Xov xwm luv tshaj tawm hnub zwj Feej (Wednesday news 26.06.2024):
Lwm pab nom teb chaws no kuj tau siv lub caij uas tau muaj ib tsab ntawv cej luam tshiab los ntawm lub koom haum National Energy Market Operator tau cav tias tsoom fwv tsis kub siab los txhawb nqa cov kev siv gas raws li qhov tsim nyog coj los pab kom Australia hloov tau tej tswv yim siv los tsim hluav taws xob siv mus siv dua lwm yam tswv yim tshiab. Raws li tej xov xwm tshiab ntawm tsab ntawv cej luam tshiab no qhia ces Susan Ley uas yog tus lwm coj ntawm lwm pab nom teb chaws hais tias tsim nyog yuav siv gas coj los ua ib lub tswv yim pab cov renewable energy uas yog ib lub tswv yim pheej yig yuav pab tsim kom tau hluav taws xob pheej yig tshaj plaws rau tej vaj tse siv thiab tsim nyog siv ua ib lub tswv yim pab kom Australia tsis txhob tso tej pa tsis huv paug tsuas rau tej ib puag ncig ntxiv lawm.
Kuj tau muaj xov xwm qhia tias Julian Assange uas yog tus teeb tsa lub koom haum Wikileaks kuj tau mus tsaws dav hlau nyob rau ntawm Saipan uas nws tseem yuav raug coj mus hais plaub ntawm Meskas ib lub tsev hais plaub. Raws li tau muaj cov kev pom zoo ntawm nws pawg kws lij choj thiab Meskas tej tsev hais plaub ces Mr Assange yuav raug teem ib lub txim txhaum vim yuam Meskas tej cai nyiag soj xwm (Espionage Laws) thiab tau coj nom tswv tej xov xwm tsis tsim nyog qhia rau lwm tus paub coj mus nthuav tawm qhia rau zej tsoom.
Richard Marles uas yog Australia tus lwm thawj pwm tsav los kuj qhia tias Pab nom Labor cov kev xav rau nws tus nom Fatima Payman uas yog ib tug nom kis xeev qes no ces yeej tsis muaj teeb meem dab tsi ntawm nws pab nom. Ms Payman los kuj tsis ua raws li pab nom Labor tej lus tawm tswv yim thiab kuj tau mus koom nrog pab nom Greens mus tawm suab nqua hu kom tsev tsoom fwv los yog tsev kis xeev siab lees paub teb chaws Palestine rau cov neeg Palestinian.
Tam sim no ces teb chaws Suav tuam tshoj yog thawj thawj lub teb chaws uas coj tau ib co av nyob rau saum hli ntawm sab tsaus ntawm lub hli coj los rau ntiaj teb tom qab nws tau xa nws lub hnub qub cuav hu ua Chang-e 6 Lunar Probe no mus rau saum lub hli rov qab los rau ntiaj teb no rau lub limtiam no. Yog li no ces Suav tuaj tshoj lub hnub qub cuav no thiaj tau rov qab los rau ntiaj teb no ntawm sab qaum teb ntawm teb chaws Suav ntawm Mongolia. Thiab tau coj cov av nyob rau ntawm sab tsaus ntawm lub hli nyob rau ntawm South pole Aitken Basin ntawd rov qab los rau ntiaj teb los teeb txheeb.
Tus coj teb chaws Kaus Lim qab teb lub tuam txhab uas tsim cov roj teeb lithium battery tau los thov txim tom qab muaj hluav taws kub hnyiab loj ua rau muaj tej neeg ua hauj lwm 23 leeg tas sim neej. Kob hluav taws no tau kub ntawm ib lub chaw tsim tej roj teeb lithium batteries txog li 35,000 lub thiab nco pa ntom nti nco rau tshooj ob ntawm lub chaw tsim no ces thiaj ua rau tej neeg ua hauj lwm tsis hnov qab lawm.
Raws li UN ib lub koom haum uas tau mus tshuaj ntsuam txog cov xwm txheej tshaib nqhis hauv ntiaj teb no ces tau mus txheeb tau tias muaj tej neeg yuav laug txog li ntawm 500,000 tus los sis yog txhua txhua ib tug neeg ntawm tsib tug twg uas nyob ntawm Gaza Strip ces tam sim no ntsib cov xwm txheej tsis tau zaub mov ruaj noj. Yog li ntawd cov kev tshuaj ntsuam txog tej neeg cov kev tshaib nqhis hu ua Integrated Food Security Phase Classification [[IPC]] assessment ntawd thiaj li qhia hais tias cov kev los ua tib zoo xyuas kom muaj peev xwm xa tau tej zaub mov mus rau sab qaum teb mus rau Gaza rau thaum ntxov xyoo no kuj pom tau tias muaj peev xwm los daws tau tej xwm txheej tshaib nqhis. Tab sis tsab ntawv cej luam no hais tias yog tias kub siab tshaj no ntxiv los ua tib zoo xyuas kom muaj peev xwm xa tau tej zaub mov no kom sai coj mus pab ces yuav muaj peev xwm pab thim tau tej xwm txheej no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
