Poj niam Hmoob mus koom cov kev sib tw sib ntau Muay Thai

"Muay Thai yeej yog ib cov sports uas yuav tau sib ntaus tab sis tsis yog kev tsim teeb meem los yog tsim kev kub ntxhov lis peb feem coob xav. Tab sis yog ib co sports uas tau txais txiaj ntsim ntau yam ra peb xws li pab kom peb txhob nyuaj siab ntxhov plawv txhob txhob muaj kev txhawj xeeb, pab kom peb tau txais kev noj qab haus huv thiab pab kom peb muaj peev xwm tiv thaiv thiab pov puag peb tus kheej yog leej twg xav ua phem rau peb."

Npauj Thoj (Bao Thao) yog ib tug ntxhais Hmoob nyob ntawm lub xeev Minnesota teb chaws Asmesliskas (The United States of America-USA) tau qhia nws zaj dab neeg rau SBS Radio Hmong Program.

Npauj tau qhia tias yeej muaj neeg coob heev tseem xav tias cov Muay Thai tsuas yog ib cov sports uas yus ntaus lwm tus neeg kom swb xwb. Tab sis qhov tseeb tiag tsis yog li sawv daws xav ntawd. Nws tsuas yog cov kev siv ib cov txuj ntau yam coj los sib tw nrog lwm tus neeg seb leej twg txawj dua ces tus ntawd yog tus yeej xwb.

Saib tau daim yeeb yaj kiab thawj round thaum Npauj sib tw cov Muay Thai Pinweight Champ tau ntawm no: https://www.facebook.com/plugins/video.php?href=https%3A%2F%2Fwww.facebook.com%2Fbaorocks%2Fvideos%2F10161093860270061%2F&show_text=0&width=267

Txawm cov sports no yog ib cov yuav tau sib ntaus los yeej tau txais txiaj ntsim rau sawv daws thiab. Kom xav tias yog ib cov kev exercise thiab ib cov kev pab kom yus txhob nyuaj siab ntxhov plawv los yog txhob xav ntau tau thiab. Nws yog ib cov sports uas yuav pab kom peb tau txais kev noj qab nyob zoo thiab tseem pab tau peb tiv thaiv peb tus kheej thaum muaj neeg ntaus peb los yog xav ua phem rau peb ntawd thiab.

Npauj Thoj kuj tau yeej nws thawj cov kev sib tw Muay Thai amateur tournament lawm thiab tom qab uas tau mus saib nws tus txiv sib tw cov sports no los tau ntau xyoo. Ces nws tus txiv thiab tus coach thiaj tau hais kom nws mus sim cov kev sib tw no ces thiaj tau yeej ua thawj zaug lawm.

Hmong women in Muay Thai-Bao Thao, husband and coach-BaoThao Source: Courtesy of Bao Thao

Npauj hais tias nws tseem ua hauj lwm 9 to 5, tab sis yuav tau sawv ntxov thiab tom qab ua hauj lwm tas lawm yuav tau mus gym txhua txhua hnub thiab tseem yuav tau mus rau 2 hnub so (Weekend) ntxiv thiab. Ces thiaj yuav tau tso tseg ntau yam yus xav ua thiab muab yus lub neej txoj siab los mus xyaum tom gym mas thiaj yuav koom tau cov kev sib tw no xwb. Kuj tsis yog tej yam yooj yim kiag li thiab. Vim cov kev sib tw no yuav tau luj cev (weight) thiab sib tw raws cov kev muaj ceeb thawj ntawm 2 tug neeg ntawd xwb. Ces thiaj yog tej yam tseem ceeb heev yuav tau noj protein thiab zaub kom ntau ho noj carbohydrate los yog tej mov kom tsawg thiaj tswj tau yus cov ceeb thawj.

Npauj tau qhia tias nws tsuas xav muab cov kev sib tw Muay Thai no ua ib cov hauj lwm nws nyiam ua rau lub caij khoom xwb nws tseem tsis tau xav coj los ua ib co hauj lwm tam li professional figher tiag.

Hmong women in Muay Thai group photo-Bao Thao and team-Bao Thao Source: Courtesy of Bao Thao

Npauj Thoj kuj tau qhia tias nws zoo siab uas tau hnov thiab tau paub tias muaj ib tug ntxhais Hmoob Australia mus koom cov kev sib tw Muay Thai no thiab. Ntxiv ntawd nws kuj paub tias muaj ib tug ntxhais Hmoob nyob xeev Minnesota ntxiv uas yeej tshaj lij heev rau fab txuj tes taw Muay Thai no tib yam thiab.

Tab sis yeej tseem muaj poj niam Hmoob los yog Hmoob tej ntxhais tsawg heev mus koom cov sports no. 

Yog li ntawd nws thiaj xav txhawb nqa kom Hmoob tej poj niam thiab tej ntxhais yog leej twg nyiam raug los kom kav tsij mus koom cov kev sib tw Muay Thai no thiab, vim zoo li tsuas pom luag lwm haiv neeg koom xwb yeej tsis tshua pom Hmoob mus koom li.#

Mloog tau lwm yam xov xwm ntxiv ntawm SBSHmong los yog SBS Hmong Facebook page thiab mloog tau podcasts los yog xov xwm kaw ua suab tau thiab.