Xov xwm luv tshaj tawm rau hnub zwj Feej (Wednesday news 10.04.2024).
Tej coj ntawm tej teej kawm ntawm xeev New South Wales yuav raug yuam kom rov qab mus qhia ntawv rau lub caij uas tsis muaj xib fwb txaus mus qhia ntawv. Ces thiaj li yuav ua rau cov coj ntawm tej teej kawm no yuav raug mus qhia ntawv 3 hnub rau ib lub limtiam twg. Raws li tau nom lis laj fai tswj kev kawm Prue Car tau qhia rau ib co ntawv uas tau xa rau tej coj ntawm tej teej kawm, ces tej teej kawm cov nyiaj kuj raug muab txog txog li 148 million dollars raws li tus nom no hais, vim rau qhov tias zoo li muaj tej tub kawm mus teev npe kawm tsawg zog lawm tab sis zoo li muaj tej neeg ua hauj lwm tam li cov coj ntawm tej teej kawm no ntau dhau heev lawm.
Muaj ntau millions tus neeg Muslims thoob ntiaj teb no tseem tab tom ua koom txoos Eid Al-Fitr uas sawv daws paub tias yog ib lub koom txoos yoo mov, coj los ua ib lub cim qhia txog cov kev xaus lub koom txoos Ramadan. Yog li no lawv thiaj tau ua lub koom txoos no rau lub hli dawb huv tshaj plaws raws li cov Islamic calendar uas tej neeg Muslims no tau yoo txij sawv ntxov txog tsaus ntuj. Nyob rau ib c ncauj lug thawj pwm tsav Anthony Albanese thiaj tau qhia tias yeej tau muaj tej neeg Muslims coob leej ntau tus tau los ua lub koom txoos no rau lub caij uas muaj tej kev tu siab rau cov xwm txheej pab tej neeg txom nyem nyob ntawm Gaza, ua nws qhia tias yog ib lub caij uas nyuaj heev rau coob leej ntau tus.
Mat Perterson uas yog tus haus zos Alice Springs xav kom xa tub ceev xwm coob ntxiv mus pab tswj thiab pov puag lub zos no kom ntev tshaj lub sij hawm txwv tsis pub tej hluas tawm, uas tau muab txuas mus txog ntua hnub zwj Quag (Tuesday) tim 15 lub 4 hlis ntuj ntxiv tom ntej no. Mr Paterson no thiaj li tau qhia rau lub chaw nthuav xov xwm ABC tias yeej xav kom tau tub ceev xwm kom ntau tuaj ntxiv mus tswj tej xwm txheej no.
Christopher Wray uas yog tus coj FBI tau qhias tias teb chaws Russia, Suav tuam tshoj thiab Iran yog cov teb chaws uas yuav hawv ua phem rau teb chaws Meskas txoj kev tswj kev ruaj ntseg haiv. Mr Wray thiaj li qhia tias tej teeb meem uas yuav muaj rau nws haiv neeg cov kev tswj kev ruaj ntseg haiv no mas yog ib co sib chab sib chaws heev tshaj qub. Thiab nws kuj tau hais tias teb chaws Suav tuam tshoj no yog ib lub teb chaws uas tej zaum yuav tsim kev phom sij loj heev rau peb tiam neeg no.
Tsoom fwv Biden no kuj tau tsis pom zoo nrog lub tsev hais plaub Supreme Court ntawm lub xeev Arizona uas tau txiav txim siab hais tias yuav txwv txiav tag nhro cov kev ro me nyuam tawm ntawm lub xeev no, thiab tau muab cov xwm txheej no hu tias yog ib co xwm txheej txaus txhawj xeeb kawg. Yog li ntawd ces sai sai tom ntej no lub tsev hais plaub Supreme Court ntawm lub xeev no yuav yuam kom rau txim tag nrho rau txhua txhua cov neeg uas muaj feem rho me nyuam, tsuas yog tias ntshe cov kev rho me nyuam ntawd ho yuav pab cawm tau tus leej niam ntawv txoj sia xwb. Ces thiaj yuav ua rau tej kws kho mob los yog tej neeg pab rho me nyuam no yuav raug rau txim.
Lwm pab nom teb chaws kuj tau nug txog Australia tus nom txawv teb chaws Penny Wong cov kev nqua hu kom los lees paub thiab tsim ib lub teb chaws rau cov neeg Palestinian nyob no yog ib lub tswv yim yuav los daws tau cov teeb meem ntawm cheeb tsam Middle East. Senator Wong thiaj li qhia tias cov kev los lees paub no yog ib kauj ruam tseem ceeb uas yuav ua kom tau raws li lub hom phiaj li tsim kom tau ob lub teb chaws, uas muaj kev vam kev cia siab tias yuav tsim kom tau kev thaj yeeb ntev ntxiv tuaj los yog yuav tsim kom tau kev ruaj ntseg ntev ntxiv tuaj rau teb chaws Israel. Thiaj tau ua rau Senator Simon Birmingham ntawm pab nom koom tswj tau qhia rau lub chaw nthuav xov xwm ABC tias Senator Wong no yuav tsum tau los tshab txhais kom meej tseeb txog nws cov lus tawm tswv yim no.
Kuj tau muaj ib tug kws paub zoo txog tej cai lij choj tswj tej ib puag ncig thiab tej huab cua pauv hloov qhia tias cov kev txiav txim siab los ntawm lub tsev hais plaub European Court of Human Rights txheeb tau hais tias tus tsoom fwv Switzerland no tau yuam tej pej xeem txoj cai vim rau qhov tias zoo li nws tsis kub siab los daws tej teeb meem huab cua pauv hloov rau ib co plaub ntug uas tsis tau pom muaj dua los li. Rooj plaub no thiaj cuam tshuam nrog rau tej poj niam laus neeg neeg Swiss ntau tshaj li 2,500 tus uas lawv cav tias tsoom fwv cov kev tsis kub siab los nrog daws cov teeb meem huab cua pauv hloov no yog ib cov kev ua yuam lawv txoj cai thiab tau ua rau muaj teeb meem tsis tau txais kev noj qab haus huv thiab muaj teeb meem rau lawv txoj kev ua lub neej. Yog li ntawd Professor Annalisa Saveresi thiaj li hais tias cov kev txiav txim no tsis yog tias tseem ceeb rau lub koom haum Coucil of Europe xwb tab sis tseem yog ib rooj plaub tseem ceeb thoob plaws rau ntiaj teb no thiab.
Kawm niam txiv uas muaj ib tug hluas nyuam qhuav nto nkauj nto raug uas mus tu tej tub kawm ntawm ib lub teej kawm ntawm teb chaws Meskas no nyias kuj raug nyias ib lub txim kaw tsev laj cuj yam tsawg li 10 lub xyoos rau qhov tias zoo li tsis kub siab los npaj tej txheej txheem los tiv thaiv kom nkawv tus me nyuam tsis txhob mus tua 4 tug tub kawm ntawm ib lub teej kawm rau xyoo 2021. Ethan Crumbley kuj tau siv ib rab phom semi-auto handgun coj mus tua tej me nyuam kawm ntawv ntawm lub tsev kawm Oxford High School ntawm lub xeev Michigan, ces tam sim no ces nws kuj raug rau txim kaw tsev laj cuj tag ib txhis yam tsis muaj cai yuav los hais kom tau tawm txim li lawm. Yog li ntawd nws niam thiab nws txiv uas yog James thiab Jennifer Crumbley no los kuj raug rau txim ib tug twg txog li ntawm 10 xyoo txog 15 xyoos, tom qab uas tsev txiav txim plaub tau txheeb tau tias nkawv muaj feem txhaum vim nkawv tsis los tiv thaiv kom nkawv tus tub tsis txhob mus tua tej neeg no.
Tej lagluam uas xav mus yuav lwm lub tuam txhab los sib sau kom lawv lub tuam txhab lagluam loj no yuav tsis muaj lwm txoj xub ke lawm tab sis yog lawv xav ua li no ces lawv yuav tsum tau qhia rau Australia lub koom haum uas tswj tej lagluam cov kev sib tw raws li tsoom fwv teb chaws xav thov los kho dua tej cai no tshiab. Ces thiaj li yuav tso cai rau lub koom haum ACCC (Australia Competition and Consumers Commission) los yog lub koom haum uas tswj tej lagluam cov kev sib tw thiab pov puag tej neeg yuav khoom siv los ua tus tswj cov hauj lwm no thiab tswj tej cai no. Thiab yuav tsis siv tej cai ntawm tej tuam txhab lagluam uas coj los siv lawm tab sis yuav siv ib co cai los yuam tej tuam txhab lagluam no. Txawm li cas los Jim Chalmers uas yog tus nom lis laj fai tswj nyiaj txiaj kuj qhia tias nws tseem yuav los qhia txog cov kev pauv hloov no tias seb ho yuav ua li cas rau lub caij uas nws mus hais ib cov lus ntawm Sydney. Vim rau qhov nws hais tias teb chaws Australia cov tswv yim uas pheej yuav ntau cov lagluam los sib sau ua ib lub tuam txhab lagluam no zoo li siv tsis tau hauj lwm lawm.
Tej neeg mus xaiv nom ntawm teb chaws Kaus Lim qab teb (South Korea) tseem tab tom npaj yuav mus xaiv nom rau cov kev xaiv tsa rau hnub tim 10 lub 4 hlis ntuj (2024) 6 moo sawv ntxov txog 6 moo tsaus ntuj. Ces tag nrho 300 lub rooj nom thoob plaws lub teb chaws no hauv tsev tsoom fwv thiaj li yuav raug tej neeg xaiv dua rau cov kev xaiv tsa no.
Vientiane Times kuj tau tshaj tawm tias nom tswv Nplog thiab nom tswv Nyab Laj (Cob Tsib) kuj tau muaj cov kev kos xyeem mem tes MOU los yog Memorandum of Understanding los ua lagluam ntawm ob lub teb chaws no. Nom tswv Nplog no xav yuav roj thiab hlaus nrog rau tej twj tshuab tooj tshuab hlau los siv, hos Cob Tsib ces xav tau Nplog tej tej roj hmab (plastic), tej ntoo los yog tej peev txheej minerals coj mus muag rau Cob Tsib.
Raws li Bangkoj Post tau tshaj tawm ces Thaib tus nom txawv teb chaws kuj tau nrog Thaib tus thawj pwm tsav Srettha Thavisin sab laj sib tham tias seb yuav tau npaj kom txhij li cas tsam ho muaj tej neeg Phabmab (Myanmese) coob tshaj li 100,000 tus yuav khiav tawm ntawm teb chaws Phabmab rau lub caij uas tau muaj cov kev sib tawm tsam ntawm tej tub rog nyob rau cheeb tsam ze ntawm Jangwat Tak (Tak Province) nrog rau tsoom fwv tub rog Phabmab uas tej zaum yuav khiav mus rau teb chaws Thaib ntawd.
Hais txog cov kev sib tw ncaws pob no ces Matilda tus coach uas yog Tony Guvstavsson tau qhia tias tej neeg uas mus saib cov kev sib tw no tej zaum yuav pom tias Australia pab Matilda no yuav sib tw muaj ceem heev nrog rau teb chaws Mexico pab nyob rau ntawm xeev Texas. Yog li ntawd nws thiaj li tau qhia rau lub chaw nthuav xov xwm tshooj 10 hais tias tej zaum yuav ntsib cov kev sib tw uas yuav npaj kom teb chaws Australia pab no muaj peev xwm mus sib tw tau zoo rau cov kev sib tw Paris Olympics.
Hais txog cov kev sib tw tennis no ces Alex De Minaur kuj muaj peev xwm sib tw yeej Stan Wawrinka uas yog ib tug neeg ua tau yeej cov kev sib tw Grand Slam 3 zaug dhau los, rau lub sij hawm sib tw cov kev sib tw tennis Monte Carlo Masters, uas tau ua rau nws yeej 20 zaus cov kev sib tw xyoo 2024 no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
