Mloog tau zaj xov xwm nod ntawm no:
LISTEN TO
Tej zaum Australia tej neeg so tsis ua hauj lwm yuav ras los ua cov neeg nplua nuj tshaj plaws hauv ntiaj teb
SBS Hmong
28/02/202511:26
COV NTSIAB LUS UAS THEEJ TAWM NTAWM ZAJ XOV XWM COJ LOS SAU UA NTAWV:
Yeej muaj ib cov pawg neeg twg ntawm ntau pawg neeg yeej xav txog lawv tej nyiaj uas npaj tos cia siab rau thaum so tsis ua hauj lwm dua lwm pawg neeg.
Yumi Lee uas yog tus coj ntawm lub koom haum Older Women's Network New South Wales los kuj tau txais tej xov tooj hu rau nws lub koom haum ntau zuj zus tuaj ntxiv ntawm tej poj niam muaj hnoob nyoog uas ntsib kev txom nyem. Nws hais tias:
Tej poj niam muaj hnoob nyoog dua ces thaum so tsis ua hauj lwm lawm yeej muaj tej nyiaj superannuation tsawg dua txiv neej tej txog li ntawm 25 feem pua. Tab sis qhov uas ua rau peb txhawj xeeb heev ces yog qhov tias tseem muaj lwm cov poj niam uas muaj hnoob nyoog lawm uas yeej tsuas muaj tej nyiaj super tsawg heev los sis twb tsis muaj nyiaj super hlo li thiab.Yumi Lee, Chief executive of Older Women's Network New South Wales
Ces thiaj ua rau tej poj niam no yog cov neeg tsis tau txais txiaj ntsim vim tseem muaj tej xwm txheej tej poj niam khwv tau nyiaj tsawg li keeb kwm tau teev tseg thiab, vim muaj ntau yam cuam tshuam rau lawv tej hauj lwm thiab zoo li lawv los pheej yog tej neeg uas ua hauj lwm part-time ntau dua xwb.
Vim cov kev muaj nyiaj super tsawg thiaj ua rau muaj tej poj niam muaj hnoob nyoog lawm coob heev tos tej nyiaj Age Pension uas yog tsoom fwv ib co nyiaj them rau tej neeg so tsis ua hauj lwm ntawm Australia no pab lawv xwb.
Ms Lee hais tias vim tej poj niam yeej khwv tau nyiaj tsawg ntawm lawv lub neej thiab tau nyiaj superannuation tsawg, ces thiaj ua rau coob leej ntau tus poj niam muaj hnoob nyoog tsis muaj peev xwm ntiav tsev nyob los sis tsis muaj nyiaj txaus coj los siv them tej nqe ua lub neej txhua hnub.
Yog tej yam zoo uas yeej muaj ib co neeg muaj nyiaj superannuation txaus siv thaum so tsis ua hauj lwm lawm, kom lawv thiaj muaj peev xwm ua tau lub zoo neej. Tab sis yeej tseem pom muaj tej poj niam muaj hnoob nyoog ntau zuj zus ntxiv tuaj yog cov uas thaum so tsis ua hauj lwm lawm yog cov txom nyem thiab.yumi Lee, Chief executive of Older Women's Network New South Wales
Ces thiaj tseem muaj tej xwm txheej uas tau tej nyiaj super tsis sib npaug no rau lub caij uas teb chaws Australia tej neeg so tsis ua hauj lwm yuav ras los ua ib co laus neeg uas nplua nuj tshaj plaws hauv ntiaj teb.
Raws li tau muaj ib cov kev teeb txheeb tshiab qhia ces txawm tias Australia tsuas muaj pej xeem tsawg xwb, los Australia tej nyiaj npaj tseg kom tau siv rau lub caij so tsis ua hauj lwm ua rau Australia ib txhia neeg so tsis ua hauj lwm yuav ras los ua cov neeg nplua nuj tshaj plaws hauv ntiaj teb ua zum 2 (Thib ob) rau thaum ntxov xyoo 2030s txuas ntawm teb chaws Meskas thiab.
Thiab raws li Misha Schubert uas yog tus coj lub koom haum Super Members Council uas tau ua cov kev teeb txheeb hais ces twb vim yog Australia muaj cov superannuation system siv. Nws hais tias:
Australia tau tsim tau ib co system uas ua rau ntiaj teb khib heev, vim tau pab kom ntau millions tus neeg Australia hais tsi ntsees rau tej neeg uas khwv tau nyiaj tsawg thiab tsuas uas tej hauj lwm uas khwv tau tej nyiaj tsawg tshaj plaws raws li qhov tsim nyog khwv tau ntawd muaj cib fim txuag tau nyiaj yam tsis muaj peev xwm yuav xub txuag tau ua ntej uas yuav tsim cov system no siv 32 xyoos dhau los.Misha Schubert, Chief executive officer of Supers Members Council
Ms Schubert ntseeg tias Australia tej nyiaj superannuation uas ntau heev no tsis yog tias yuav tau txais txiaj ntsim rau tej neeg ntiag tug xwb tab sis tseem yuav pab kom Australia muaj peev xwm siv coj mus nqes peev txawv teb chaws thiab. Nws hais tias:
Tej nyiaj no thiaj pab kom Australia muaj fwj chim thiab tau txais kev ruaj ntseg hauv ntiaj teb vim tej nyiaj no yog ib co nyiaj khaws cia ntawm tej chaw uas ntseeg tau siab, tsis tas li ntawd los Australia kuj yog lub teb chaws tiaj tus tau txais kev ruaj ntseg thiab, ces thiaj ua rau muaj cib fim ntau heev rau ntiaj teb xav tuaj nqes peev lagluam, ces thiaj pab kom Australia tau txais kev ruaj ntseg ntau tuaj ntxiv hauv ntiaj teb thiab pab kom peb muaj fwj chim hauv ntiaj teb.Misha Schubert, Chief executive officer of Supers Members Council
Limtiam no ces kuj muaj ib pab neeg sawv cev ntawm Australia cov tuam txhab lagluam superannuation funds yuav mus rau teb chaws Meskas mus koom lub rooj sab laj txog cov kev siv tej nyiaj super nqes peev (Superannuation Investment Summit) uas cia siab tias yuav muaj cib fim ntau yam tshiab rau tej lagluam no.
Tab sis tej koom haum uas txhawb nqa tej lagluam no thiab tej economists yeej tau qhia txog lawv cov kev txhawj xeeb tias xyov tej neeg Australia ua lub neej txhua hnub puas yuav tau txais txiaj ntsim los ntawm Australia cov Superannuation System.
READ MORE
Poj niam cov nyiaj superannuation
Dr Greg Jericho uas yog tus Chief Economist ntawm lub chaw teeb txheeb Australian Institute hais tias, cov superannuation system uas muaj siv tam sim no yeej tsis tshua tau txais txiaj ntsim ntau yam rau zej tsoom, tab sis tsuas yog ib cov system uas pab ''txo se kom tsawg'' rau tej neeg Australia nplua nuj xwb. Nws hais tias:
Peb paub tias cov kev txo se rau tej nyiaj superannuation no yog tau tsim coj los txhawb nqa kom tej neeg txuag nyiaj kom tau nyiaj rau lawv siv thaum so tsis ua hauj lwm lawm kom muaj neeg tos siv cov nyiaj laus (Age Pension) tsawg. Tab sis raws li peb paub ces tam sim no tej kev txo se no tau ua rau poob nyiaj ib xyoos twg txog li $56 billion, thiab yeej muaj tej nyiaj no ntau tshaj li ib feem peb, los sis yog txog li 20 billion ib xyoos twg yog tej nyiaj tau rau tej neeg plua nuj tshaj plaws 10 feem pua xwb, tej neeg no ces yog cov uas yeej tsis muaj cai tau nyiaj laus (Age Pension) siv li.Dr Greg Jericho, Chief Economist of the Australian Institute
Tau muaj ib tsab ntawv cej luam (Report) uas Dr Jericho tau koom sau tsaib no lub 10 hli ntuj tau qhia tias, tsuas muaj 22.8 feem pua ntawm tej neeg Australia so tsis ua hauj lwm lawm yog cov ua lub neej txom nyem yog piv rau teb chaws Sweden ces tsuas muaj tej neeg no txog 11.1 feem pua thiab piv rau Norway ces tsuas muaj txog li 3.8 feem pua xwb.
Dr Jericho thiaj qhia tias txog caij lawm uas yuav tau kho tej system uas tswj peev txheej npaj rau lub caij so tsis ua hauj lwm no. Nws hais tias:
Ib yam ntawm ntau yam uas peb muaj peev xwm ua ces yog, thawj yam ntawd, peb peb yuav tau los txo tej kev txo se tsawg rau tej nyiaj superannuation no thiab yuav tau nce cov nyiaj Age Pension. Thiab qhov ntawd yog ib co tseem ceeb uas peb yuav tsum tau ua. Thiaj tsim nyog yuav nce tej nyiaj Age Pension kom ntau dua tam sim no. Tsim nyog yog tej yam uas peb tsis txhob xam tias yog ib co nyiaj pab kom peb ua tau lub neej xwb tab sis yog tej yam uas pab kom peb ua tau lub zoo neej rau thaum so tsis ua hauj lwm lawm, tsis yog tias pheej ua li peb tej system muaj siv tam sim no uas peb hnov tas mus li tias tsuas kub siab txog tej neeg uas yuav tau txais txiaj ntsim ntawm cov kev tau them se tsawg xwb tab sis yeej tsis tau txais txiaj ntsim se dab tsi rau tej neeg ntiag tug uas npaj nyiaj tseg kom yus tau siv rau lub caij so tsis ua hauj lwm li.Dr Greg Jericho, Chief Economist of the Australian Institute
Wayne Strandquist ces yog tus Chief Advocate rau lub koom haum Australian Independent Retirees, uas sawv cev rau tej neeg so tsis ua hauj lwm uas yeej npaj nyiaj txaus rau lawv siv los yog tej neeg so tsis ua hauj lwm uas tsuas npaj tau nyiaj me ntsis rau lawv siv.
Nws pom zoo tias Australia yeej muaj peev xwm khaws tau tej nyiaj superannuation zoo, tab sis kuj xav pom kom tej tuam txhab superannuation funds muaj cov kev pab cuam pab rau tej customers kom ntau tuaj ntxiv thiab, kom tej neeg thiaj mloog tau tias lawv tau npaj tej nyiaj siv rau lub caij so tsis ua hauj lwm no zoo tshaj qub tuaj ntxiv.
Yeej ib txwm pom tias tej neeg uas so tsis ua hauj lwm feem coob yeej pom tias tej tuam txhab superannuation funds yeej pab lawv tsis tau raws li qhov lawv cia siab li, yog xam tam li lawv yog ib co customers uas lub tuam txhab ntawd yog tus npaj thiab ua tus tswj lawv tej nyiaj supernnuation. Tab sis muaj tej thaum ces tseem muaj ib txhia neeg so tsis ua hauj lwm tseem mloog tau tias zoo li lawv tej nyiaj tsuas yog tej tuam txhab superannuation funds li xwb thiab, tsis yog tej tub koom siab ntawm tej tuam txhab ntawd li, yog tham txog cov kev xav tshem lawv tej nyiaj ntawd mus rau lwm lub tuam txhab los sis kom them me ntsis rau lawv los yog rho rau lawv los yog rho tam li yog cov nyiaj laus rau lawv.Wayne Strandquist, Chief Advocate of the Australian Independent Retirees
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
