Mark Jones uas yog Australia tus ntxhais hluas 19 xyoos hu ua Bianca Jones txiv uas xav tias tej zaum nws tus ntxias tas sim neej cuam tshuam nrog cov taug methanol thaum mus ncig hauv teb chaws Nplog, uas yog ib tug ntawm 6 tus neeg txawv teb chaws uas tau tas sim neej (1 tug poj niam neeg Askiv, 1 tug txiv neej neeg Meskas, 2 tug neeg Denmark, nrog 1 tug ntxhais neeg Australia ntxiv rau Bianca Jones) tau siv lub cib fim uas nws tus ntxhais tas sim neej no los nqua ku kom nom tswv Nplog nrog ua tib zoo txheeb kom tau qhov tseeb tias yog tim dab tsi.
Nom tswv Nplog los yeej tau cog lus tias yuav xyuas kom nrhiav tau kev ncaj ncees thiab coj tau tej neeg ua txhaum coj los raug txim. Hnub tim 23 lub 11 hlis ntuj tsoom fwv Nplog thiaj tau xa ib co tub ceev xwm zos mus ceev ntau tus neeg tab sis kuj tsis tau tsub txim dab tsi rau lawv.
Mr Jones hais tias ''Kuv xav siv lub cib fim no nqua hu kom tsoom fwv Nplog ua tib zoo tshuaj ntsuam tej xwm txheej no, kom tsis txhob muaj tej xwm txheej no ntxiv rau lwm tus. Kuv tsis xav pam kuv tus ntxhais yam tag dawb tag do. Vim tej xwm txheej no yeej tau ua rau tej tub hluas thiab ntxhais hluas uas tsim nyog muaj peev xwm ntoj ncig, ua ntau yam ntawm lawv lub neej thiab tau txais kev nyab xeeb.''
Biance Jones thiab nws tus phooj ywg uas yog Holly Bowles hnoob nyoog 19 xyoos tib yam kuj tau ris hnab mus ncig teb chaws ntawm Southeast Asia thiab ntseeg tias nkawv tau nrog lwm cov neeg txawv teb chaws tau mus haus cawv ntwm ib lub tsev tos qhua ntawm Vang Vieng xeev Vientiane ntawm teb chaws Nplog uas tej zaum muaj tej taug methanol xyaw.
Thiaj ua rau Bianca tas sim neej tas sim neej rau hnub tim 21 lub 11 hlis ntuj 2024, thiab txuas ntxiv ntawv hnub tim 22 lub 11 hlis ntuj ces Holly kuj tau tas sim neej thiab.
Nom tswv Thaib tau qhia meej tias cov kev muaj taug methanol ntau heev hauv Bianca lub cev ua rau nws lub hlwb o thiab tas sim neej lawm.
Methanol ces yog ib cov taug chemical uas siv ua roj siv, ua tshuaj tua kab tua ntsaum, siv ntxuav xim, thiab tso ib yam khoom dab tsi kom yaj thiab yeej yog ib co taug rau tib neeg.
Tab sis yeej tseem muaj ib txhia teb chaws yeej muaj tej cai tswj cov kev siv tej dej caw tsis tshua nruj. Tsuas yog txhob txwm xyaw nrog cawv mas thiaj muaj tau tej taug no xwb.
Professor Alistair Hay uas yog ib tug kws paub zoo txog tej taug thiaj hais tias yeej muaj tej yam ntxwv sib txawv rau tej neeg thaum tau tej taug no.
Nws hais tias ''Nyias yeej muaj nyias cov yam ntxwv sib txawv rau tej taug no. Ib txhia ces muaj peev xwm ntxeem dhau tej taug no, vim peb lub cev tej enzymes muaj peev xwm lim tau tej taug no. Tab sis yog tau me me xwb, los sis yog tau ntau caum mililitres lawm ces kuj yuav raug kev phom sij rau tej neeg ntiag tug, txawm li cas los ib txhia kuj yuav ciaj dim txoj sia dua lwm cov neeg tau tej taug no thiab.''
Nws thiaj hasi tias cov kev tshem tej taug no tawm ntawm tus neeg ntawd lub cev ua ntej cov taug no yuav hloov ua lwm yam kuab yog tej yam tseem ceeb heev.
''Tsis hais cov kev kho/daws ib yam taug dab tsi li, cov kev xub kho kiag thaum tseem ntxov yuav muaj cib fim pab tau zoo tshaj plaws. Yog tseem veg ncua lig thiab ces thaum cov taug methanol no hloov ua fomeizoleo ces yog ib co tshuaj los sis yog ethanol lawm, yog li ntawd yog kho ntxov npaum li cas ces yuav pab tau zoo npaum li ntawd.''
Hau xeev Victoria thiaj hais tias ''yog tej kev nruam sim uas txaus tu siab tshaj plaws rau ob tug nxhais hluas zoo nkauj thiab kub siab lub ua lug neej uas tsuas mus ua ib yam dab tsi tseem ceeb ntawm nkawv lub neej xwb tab sis cia li raug tej xwm txheej puas tsuaj uas ua rau sawv daws nyuaj siab heev no.''
Txawm yeej tseem muaj cov kev ntoj ncig txuas ntxiv ntawm lub zos Vang Vieng uas yog ib thaj chaw neeg ntoj ncig pej kum haiv nyiam mus ncig heev, los tej xwm txheej no kuj tau ua rau tej neeg ntoj ncig coob leej ntau tus yuav tau xyuam xim ceev faj.
Tau muaj ib tug neeg ris hnab ncig teb chaws uas tseem tab tom ncig hauv Nplog teb hais tias ''Kuv xav tias muaj teeb meem rau cov kev ris hnab ntoj ncig me ntsis lawm. Vim ib tug twg yeej xav kom lom zem rau lub caij lawv ntoj ncig, uas tej zaum yuav ntsib ib co neeg tshiab ntawm tej tsev tos qhua twg, los yog yuav haus dej cawv nrog ib cov neeg tuaj thoob ntuj tuaj...tab sis tam sim no kuv yuav tsis ua li ntawd lawm vim cov xwm txheej tau no.''
Ces ob yim neeg Australia no thiaj tseem tab tom npaj yuav coj lawv ob tug ntxhais rov qab los ua kev cai thiab sib fi ua zaum kawg rau nkawv lub neej uas raug tej xwm txheej no ua rau nkawv tsuas ua tau lub neej luv luv lawm xwb.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau los yog caum
