Tom qab tau 7 lub xyoo uas teb chaws Askiv thiab teb chaws Askiv tau npaj ib cov nyiaj coj los pab nkawv tej lagluam me kom loj hlob huam vam tuaj lawm ces tseem hwv teb chaws Australia tau qhia tias nws xav tsim kom tau ib co hu ua Australian Business Securitisation Fund coj los pab Australia cov lagluam rau thaum yuav xaus xyoo 2019 no lawm thiab. Muaj xov xwm cej luam tias Australia cov hluas thiab cov neeg tsiv teb tsaws chaw uas ua lagluam me thiab nrab yog cov yuav tau txais txiaj ntsim.
Yog li ntawd tam sim no Treasurer Josh Frydenberg thiaj qhia tias yuav yooj yim zog rau cov lagluam no qev tau nyiaj coj los nqes peev thiab txhawb nqa cov kom lawv cov lagluam loj hlob huam vam tuaj ntxiv. Thiab tseem pab kom cov tuam txhab uas tsis yog cov chaw qev nyiaj nrog rau tej txhab nyiaj me muaj peev xwm sib tw tau nrog tej tuam txhab loj thiab.
Kim (Mister) Frydenberg tau hais tias tseem hwv Australia tseem yuav tau los sab laj nrog ntau cov tuam txhab lagluam xws li tej txhab nyiaj loj, cov tuam txhab tswj thiab coj tej neeg cov nyiaj super nqes peev lagluam nrog rau tej koom haum tswj cov lagluam nyiaj txiaj rau yav lig rau lub 11 hlis ntuj xyoo 2018 no tso. Yog tias tsim tau tsab cai los los siv raws siab xav ces tej lagluam me yuav qev tau nyiaj rau thaum yuav xaus xyoo 2019 no.
Tseem hwv Australia qhia tias cov nyiaj no yog tej nyiaj tau los ntawm Australia tej neeg ua hauj lwm uas them se rau nom tswv thiab raug siv coj los pab cov lagluam me thiab lagluam nrab no xwb.
Kate Carnell uas yog tus coj ntawm lub koom haum The Australian Small Business and Family Enterprise Ombudsman no hais tias vim cov Australia cov hluas thiab cov neeg tsiv teb tsaws chaw tuaj tshiab uas ua cov lagluam me thiab nrab ntawd yeej tsis muaj tsev, los yog tsis tsis muaj cov equity los sis tej nyiaj uas them tsev tag me ntsis ntawd txaus, thiab tej tsev los poob nqe lawm thiab ces lawv thiaj tsis muaj peev txheej mus xiab kom qev tau nyiaj los pab lawv cov lagluam, ces lawv thiaj yuav yog cov tau txais txiaj ntsim.
Chris Bowen uas yog tus tswj nyiaj txiaj rau pab nom Labor tau qhia tias nws tseem xav txheeb tej xov xwm kom ntxaws tso tias seb yog li cas tiag tso, yog tias tej nyiaj uas tsoom hwv xav npaj no ho yog ib cov yuav pab tau Australia tej lagluam tiag li hais ces nws yeej tuaj yeem yuav pab thiab txhawb nqa thiab.
Peter Strong uas yog tus coj lub koom haum the Council of Small Business kuj tau hais tias tsim nyog yuav tau muaj cov nyiaj pab cuam no rau tej lagluam no los ntev lawm.
Nws tau qhia tias muaj ib hnub nws coj nws tus dev mus taug kev hauv ib lub park hauv zos ces nws pom ib tug txiv neej qhia rau nws tias, tus txiv neej no ua cov lagluam tsim khoom uas siv nyiaj txog 25 roob dollars diam, thiab nws xav qev nyiaj coj los pab nws cov lagluam no, tab sis tsis muaj peev xwm qev tau nyiaj hauv teb chaws Australia no coj los nqe peev los yog pab nws tej lagluam, ces nws thiaj ua ib siab mus thov tau nyiaj ntawm teb chaws Askiv coj los pab nws cov lagluam lawm.#
