Pob yeeb yaj duab “Bucket list” yeej tau ua rau neeg ntiaj teb kub siab los ua yam lawv xav ua hauv lawv lub neej heev lawm.
Tab sis ntau yam yus xav ua kom yus ua tau lub neej tsim nuj ntawd ho yog dab tsi tiag?
Niaj hnub niam no ces tej neeg sawv daws yeej xav tias qhov tseem ceeb tshaj plaws ces yog cov kev tau mus ncig ntau lub tebchaws yus xav mus thiab tau pom tau paub tau ua dua ib yam dab tsi yog cov tseem ceeb tshaj plaws.
Tab sis yog koj xav los tsim kom ua tau lub neej tsim nqi thiab lub neej muaj kev zoo siab kev lom zem rau koj lub neej ntawm lub neej txhua hnub ntawd mas yuav tau ua tib zoo npaj thiaj ua tau.
Lub tuam txhab REST Industry Super cov kev teeb txheeb tsis ntev los no tau txheeb tau tias muaj cov pej xeem Australia hnoob nyoog tshaj 55 xyoo txog li 52% yeej tau npaj tias tom qab lawv so tsis ua hauj lwm lawm lawv xav ua lub neej li cas los yog npaj yuav ua dab tsi ntxiv.
Saib thiab nyeem tau lub koom haum Spaghetti traveller cov list seb koj ho tau ua tau pes tsawg yam lawm?
Lee Blume uas yog ib tug neeg pab tej neeg npaj kom paub ua lawv lub neej tshab txhais tias tsim nyog yuav tsum yog tej yam uas yus xav ua, xav sim ua kom tau, xav kawm kom paub thiab npaj kom tau nqes tes ua kiag tab sis tsis yog yuav ua tib lwm tiav xwb tab sis yog ntau yam uas yus ua tsis paub kawg tsis paub tag thiab ua ntev txuas ntxiv mus rau tom ntej.
Ntxiv ntawd los yeej muaj ntau phaum neeg muaj cov kev xav sib txawv thiab. Tham txog cov laus lawm ces yeej yuav tau niaj hnub mus ua hauj lwm kom tab tau yus lub cuab lub yig, lwm tus thiaj pom tau tias yus yog ib tug neeg tij lim kub siab ua yus lub neej tiag. Hos tej hluas tam sim no ces txawv qhov hais ntawd lawm, vim muaj cib fim ntau tsav ntau yam ces lawv thiaj yog cov uas npaj thiab nqes tes ua kiag lawm xwb lawv yeej tsis xav ntau li tej phaum neeg muaj hnoob nyoog uas tseem xav tias, puas muaj sij hawm, puas muaj nyiaj thiab puas yuav ua tau ntawd.
Yog muaj tej zaum koj tseem xav tias tsis pom qab yuav ua lub neej li cas lawm, ces xav kom koj qee sij hawm los zaum ib pliag, nrhiav cwj mem thiab ib phau ntawv los sau txhua yam ntawm koj lub neej uas koj xav ua kom tau raws li koj txoj kev npau suav tsis hais ua kom koj tau kawm thiab tau paub ib yam txuj dab tsi tshiab los yog ua ib yam dab tsi muaj txiaj ntsim pab rau tej neeg zejzog los tau los sis ua ib yam dab tsi kom muaj kev lom zem rau koj thiab koj tsev neeg los tau kom ho ua tau ib yam tsim nuj rau koj lub neej thiab tseg tau ib cov dej num tseem ceeb rau tej xeeb leej xeeb ntxwv tom qab los kuj tau.#
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis download tau ntawm thiab ntawm iTunes los yog mloog tau ntawm tuaj koom ua tub koom siab thiab koom mloog tau tau ntawm #SBSHmong lub Facebook page tau.
