawm Hong Kong thiab ntawm Australia li, kuv yeej tau pom tias yeej tseem muaj tej teej kawm xav tau tej lees kais qhia ntawv ntau heev li qub. Hais tsi ntsees rau ntawm Australia no ces tej lees kais qhia early childhood education thiab high school yog cov uas tseem xav tau tej lees kais heev.''
Ms Dabaja ntseeg tias cov kev qhia ntawv no yeej yog ib txoj hauj lwm ruaj heev. Yog thaum ib tug lees kais tau hauj lwm ruaj ua lawm thiab ua tau hauj lwm zoo lawm ces yeej muaj hauj lwm ntau yam heev ua. Txawm li cas los yog tej yam tseem ceeb yuav tau xyuas kom yus qhia tau zoo thiab ua tau tej hauj lwm raws li qhov tej teej kawm xav tau.
Nws hais ntxiv tias "Ces tej lees kais thiaj yuav qhia ntawv tag lawv ib sim neej, thiab yeej muaj cib fim ntau yam heev yuav raug txhawb nqa kom tau ua tej hauj lwm nce qeb zoo tuaj ntxiv kom tej lees kais ua tau tej hauj lwm lawv xav ua thiab siv tau tej txuj ci ntau yam.''
Cov kev ras los ua ib tug lees kais qhia ntawv ntawm Australia
Yeej muaj ntau txoj xub ke pab koj yog tias koj xav ras los ua ib tug lees kais qhia ntawv ntawm teb chaws Australia.
Lub vas sab yeej muaj ntau yam xov xwm qhia tias yuav ua li cas thiaj muaj peev xwm ras los ua tau ib tug lees kais ntawm Australia tej xeev thiab yeej muaj ntau txoj xub ke yuav los ua tau ib txoj hauj lwm qhia ntawv.
Li Professor Keane tshab txhais, ces ib txoj xub ke ntawm ntau txoj ces muaj peev xwm ua tau tom qab kawm tiav high shcool.
Nws hais tias ''Tej tub kawm uas kawm tiav xyoo 12 thiab tau kawm bachelor degree rau pab kev kawm ces yuav muaj peev xwm ua tau ib tug lees kais. Los sis kuj muaj lwm txoj xub kev rau yus xaiv los qhia ntawv thaum tseem kawm qib siab ntawd thiab, tsis hais yuav yog kawm science los yog kawm arts, ntxiv ntawd ces mam kawm Master of Teaching. Ces mam li ras los ua tau ib tug lees kais tom qab kawm tiav Master of Teaching lawm.''
Thiab nws kuj hais ntxiv tias yog tej neeg tsiv teb tsaws chaw tuaj txawv teb chaws tuaj uas muaj txuj ci thiab paub ua hauj lwm, ces tej txheej txheej ras los ua ib tug lees kais kuj yog yus tej qualification, thiab tsuas nyob ntawm seb yus yog cov neeg tuaj ntawm lub teb chaws twg tuaj thiab yus ho mus ua ib tug lees kais qhia ntawv nyob rau lub xeev twg ntawm Australia xwb.
Professor Keane thiaj taw qhia kom hu ncaj qha nrog lub tsev kawm qib siab ntawv tham thiab qhia tias seb yus ho muaj tej qualification dab tsi, los sis tej zaum yus kuj yuav tau nrog lub kom haum sawv cev rau tej lees kais ntawm lub xeev ntawd sab laj.
"Ntawm xeev Victoria no ces peb yeej muaj lub koom haum Victorian Institute of Teaching (VIT). Yog tias tej neeg xav ua hauj lwm tam li yog ib tug lees kais, los yog xav tias xav hloov lwm yam hauj lwm los qhia ntawv tam li yog ib tug lees kais, ces lawv kuj muaj peev xwm nrog tej teej kawm sab laj seb lawv tej degrees puas yuav muaj peev xwm hloov tau raws li tej cai ntawm lub koom haum VIT los yog sib npaug tib yam li ib lub xeev twg,'' raws li Professor Keane tshab txhais.
Australia tej sob kawm qib siab ua kawm txog cov kev qhia ntawv yeej txhawb nqa kom tej neeg kawm ua tau ntau yam hauj lwm thiab kom paub ntau yam txj ci thiab kawm tau tej txuj ci sib cuag sib txuas lus tau nrog lwm tus. (Getty) Credit: 10'000 Hours/Getty Images
Professor Keane hais tias, yog tias koj kawm tiav tsev kawm qib siab ces koj muaj peev xwm mus kawm bachelor rau sab seem qhia ntawv, li kawm cov sob kawm Bachelor of Education.
Txawm li cas los yog tias koj ho kawm tiav lwm yam sob kawm li Bachelor of Computer Science thiab ho tau txiav txim siab tias yus xav los ua hauj lwm qhia ntawv tsis xav ua hauj lwm hauv tej labolatory. Yog zoo li hais ntawd tiag ces, yuav yeej muaj peev xwm xaiv kawm Master of Teaching, uas tsuas kawm ob xyoos ntxiv rau yus cov degree uas yus xub kawm ua ntej lawm xwb.
Nws hais tias Australia tej sob kawm qib siab ua kawm txog cov kev qhia ntawv yeej txhawb nqa kom tej neeg kawm ua tau ntau yam hauj lwm thiab kom paub ntau yam txj ci thiab kawm tau tej txuj ci sib cuag sib txuas lus tau nrog lwm tus
Professor Keane tshab txhais tias dab tsi yog tej uas tej neeg xav kawm los ua lees kais yuav tau kawm rau lub caij tseem kawm.
"Lawv yuav tau kawm txog tej cwj pwm, kev vaj huam sib luag, cov kev pau siv computer, thiab paub txog Australia tej neeg txum tim tej kab lis kev cai. Tej no tsuas yog qee yam tsawg tsawg ntawm ntau yam uas yuav tau kawm txog xwb, tsis as li ntawd los lawv tseem yuav tau qhia hauv tej chav kawm thiab tsem yuav tau kawm ntxiv coj los pab rau lawv kom hauj yam paub qhia zoo ntxiv thiab. Ces lawv thiaj yuav qhia qee yam dab tsi rau lub caij uas lawv kawm siab tuaj ntixv, thiab yeej tau qhia ntau tuaj ntxiv txog rau thaum lawm tiav lawv cov degree,'' raws li Professor Keane tshab txhais.
Lub luag hauj lwm ntawm tej lees kais ntawm Australia tej neeg zejzog coj ntseeg ntau yam sib txawv ntawm teb chaws Australia
Ms Dabaja ntseeg tias tej lees kais ntawm ntau yam neeg sib txawv ntawm Australia no yuav coj ntau yam kev xav mus siv hauv tej chav kawm thiab yuav pab tau cov kev kawm ntau yam.
"Cov kev yog ib co neeg pawg tsawg tau txhawb nqa kom kuv ua tib zoo xyuas kom kuv tau qhia rau tej teej kawm uas tseem muaj ib txhia neeg txom nyem, vim yog tej yam tau txais txiaj ntsim zoo heev rau cov kev txhawb nqa kom tau txais vaj huam sib luag rau tej hluas uas tsis yog tej neeg nplua nuj thiab. Yog li ntawd thiaj yog tej yam tseem ceeb heev rau tej teej kawm.''
"Yog li ntawd cov kev totaub txog ntau yam sib txawv, totaub txog tej uas tej neeg xav tau thiab ntau yam teeb meem uas tseem muaj rau tej neeg ntau yam sib txawv, thiab cov kev ua hauj lwm nrog ntau pab neeg ntawm tej teej kawm, los pab rau tej tub kawm thoj nam thiaj yog tej yam tau txais txiaj ntsim ntau yam uas yus muaj peev xwm ua tau,'' raws li Ms Dabaja hais.
Tej lees kais uas yog ntau yam neeg sib txawv nyias yeej siv nyias ib cov tswv yim qhia sib txawv, vim muaj feem los ntawm lawv tej kab lis kev cai thiab tej uas lawv tau kawm, coj los qhia sib txwv thiab qhia raws li qhov lawv nyiam qhia.
Ms Dabaja hais tias tej lees kais kuj yuav yog ib tug uas pab tau tej leej niam leej txi thiab tej tub kawm zoo heev thiab.
Nws hais ntxiv tias "Vim yus yog tus yuav mloog tej lawv hais, thiab yog tus yuav taw qhia lawv yog tias lawv xav tau txais kev pab. Cov kev yog ib tug neeg ntawm ntau cov neeg sib txawv thiab ho tau qhia rau tej teej kawm muaj ntau yam neeg sib txawv kawm, ces kuj yog ib co kev sawv cev rau Australia tej neeg zejzog ntau yam. Thiab kuj yog tej yam zoo pab rau peb tej kev qhia ntawv thiab.''
Yog koj xav paub xov xwm ntxaws tshaj no ntxiv txog cov kev ua hauj lwm qhia ntawv ces muaj peev xwm mus txheeb tau ntxiv ntawm lub koom haum bethatteacher.gov.au.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
