Tswv yim qhia kom Hmoob tej me nyuam kawm tau ntawv zoo thaum ntxov

Vim li cas Hmoob tej me nyuam thiaj tseem poob qab rau txoj kev kawm thiab ho teeb tsa lub koom haum Hmong Early Childhood Coalition (HECC) los ua dab tsi?

Npaub Vaj uas yog tus trainning director ntawm lub koom haum Hmong Early Childhood Coalition hais tias 'Txij xyoo 2005-06 ces tau muaj 3 tug founders tau teeb txheeb thiab pom tau tias Hmoob tej me nyuam tseem poob qab rau txoj kev kawm piv rau lwm haiv neeg, ces lawv thiaj tau pib lub koom haum Hmong early childhood summit, uas ib xyoos muaj ib lub conference caw tej Hmoob tej niam txiv thiab cov me nyuam mus kawm txog tias yuav ua li cas thiaj txhawb tau tej me nyuam.'

Tab sis raws li Npaub hais 'tej niam txiv tseem xav kom ua tau cov hauj lwm no nthuav dav tshaj ntawd thiab. Ces xyoo 2015 thiaj tau muab lub koom haum no tis npe tshiab hu ua Hmong Early Childhood Coalition tab sis tseem ua hauj lwm volunteer xwb tseem thov tsis tau nyiaj los pab lub koom haum no. Txog xyoo 2019 ces thiaj yog thawj zaug thov tau nyiaj ntawm nom tswv xeev Minnesota los pab lub koom haum no lis nws tej dej num.'

Txij thaum lub koom haum HECC tau ras los ua ib lub koom haum non-profit organisation (NGO) lawm ces nws kuj tau sib cuag nrog lwm lub koom haum early childhood centres kom kawm tau tej sob kawm lwm yam coj los pab nws lub koom haum thiab.

Credit: Hmong early childhood play (HECC)

Lub hom phiaj tseem ceeb ces yog lub koom haum no ces yog 'muaj cov kev cob qhia rau tej niam txiv, tej neeg tu saib xyuas thiab zov me nyuam thiab tej neeg qhia me nyuam uas qhia txog me nyuam tej kev loj hlob rau lawv kom paub, muaj cov program qhia txog culture identity, qhia lus Hmoob txij thaum yug los mus txog hnoob nyoog 8 xyoo,' raws li Npaub Vaj uas yog tus training director ntawm lub koom haum HECC hais.

Ms Npaub hais ntxiv tias 'lub koom haum HECC cov training program yeej pab kom Hmoob tej early childhood educators ntseeg lawv tus kheej thiab pom txog lawv tus kheej qhov tseem ceeb ntawm tej sob kawm uas lawv yeej muaj peev xwm qhia tau zoo pab rau tej me nyuam uas lawv qhia thiab.'

Yog tham txog tias vim li cas Hmoob tej niam txiv yeej tau ua neej nyob teb chaws Meskas tau ntau caum xyoo, yug ntawm lub teb chaws no, paub hais lus Meskas, thiab tau hauj lwm zoo ua tab sis vim li cas Hmoob tej me nyuam thiaj tseem poob qab rau txoj kev kawm, ces Npaub hais tias.

'Yeej tseem muaj teeb meem me ntsis. Muaj qee zaus ces tej niam txiv lawv yeej xav npaj thiab ua kom tau lub zoo neej ces tej zaum lawv tsis totaub los yog tseem tsis tau pom tias yuav tsum pib los yog yuav tsum qhuab qhia lawv tej me nyuam thaum tseem yau, tsis yog tos tias nws mus kawm ntawv ces nws yeej yuav kawm tau los yog tej xibfwb ntawm tsev kawm ntawv mam li qhia lawv xwb, tab sis tam li yus yog niam yog txiv ces yuav tsum tau pib qhia tej me nyuam hauv yus tsev ua ntej, ces tej no thiaj yog cov zem muag thiab lub hom phiaj ntawm peb lub koom haum (HECC) kom muab tau tej txuj ci no coj mus qhia tau rau peb cov niam txiv hauv Hmoob tej zejzog es lawv thiaj paub thiab pib txhawb lawv tej me nyuam thaum tseem yau lawm.'

Credit: Hmong kids play playdough in early childhood class (HECC)

'Hmoob tej me nyuam yeej tseem kawm poob qab pib txij li thaum kawm kindergarten mus txog rau thaum graduating high school hais tsi ntsee rau tej me myuam tub, ces peb lub koom haum thiaj caw tej niam txiv, tej coj ntawm Hmoob tej zejzog tuaj koom tawm tswv yim thiab nrhiav tswv yim tias vim li cas Hmoob tej me nyuam thiaj tseem poob qab rau txoj kev kawm thiab ho yuav pab tau lawv li cas.'

Tab sis Npaub kuj hais ntxiv tias 'tam sim no ces tsuas txheeb txog tej niam txiv ua ntej tso - vim lawv yog thawj tug xibfwb ntawm lawv tej me nyuam lub neej, tej kev txiav txim sib txhua yam yeej yuav muaj qhov zoo qhov tsis zoo rau lawv tej me nyuam - tab sis ntxiv tom ntej ces yeej xav hno tej me nyuam Hmoob tej suab qhia tias vim li cas lawv thiaj kawm poob qab, vim li cas thiaj tsis nyiam kawm ntawv los yog vim li cas thiaj tsis muaj kev txhawb rau lawv txoj kev kawm.'

'Txij tom qab muaj kab mob COVID-19 kis thoob ntuj los ces kuj pom tias zoo li tej me nyuam pib kindergarten los tsis tshua muaj cov social emotional skills li follow direction, mloog lus, nyob twj yim ib pliag, los sis muaj routine, thiab kuj pom tau tias muaj teeb meem nyuaj siab rau tej me nyuam ntau tuaj ntxiv lawm, tsis tas li ntawd los tej xib fwb ntawm tej teej kawm los kuj tsis tshua muaj tswv yim yuav los qhia thiab txhawb nqa tej tub kawm uas muaj tej teeb meem no. Vim rau qhov muaj ntau yam xav tau kev pab cuam hauv tej teej kawm thiab hauv tej chav kawm uas tsoom fwv tsis tshwm nyiaj pab, thiab ua rau tej xib fwb nyuaj siab rau tej no. Ces thiaj ua rau muaj ib txhia xib fwb pom tias tej hauj lwm no nyuaj dhau lawm, ua hauj lwm los khwv tsis tshua tau nyiaj ntau thiab, ces lawv thiaj pom tau tias lawv tsis xav ua tej hauj lwm xib fwb qhia ntawv no ntxiv thiab xav hloov mus ua lwm yam hauj lwm.'

Npaub kuj qhia ntxiv tias 'teb chaws Meskas los yeej muaj cov kev pab zov me nyuam tib yam li ntawm Australia thiab tab sis yog tej nkawm niam txiv khwv tau nyiaj ntau lawm ces yuav tsis muaj cai thov tau cov childcare subsidy siv ntxiv lawm, ces thiaj ua rau ib txhia niam txiv txiav txim siab nyob tsev zov lawv tej me nyuam zoo dua yuav mus hauj lwm kom khwv tau nyiaj los ua nqe ntiav lwm tus zov lawv tej me nyuam.'

Npaub hais tias 'peb xav kom peb lub koom haum Hmong Early Childhood Coalition yog ib lub koom haum muaj ntau yam resources thiab ntau yam kev cob qhia thiab tej xov xwm rau Hmoob tej niam txiv thiab Hmoob tej early childhood educators li early childhood, trauma, cultural identity thiab pab rau Hmoob tej zejzog.'

Mloog tau

SBS Hmong 

hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm

SBS Hmong Facebook

,

Google podcasts

,

Spotify 

thiab

Apple podcasts

. Download

 SBS Audio app 

thiab caum

SBS Hmong pod follow.