Xov xwm luv tshaj tawm hnub zwj Quag (Tuesday news 25.03.2025):
Jim Chalmers uas yog Australia tus nom tswj nyiaj txiaj rau tsoom fwv Albanese hasi tias cov kev kho kom siv tau Medicare zoo yog ib co hauj lwm tseem ceeb rau hmo no uas nws yuav los qhia txog cov nyiaj puag xyoo 2025. Tsoom fwv Labor tau qhia tias ntshe tej nyiaj puag xyoo zaum no yuav poob peev thawj zaug txog li ntawm 17 txog 23 billion dollars, tab sis kuj hais tias yeej tau los ua tib zoo tswj kom tsim tau cov kev pab cuam tsim nyog thiab pab tswj tej lagluam rau lub caij ntiaj teb kub ntxhov no.
Angus Taylor uas yog tus nom tswj nyiaj txiaj ntawm lwm pab nom teb chaws tau nrog tej neeg xov xwm sib tham ua ntej tsoom fwv teb chaws yuav los qhia nws tej nyiaj puag xyoo. Nws hais tias pab nom Labor tsis muaj peev xwm daws ntau yam teeb meem muaj rau tej neeg Australia thiab liam tias nkim nyiaj, tsis tas li ntawd tseem cog lus tias yog nws yeej los ua nom tshiab ces nws yuav kub siab xyuas kom siv tau tej nqe gas thiab hluas taws xob thiab yuav rho 36,000 tus neeg ua hauj lwm rau nom tswv tawm.
Nom tswv Russia thiab Meskas tau xaus cov kev sab laj ntawm teb chaws Saudi Arabia uas muaj hom phiaj xaus tsov rog ntawm Ukraine. Kuj tham txog lwm yam thiab li tau muaj kev tsis sib dua ntawm Black Sea kom siv tau tej nkoj nrog.
Recep Tayyip Erdogan uas yog Turkey tus president hais tias Ekrem Imamoglu uas yog tus hau nroog Istanbul thiab yog tus coj lwm pab nom teb chaws CHP yuav tau los ris tej xwm txheej neeg tawm tsam coob heev no. Tau pib muaj neeg tawm tsam thoob teb chaws tom qab tau ib limtiam uas Turkey tau muab tus neeg uas yuav sib tw nom nrog nws txhom thiab liam tias nws lwg noj lwg haus ua tsis ncaj.
Meskas tus President Donald Trump hais ib co lus rau hauv nws phau Truth Social account tias nws yuav tsub se 25 feem pua rau tag nrho txhua yam khoom xa muag rau teb chaws Meskas rau ib lub teb chaws twg uas tseem yuav Venezuela tej roj thiab gas siv txim tim 2 lub 4 hlis ntuj 2025 no mus, vim nws piv tias lub teb chaws no tawm tsam Meskas heev.
Tej neeg tswj kev ruaj ntseg uas tau nrog lub chaw nthuav xov xwm Reuters tham tau hais tias Egypt tau npaj ib co tswv yim uas muaj hom phiaj rov qab los kho kom xaus tau tsov rog ntawm Gaza. Nom tswv kho mob ntawm Gaza qhia tias Israel cov kev siv dav hlau thiab tub rog nias tsam nruab teb tau ua rau muaj neeg raug tua tuag yamt sawg li 65 leeg ib hnub dhau los thiab twb muaj neeg coob tshaj 700 raug tua txij li Israel rov qab mus tawm tsam Gaza dua.
Tus hau txiv plig rau cov kev ntseeg Islam ntawm teb chaws Australia tau muab hnub tim 31 lub 3 hlis ntuj no ua hnub Eid-Al-Fitr xyoo no. Eid ces yog lub koom txoos ua rau thaum xaus lub hli dawb huv Ramadan uas tej neeg Muslim yuav tau yoo, pab tej neeg txom nyem thiab kub siab teev hawm thiab kom sib cuag tau nrog lawv tus tswv.
Meskas lub tsev dawb tau qhia meej tias tau muaj ib tug nom tseem ceeb ntawm President Trump cia li cia ib tug neeg nthuav xov xwm nrog nom tswv Meskas tham hauv group chat txog tej tswv yim yuav tawm tsam nrog cov neeg Huthi ntawm teb chaws Yemen uas Mr Trump hais tias yuav mus tua hnub tim 15 lub 3 hlis ntuj no.
Tau muaj Suav thiab Singapore ob lub tuam txhab yuav nqes peev tsim ib qho chaw tsim hluav taws xob ntawm xeev Sekong thiab xa tej hluav taws xob no uas raug nyiaj tshaj USD$1.4 billion raws li Tuoitre News hais.
Nomt swv xeev Attapeu kuj tau txeeb tau 20 tawm tus neeg ua hauj lwm rau nom tswv tej ntawv siv nyiaj uas muaj nyiaj txog li USD$2.5 million nrog rau ntau billion kis thiab ntau billion Dong raws li Vientiane Times tau tshaj tawm.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
