Xov xwm luv tshaj tawm hnub zwj Teeb (Thursday news 13.03.2025):
Kremlin hais tias nws tseem tos tej xov xwm ntxaws ntawm Washington txog cov tswv yim xaus tsov rog nrog Ukraine 1 hlis uas ntej yuav txiav txim siab seb yuav teb li cas. Lub caij uas Moscow tseem txheeb tej xwm txheej no, Russia tus President Vladimir Putin tau mus xyuas cheeb tsam Kursk thiab kuj muaj ib tug nom qhia tias Russia tej tub rog tau puav Ukraine tej tub rog tab lawm. Putin hais tias tej tub rog Ukraine yog ib cov terrorists txhaum cai raws li Russia tej cai.
Tej nom tiv thaiv teb chaws ntawm teb chaws Askiv, Fabkis, Germany, Italy thiab Poland kuj tau sab laj ntawm Paris tham txog cov hauj lwm ''Coalition of the Willing'' uas yuav los pab kom Ukraine tau txais kev ruaj ntseg ruaj.
Chris Minns uas yog New South Wales tus hau xeev tau los pov puag nws tus tsoom fwv cov kev muab tej tsev raug dej nyab xyo 2022 puas ntawm Lismore rhuav tom qab lub khaub zeeg cua Alfred uas tej neeg SES txheeb tau tias muaj ib co neeg mus nyob, vim nws hais tias yog tej tsev yuav raug kev phom zij tau.
Australia tus thawj pwm tsav Anthony Albanese tau cog lus tias yuav siv nyiaj $1 billion los kho txoj kab tsheb ciav hlau tshiab ntawm Western Sydney Airport mus rau tej zos sab nraum Sydney, thiab yog ib cov coj mus qhia rau tej neeg xaiv nom uas Labor hais tias pab kom muaj kev sib cuag tau rau thaj chaw Leppington thiab Bradfield rau lub tshav dav hlau. Mr Albanese hais tias ''yog ib co hauv paus txhim kho yuav ua rau yav pem suab uas tej zejzog thoob qab teb hnub poob Sydney xav tau, thiab pab kom tej neeg tau hauj lwm ua yav pem suab thiab sib cuag tau.
Rodrigo Duterte uas yog Philippines tus coj dhau los kuj tau xa ib tsab xo rau tej neeg txhawb nqa nws tom qab nws ua siab cia nom tswv muab nws txhom ntim dav hlau xa rau zejzog pej kum haiv lub chaw hais plaub International Criminial Court (ICC) vim tau liam txim tias nws muaj feem cuam tshuam nrog ''cov kev tawm tsam yaj yeeb txhaum cai'' uas ICC liam tias nws yog tus tsim, tshwm nyiaj thiab ntiav tej neeg mus tua tej neeg siv yaj yeeb, muag yaj yeeb txhaum cai uas thxuam leej tig neeg txoj cai (Crime against humanity).
Meskas tej neeg ua hauj lwm ntawm lub tuam chav US Agency for International Development kuj tau sau lawv tej twj tom qab tau ib hnub uas tsoom fwv Trump tau hais kom txiav cov nyiaj pab txawv teb chaws 90 feem pua thiab coj tej nyiaj no los pab teb chaws Meskas.
Meskas tus President Trump tau cog lus tias yuav tawm tsam nrog EU cov kev hawv yuav tsub se tariff 26 billion Euros rau Meskas tej khoom xa mus muag rau EU lub hlis tom ntej no. Nws hais tias nws yuav tsub se ntxiv yog tias EU tseem ua li nws hais thiab tom qab tau ntau teev uas Meskas tau tsub se 25 feem pua rau tej hlau thiab txhuas.
Canada tseem yuav tsub cov se tshaj AUD$32 billion rau Meskas tej khoom xav muag rau nws tom qab Meskas tau tsub seb 25% rau Canada tej hlau thiab txhuas, uas Canada hais tias ua pauj sib npaug.
Nom tswv Japan tseem npaj kho nws tsab cai kom siv tau cov nuclear power los tsim hluav taws xob siv txawm tias tau muaj tej xwm txheej lub chaw tsim hluav taws xob Fukushima tau tawg thaum muaj qav qeeg raws li Tuoi Tre News hais.
Thaib lub koom haum sawv cev rau tej neeg tsav dav hlau tseem npaj yuav coj Thaib lub tuam chav tswj dej num ntiav dag zog mus hais plaub vim liam tias nws tau ua txhaum ob tsab cai, uas txwv tsis pub ntiav tej kws tsav dav hlau teb chaws ua hauj lwm hauv teb chaws Thaib.
Grace Thao thiab Sophia Thao kuj yog ob tug ntxhais Hmoob ntawm Team Australia Ropearoos 140 tawm tus uas tseem npaj yuav mus koom ntiaj teb cov kev sib tw dhia hlua 2025 World Jump Rope Championship ntawm Kawasaki Japan yav lub lub 7 hli ntuj txuas rau thaum ntxov lub 8 hli ntuj xyoo 2025 no.
Kuj tau muaj ob tug poj niam neeg Australia tseem npaj yuav koom sib tw caij tsheb Fromula 1 Academy, uas yog ib co program tsim coj los txhawb nqa kom muaj tej poj niam coob tuaj ntxiv tau mus koom sib tw tsav tsheb rau tej keeb kwm 75 xyoos uas txiv neej tau sib tw los no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
