Yuav ua koj lub tsev li cas ntawm teb chaws Australia

Cov kev ua ib lub tsev ntawm Australia yeej yog ib txoj kev npau suav ntawm coob leej ntau tus neeg, tab sis ho muaj tej txheej txheem tseem ceeb dab tsi thiaj yuav pab ua tau? Txawm tias cov kev yuav ib lub tsev uas twb ua tau lawm tej zaum kuj yuav yog tej yam ua tau yooj yim, tab sis tej txheej txheem yuav ib thaj av thiab mam li ua yus lub tsev tshiab yog ib co uas yuav tau ua tib zoo npaj thiab yuav tau xyuas kom ntxaws. Nod yog tej txheej txheem qhia tias yuav ua li cas kom thiaj ua tau ib lub tsev ntawm Australia.

Ntsiab lus tseem ceeb:

• Koj lub tsev tshiab kuj yuav yog ib co project rau koj ua ib lub tsev los sis yog ib co qauv tsev uas tej neeg tsim tsev yeej kos tau duab thiab muaj tej qauv ua tsev lawm.
• Lub tsev loj thiab me los yog kho ib yam dab tsi yuav ua rau lub nqe tsev ntawm kim tuaj ntxiv.
• Koj muaj peev xwm thov kev tso cai kom koj ua tau tus neeg tswj thiab tsim koj lub tsev tau thiab.

Txhua txhua xyoo ntawm Australia ces yeej muaj tej neeg coob heev muaj peev xwm yuav tau ib qho chaw nyob raws li lawv txoj kev npau suav, tab sis cov kev yuav ib lub tsev uas twb ua tau lawm kuj tsis yog ib txoj xub ke xaiv uas ib txhia nyiam thiab. Tej zaum lawv kuj xav pib tsim kiag ib lub tsev tshiab raws li qhov lawv xav tau los yog muaj ntau yam raws li lawv nyiam.

Justin Hill ces yog tus coj uas tswj lub koom haum JSH Projects. Nws tshab txhais tias tom qab ib tug twg yuav tau ib thaj av lawm yuav tau ua dab tsi.

Nws hais tias “Koj yuav ib thaj av uas tseem tsis tau ua tsev tso. Ntxiv ntawd ces yuav tau thov kev tso cai los txhim kho thaj av ntawv, thiab thov daim ntawv pov thawj ua tsev, xyuas kom nrhiav tau ib lub tuam txhab ua tsev, ces txuas ntxiv ntawd mam li ua ib lub tsev rau thaj av ntawd.''

Yuav npaj li cas kom qev tau nyiaj

Cov kev xyuas kom qev tau nyiaj los siv ua ob yam - li yuav ib thaj av thiab ua ib lub tsev yuav pab kom ua tau tej txheej txheem ua tsev no yooj yim zog. Sandip Nagadiya yog ib tug neeg pab lwm tus qev nyiaj yuav tsev ntawm lub tuam txhab Centrum Finance Solutions ntawm Sydney. Nws thiaj taw qhia kom qev ob hom nyiaj no ua ke.

Nws hais tias “Peb yeej muaj peev xwm qev tau nyiaj yuav av thiab nyiaj ua tsev ua ke. Tej ntawd yog tej yam zoo. Tej txhab nyiaj feem ntau ces yeej pom zoo qev nyiaj yuav tsev rau lub caij 1 xyoos. Piv txwv li yog tias koj tau daim ntawv cog lus ua tsev (Construction contract) lawm, thiab koj tau ntawv tso cai ua tsev thiab muaj txhua yam ntaub ntawv txhij lawm, ces txhab nyiaj yeej yuav kam qev nyiaj rau koj.''

Mr Nagadiya los kuj hais kom yuav tau teev ib nqe ntsiab lus tias tsis pub nce nqe ua tsev rau ib lub caij twg, kom thiaj tau txais kev pov puag rau yus ntawm tej nqe nce uas yus tsis nco faj txog.

Nws hais tias “Xav kom yuav tsum tau ua tib zoo xyuas kom muaj daim fixed-price building contract. Txhais tias yuav tsum tau muaj ib nqe lus teev tias lub caij 120 hnub los yog 6 lub hli ntwd tsis tsim nyog nce tej nqe ua tsev...Nqe ob tuaj, ces tom qab uas them nqe av tag lawm, ces xav kom pib ua lub tsev kom sai npaum li sai tau, vim rau qhov yog tias yus ncua tsis ua lub tsev ntawd ntev npaum li cas ces yuav ua rau yus tau them paj kim npaum li ntawd ntxiv xwb.''

Xyuas kom qev tau nyiaj yuav av thiab nyiaj ua tsev tib si. Source: Moment RF / Andrew Merry/Getty Images

Thaum koj yuav tau ib thaj av lawm, ces kauj ruam tseem ceeb txuas ntxiv yog npaj tias seb yuav siv nyiaj npaum li cas los ua lub tsev.

Mr Hill hais tias cov kev sab laj kom ntxaws nrog ib tug neeg ua tsev yog tej yam tseem ceeb vim yuav ua tib zoo xyuas kom ua tau lub tsev raws li tej nyiaj npaj tseg yuav coj los siv. Kauj ruam no yuav pab lub kom tsis txhob tau them tej nqe tsis faj txog thiab ua tib zoo xyuas kom ua tau raws cov txheej txheej ua tsev yooj yim zog.

“Thaum koj npaj tau tus nqe yuav av lawm, ces koj yuav tau zaum nrog ib tug neeg tsim vaj tse tham thiab sab laj txog nyiaj txiaj tias seb yuav siv ntau npaum li cas coj los ua lub tsev. Kom yus tsis txhob siv ntau tshaj qhov tsim nyog siv.''

Yus yuav tsum tau npaj ib lub tswv yim kom pab yus tig tau cev me ntsis thiab, li yuav tau npaj tej nyiaj ua lub tsev kom ntau zog tus nqe tsev ntawd yam tsawg li ntawm 10 feem pua tsam tus nqe tsev ho kim tshaj qhov yus npaj tseg thiab.

Justin Hill, CEO, JSH Projects

Nws hais ntxiv tias "Qhov tseem ceeb tshaj plaws ntawm tej nyiaj ua tsev ces yog tej nyiaj npaj los siv ua lub tsev ua ntej yuav kos tau daim duab qauv plag tsev tiav.''

Ho muaj pes tsawg hom neeg ua tsev?

Raws li ib txwm pom ces yeej tsuas muaj ob hom neeg ua tsev ntawm Australia xwb: uas yog yus ua tsev raws li tej qauv tsev uas twb tsim tau lawm (Project home builder) thiab cov kev ua tsev uas yus yuav tau koom nrog lwm tus los tsim tus qauv ua tsev tshaib (Architecture home builders).

Mr Hill tshab txhais tias ''Yog tham txog cov kev siv tej qauv ua tsev uas twb tsim tau los siv lawm, ces tej tuam txhab yeej kos tau daim duab qauv plag tsev thiab ua tau lub tsev ntawd ntawm lawv tej vas sab thiab coj tuaj rau yus siv lawm xwb,''

"Tsuas yog tias yog daim duab ntawd thiab tus qauv tsim tsev ntawd haum rau yus thaj av uas yus yuav tau tsis hais seb dav li cas, luaj li cas ... puas yog nyob ntxhab los yog nyob chaw tiaj xwm yeem li cas xwb? Ces lawv yeej muaj ib co qauv rau yus xaiv tias seb yus nyiam hom qauv tsev zoo li cas ua rau thaj av ntawd.

"Tab sis yog yus xaiv txoj xub ke ob, uas yog koom kos thiab tsim tus qauv tsev nrog tus neeg kob duab tsim tsev los yog tus neeg ua tsev ntawd. Ces lawv yuav tsis muaj tej qauv duab plag tsev rau yus saib. Thiab yus yuav tau tsim lub tsev ntawd kom haum rau thaj av uas yus yuav ntawd.''

Tej nqe ua tsev yuav raug npaum li cas nyob ntawm seb lub tsev luaj li cas thiab yus ho puas ua kom zoo li cas ntxiv xwb. Source: Moment RF / Andrew Merry/Getty Images

Tsis hais koj xaiv siv tej qauv tsev uas twb tsim tau lawm cia li siv kiag xwb los yog cov qauv tsev uas koj yuav tau koom nrog archetect los yog ib tus neeg ua tsim los tsim li, yog koj ua koj lub tsev ntawd loj npaum li cas, ces tus nqe tsev haj yam kim npaum li ntawd xwb. Ces qhov loj me ntawm lub tsev thiaj yuav ua cov txiav txim tias yuav siv nyiaj ua tsev npaum li cas.

Mr Hill hais tias ''Yus yeej muaj peev xwm ua tej tsev hauj sim uas yog tej tsev ib nyuag me zog. Vim txhua tsav yam tsuas ua raws tej square metres xwb. Yog li cov nqe kim tshaj plaws ntawm cov kev ua ib lub tsev yog cov kev ua lub tsev kom loj tuaj ntxiv. Yog yus rub lub tsev ntawd cov square metres ntau npaum li cas ntxiv ces haj yam yuav ua rau tau them kim npaum li ntawd ntxiv xwb.''

Txawm li cas los kuj tsis yog cov kev loj los yog me ntawm lub tsev uas yuav ua rau koj lub tsev yuav ua rau yav pem suab kim. Tab sis cov kev xav yuav tej khoom zoo coj los ua lub tsev ntawd kuj yuav ua rau tus nqe tsev kawg kim tuaj ntxiv ntau heev thiab. Piv txwv li koj kho ib yam dab tsi, tej khoom koj siv coj los ua tsev, los yog tej twj coj los dhos rau lub tsev kuj yog tej yuav ua rau lub tsev ntawd tus nqe kim tuaj ntxiv thiab.

''Thiab raws li ib txwm pom ces cov kev ua ib lub tsev twg yeej muaj ib co kev xaiv rau yus ua kom lub tsev ntawd zoo zog tuaj ntxiv thiab. Tsis hais nruab tej twj zoo siv, tej kais dej zoo, los yog tag nrho txhua yam uas yus xav tau...Thiab lawv kuj muaj tej khoom uas zoo tshaj plaws rau yus xaiv siv thiab...uas yuav ua kom zoo txhua yam, li ua kev kom zoo nkauj, ua tsev ob tshooj, tab sis tej zaum kuj yuav ua rau koj tau them tus nqe ob npaug thaum ua tiav lawm. Tej no ces yog tej uas ib txwm siv coj los ua ib co tsev twg.''

Cov kev cia li siv tej qauv plag tsev uas tej tuam txhab tsim tsev uas twb kos tau lawm, yuav tau txais kev tso cai pom zoo sai dua thiab ua tau lub tsev ntawd sai dua thiab tsim nyog dua. Vim tej qauv plag tsev uas twb xub tsim tau ua ntej lawm feem ntau yuav pab kom txuag tau sij hawm thiab txuag tau tej nqe siv ua tsev rau tej txheej txheem ua tsev dua.

Mr Hill hais tias “Raws li ib txwm pom ces yeej xav kom tej neeg ua raws tus qauv duab plag tsev uas twb kos tau lawm xwb, uas ib lub tuam txhab twg yeej tau ua tej tsev ntawd los ntev lawm, vim rau qhov lawv yeej muaj lub qauv tsev ntawd lawm. Ces thiaj yuav tau txais kev tso cai los siv tau thaj av ntawd sai dua, thiab yog yus ho hloov/kho ib yam dab tsi hauv lub tsev ntawd ces yuav ua rau yus tau them kim tshaj qub ntxiv.''

Thiab txawm tias cov kev koom los kos tus qauv duab plag tsev nrog architect los yog ib tug neeg ua tsev yuav kim dua cov kev cia li siv tus qauv plag tsev uas twb kos tau lawm es cia li siv xwb. Los yog tom qab tuaj es yus ho xav kho/txuas ntxiv ces yus kuj yuav muaj peev xwm kho tau raws li qhov yus xav kho tau yam tsis tas yuav them nyiaj kim dab tsi ntxiv es mam li kho tau.

Cov kev cia li ua tsev raws li tus qauv duab plag tsev uas twb tsim tau lawm yuav pab kom ua tau lub tsev sai dua thiab yuav txuag tau nyiaj raws li qhov tsim nyog dua. Credit: courtneyk/Getty Images

Ua tus tsim yus lub tsev

Ntxiv ntawm cov kev koom nrog tej neeg ua tsev los ua yus lub tsev lawm, yeej tseem muaj lwm txoj hauv kev rau yus los ua kiag yus lub tsev thiab. Tab sis yuav tau thov daim ntawv tso cai ua tsev (Owner-builder license) kom yus thiaj muaj peev xwm los ua tus tswj thiab ua yus lub tsev, thiab pab kom yus muaj cai saib xyuas thiab koom tes nrog ntau cov neeg ua tsev los ua tej txheej txheem ua lub tsev. Lub tswv yim no yuav pab kom yus muaj peev xwm tswj tau cov project ua yus lub tsev no dua thiab tej zaum kuj yuav pab yus txuag tau nyiaj thiab.

Mr Hill hais tias “Koj yeej muaj peev xwm ua tau ib tug neeg ua koj lub tsev yog tias koj thov daim ntawv owner-builder permit. Kom koj thiaj muaj peev xwm los tswj cov kev ua koj lub tsev. Txawm li cas los koj yeej tseem yuav tau ua contract nrog tej neeg paub ua tsev los yog paub ua ntau yam tuaj pab koj ua koj lub tsev. Tab sis koj yeej muaj peev xwm ua tus ua txhua yam tau raws li daim ntawv tso cai owner-builder permit, uas muaj peev xwm thov tau ib zaug twg txhua txhua 5 lub xyoo twg thiab.''

READ MORE

Cov kev taw qhia tej neeg yuav thawj lub tsev: Yuav qev nyiaj li cas los yuav tsev ntawm Australia

Subscribe thiab mloog cov xov xwm Australia Explained kaw ua suab uas muaj ntau yam xov xwm tseem ceeb thiab tej lus taw qhia pab kom koj ua tau lub neej tshiab ntawm teb chaws Australia.

Yog tias koj muaj lus nug dab tsi los yog muaj ib lub tswv yim dab tsi ces xa email rau 

[email protected]

 

Mloog tau SBSHmong, 

rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm  

Facebook

,

 Googlepodcasts

, 

Spotify

, thiab 

Apple podcasts 

los yog download 

SBS Audio App 

thiab 

SBS Hmong pod follow 

kom koj mloog tau SBS Hmong.