Yog kawm kos duab puas nrhiav tau hauj lwm ua thiab khwv tau nyiaj siv

Making a living as an artist (Yer Za Vue) Source: Yer Za Vue

SBS Hmong

View Podcast Series

Get the SBS Audio app

Other ways to listen

Ib tug neeg kos duab puas yuav khwv tau nyiaj los pab nws lub neej?

Yer Za Vue (Ntxawm Vwj) yeej tau ua hauj lwm nrog lub tuam txhab Walt Disney dhau los, tab sis tam sim no nws kuj tau los qhia cov chav kos duab rau tej neeg paub kos duab, los yog neeg uas nyuam qhuav mus kawm kos duab uas muaj hnoob nyoog sib txawv tsis hais laus los hluas ntawm lub teej kawm Pacific College of Arts thiab nws ho tau teeb tsa ib lub tsev kawm qhia tej neeg tshaj li 30 leej uas nyiam los kawm kos duab lawm thiab.

Ms. Vue hais tias nws qhia txog tias seb yuav npaj kos duab li cas thiab yuav tsim daim duab ntawd li cas, los yog yuav kos duab li cas kom paub tias yuav kom kom tau daim duab kaj thiab tsaus li cas.

A Hmong girl in Hmong costume-The Pearl, oil on canvas (Yer Za Vue) Source: Yer Za Vue

Dua ntawm tej hais ntawd lawm, Yer Za Vue los kuj tseem tau kos tib neeg tej duab coj mus tso rau ntawm lub chaw the Arts on the Boulevard Gallery ntawm nroog Vancouver ntawm xeev Washington teb chaws America rau sawv daws saib 2 lub hlis txij tim 1 lub 11 hlis ntuj xyoo 2019 mus txog rau tim 28 lub 12 hlis ntuj xyoo 2019 no thiab.

Nws qhia tias lub hom phiaj ntawm cov kev kos duab coj mus tso rau sawv daws saib zaum no yog ib cov kev txhawb nqa tej neeg ko duab kom kos cov duab tib neeg coj mus tso rau sawvdaws tau saib rau lub sij hawm 2 hlis.

Nws thiaj li tau txiav txim siab kos 4 daim duab sib txawv uas kos nws tus ntxhais xeeb ntxwv thiab ib tug poj niam Hmoob hnav tsoos Hmoob nrog rau lwm tus thiab.

A Hmong women in Hmong costume-The Green Maiden, oil on canvas (Yer Za Vue) Source: Yer Za Vue

Ms. Vue hais tias muaj ntau hom arts los yog duab. Yog peb tham txog cov kev kos duab nkaus xwb ces yeej tseem muaj ntau txoj xub ke los ko thiab xws li kos duab raws li cov kev zoo siab los yog kev chim ntawm ib tug neeg txoj kev xav, kos raws li qhov yus pom, kos cov duab illustration uas yog tej duab uas draw, paint los yog luam rau tej ntaub ntawv.

Tab sis kuj nyob ntawm seb koj ho nyiam hom kev kos duab twg xwb thiab. Seb koj ho puas nyiam tej duab siv cov kob kos plooj plooj, los yog yuav tsum kos kom tau zoo tib yam li tus tib neeg tiag tiag, los yog nyiam kos ib yam khoom dab tsi, ib thaj chaw ib lub zos ib lub nroog los yog kos tej tsiaj txhu dab tsi uas koj xav kos los yog lwm tus hais kom koj kos rau lawv xwb.

Dua ntawm tej duab kos no lawm tseem muaj lwm yam arts ntxiv thiab xws li cov performing arts, visual arts, sculpture, ceramics, architecture, sculpture, literature, music, dance, theater, photography, thiab films.

A figurative art of an elegant young women, oil on board (Yer Za Vue) Source: Yer Za Vue

Tab sis yog peb tham txog cov kev kawm los kos duab no lawm ne hos puas yuav pab peb nrhiav tau hauj lwm ua los yog khwv tau nyiaj rau peb siv thiab. Nqe no Maiv Ntxawm Vwj hais tias yeej tsis paub tseeb tias thaum peb kawm tiav lawm ho puas yuav nrhiav tau los tsis tau hauj lwm ua li cas kiag.

Yeej tsis paub meej tias xyov thaum ib tug kawm tiav cov kev kos duab no lawm puas yuav ras los ua ib tug neeg kos duab nrhiav tau hauj lwm zoo ua thiab khwv tau nyiaj zoo li cas. Tab sis yog tias koj yog ib tug neeg uas nyiam cov kev kos duab no tiag tiag lawm, ces koj yeej muaj peev xwm siv tej txuj kos duab los ua ib cov hauj lwm qhia rau lawm tus kom paub kos duab thiab ho siv los ua ib txoj xub ke pab kom koj khwv tau nyiaj siv thiab. Yog li ntawd yeej muaj txoj xub ke yuav pab kom koj los ua tau ib tug kws qhia neeg kos duab, los ua cov hauj lwm kos duab ua cartoon animation los yog los kos duab xwb los tau. Tab sis qhov tseem ceeb tshaj plaws ces yuav tsum txheeb xyuas koj tus kheej tiag tiag tias seb koj puas nyiam thiab puas tshaj lij rau fab txuj no tiag tiag. Yog koj muaj peev xwm tiag lawm ces yuav tsum ua raws li qhov koj nyiam ua thiab yuav tsum ntseeg koj tus kheej tias koj yeej ua tau, thiab pub lub cib fim rau koj ua tej hauj lwm no, tsis txhob mloog lwm tus tej lus uas pheej thau koj zog ntawd.

A young women in blue hat, oil on board (Yer Za Vue) Source: Yer Za Vue

Thiab Ntxawm Vwj qhia tias yog koj nyiam fab txuj kos duab no tiag, ces thawj yam tseem ceeb tshaj plaws ntawd ces koj yuav tsum nyiam tiag tiag, txawm koj tseem tsis tau paub kos los yog paub me ntsis lawm los tsis ua li cas. Vim koj yeej muaj peev xwm mus nrhiav tau tej kws kos duab zoo los qhia koj los yog mus kawm tau ntawm tej teej kawm kos duab kom koj txawj kos tuaj ntxiv. Hos yog tias koj kawm tag es ho tsis raws li koj siab xav, los txhob tag kev cia siab thiab, ho mus koom tej koom txoos kos duab tso duab rau zej tsoom saib los sis nug thiab sib txuas lus nrog tej kws kos duab uas koj nyiam thiab thov kawm los yog ua lawv cov tub kawm kom koj kos tau duab raws li qhov koj ntshaw tau tib yam thiab mas thiaj yuav muaj peev xwm kos tau raws li qhov koj ntshaw thiab nyiam los yog qhov koj muaj peev xwm ua tau ntawd.

A variety form of figurative art display on the Nov 1st -Dec 28th 2019 at the Art on the Boulevard gallery in Vancouver, Washington, USA (Yer Za Vue) Source: Yer Za Vue

Tab sis yus ho yuav paub tau li cas tias yus muaj peev xwm rau fab txuj kos duab no? Ntxawm Vwj hais tias yuav tsum ua tib zoo txheeb xyuas yus tus kheej kom zoo zoo tias seb yus puas nyiam yam txuj no tiag tiag? Yog yus nyiam tiag lawm ces yeej tsis muaj dab tsi yuav txwv txiav tau yus txoj xub ke.

Ntxawm qhia tias, ib nqe tseem ceeb tshaj plaws thaum kuv hluas kuv yeej tsis nco faj txog tab sis thaum kuv muaj hnoob nyoog lawm thiab paub faj txuj kos duab thoob lawm, ces yuav tsum nco qab ntsoov coj koj tej txuj ci kos duab rov qab los qhia rau tej neeg zejzog koj tej txuj no nthuav dav txhob ploj thiab txhob plam yog tias ho tsis muaj yus lawm.

Figurative arts display at the back of a postcard

Figurative arts by Emily Schultz-McNeil, Joanne Shellan, Carrie Vielle and Yer Za Vue at the back of a postcard to display at the Art on the Boulevard gallery (Yer Za Vue) Source: Yer Za Vue

Ntxawm Vwj (Yer Za Vue) hais tias tam sim no mas zoo li Hmoob tej neeg zejzog yeej tseem tsis tshua kub siab txog cov kev kos duab no pes tsawg yog xam rau luag pej kum haiv neeg. Tab sis nws kuj zoo siab uas muaj Hmoob coob zujzus tig los tsim tej kev kos duab no ntau tuaj ntxiv lawm thiab. Tsuas yog muaj Hmoob tej neeg zejzog tsawg tsawg thiaj paub txog tej kev kos duab no los ntawm lawv tsev neeg li tej tub ntxhais tub nyab los yog ib tug neeg lawv paub uas paub fab txuj kos duab no xwb. Yog li ntawd zoo li thiaj tseem tsis tau muaj Hmoob tej neeg zejzog paub zoo txog fab txuj kos duab los yog cov kev kos duab no zoo. Tab sis cia siab tias ib hnub twg Hmoob tej neeg zejzog yeej yuav tig los kub siab txog cov kev kos duab no ntau zuj zus tuaj ntxiv xwb.