Muaj ntau yam lus nug cuam tshuam rau cov kev txiav txim siab yuav tsev. Tab sis ib lo lus nug tseem ceeb yuav tau nug yus thaum ntxov ntawd ces seb yus ho puas xav yuav cov tsev uas twb ua tau lawm los yog xav ua dua lub tshiab.
Yeej tsis muaj ib lo lus teb yuav siv haum rau sawv daws yog li peb ho los xyuas 2 nqe lus no thiab txheeb xyuas ntxiv seb qhov twg yuav zoo dua rau yus.
Ua tsev tshiab
Qhov zoo tshaj plaws ntawm cov kev ua ib lub tsev tshiab ces yog yus muaj peev xwm ua kom tau raws li yus xav tau raws li tej nyiaj yus muaj txaus coj los ua ntawd, uas yus xaiv tau cov tsos thiab tej kob, tej khoom coj los siv ua lub tsev los yog tej twj coj los nruab rau. Tab sis nqe tseem ceeb tshaj plaws mas yus muaj peev xwm txiav txim siab hloov tau thiab kho tau tias seb yus hom nyiam kom cov chav loj me li cas thiab tso rau qhov twg.
Tab sis tej zaum kuj yuav tsis yog txhua tus yuav nyiam li hais ntawd thiab, vim yuav tau los txiav txim siab ntau yam los lis tej hauj lwm ntau yam rau lub sij hawm luv luv xwb.
Square formate, two people Source: Getty Images
Victor Kalinowski uas yog tus teeb tsa lub tuam txhab Blackk thiab ho yog tus neeg pab tej neeg qev nyiaj yuav tsev hais tias " Muaj ib txhia neeg pom tau tias xyov lub tsev lawv xav ua ntawd thaum ua tau rau thaj hav lawv yuav ntawd lawm ho yuav zoo li cas? Lawv yeej tau mus xyuas tej tsev ua tau tiav thiab saib tej tsev ntawd cov duab hauv tej ntawv xov xwm tag los tseem zoo li paub tsis meej tias xyov tej lawv nyiam ntawd puas yuav ua tau rau lub tsev uas lawv xav yuav los yog xav ua kom tau ntawd thiab."
Peter Koulizos uas yog ib tug neeg qhia txog cov lagluam vaj tse thiab sau ntawv txog cov lagluam no qhia tias Ib qhov txiaj ntsim yuav tau txais ntxiv los ntawm cov kev ua tsev tshiab mas yog cov tsev tshiab no yuav txuag tau hluav taws xob dua. "Yuav tsis tau siv nyiaj ntau los siv cov cuab sov cua txias. Hos kho los kuj pheej yig dua thiab vim lub tsev tseem tshiab."
Tsis tas li no tseem tau txiaj ntsim fab nyiaj txiaj rau cov kev ua tsev tshiab thiab, xws li yuav tsis tau them cov stamp duty kim thiab tseem tau cov nyiaj tsoom hwv pab tej neeg yuav tsev ua thawj zaug thiab.
Source: Getty Images
Tab sis ntshe tseem muaj teeb meem cuam tshuam txog thaj chaw yus xav ua los yog xav yuav tsev thiab. Yog kom xav ua tsev tshiab ces yuav tau mus rau qhov chaw tshiab uas tseem muaj av muag thiab nrug deb ntawm nroog me ntsis. Tsis tas li tej zaum thaj chaw ntawd kuj yuav tsis muaj ntau yam li tej teej kawm, tsheb thauj neeg mus los, tsev kho mob thiab kiab khw lagluam ze lub zos ntawd thiab.
Lwm yam ua rau koj yuav plam txiaj ntsim ces yog seb yuav siv sij hawm ntev npaum li cas mam li ua lub tsev tshiab ntawd tiav, uas tej zaum yuav tau siv sij hawm ntau hli ua ntej yuav muaj peev xwm mus nyob tau. Yog tias koj xav mus nyob kiag koj lub tsev sai ces ntshe yuav tsis yog ib txoj kev xaiv zoo rau koj.
Yuav lub tsev uas twb ua tau lawm
Ib yam txiaj ntsim tseem ceeb tau txais los ntawm tej tsev uas yeej ua tau lawm ces muaj tej txheej txheem yooj yim dua rau koj. Yus muaj peev xwm mus saib tau lub tsev ntawd thiab txiav txim siab tias seb puas nyiam los tsis nyiam, yog nyiam ces yuav tau thiab mus nyob kiag tom qab tsis ntev uas yuav tau lawm.
Tab sis tej zaum kuj yuav nrhiav tsis tau lub tsev kom haum raws li qhov yus nyiam thiab xav tau yog yus xav yuav lub tsev loj uas muaj ntau chav ntawd. Thiab tsis tas li no los lub tsev tshiab ntawd tsis tau muaj ntau yam services rau koj siv thiab yuav tau sib txuas lus nrog ntau lub tuam txhab kom mam tau dej, hluav taws xob thiab gas siv. Hos cov tsev qub ces tsis txhawj txog tej hais no lawm.
Family with two boys (4 and 6 years) standing in front of house with FOR SALE sign in front yard. Focus on sign. Source: Getty Images
Yog tias koj xav nyob ze nroog ces ntshe tej zaum koj yuav tau yuav cov tsev qub yeej ua tau ntev lawm xwb.
Koulizos tshaj txhais tias “Yus yeej paub tias thaj tsam ib ncig lub tsev ntawd zoo li cas. Seb lub koom haum pab lub zos nyob qhov twg, chaw teev hawm nyob qhov twg, thiab kiab khw lagluam nyog qhov twg. Tab sis yog koj yuav tsev tshiab, ces txawm cov lagluam ua tej vaj tse tshiab yuav qhia koj tias lawv yuav ua gym rau sawv daws siv, thiab muaj chaw ua kev lom zem, los yeej txhais tsis tau tias lawv yuav ua tej chaw li hais ntawd. Tej zaum lawv kuj txiav txim siab ua lwm yam rau ib thaj av twg los kuj tau thiab, yog tias lawv hom ntsib qee yam teeb meem nyuaj."
Kwv yees thiab piv ntau yam nqe.
Txawm tias tej zaum yuav pab tau kom koj txhob tau them cov se ua tsev tshiab (Stamp duty) vim koj tau cov First Home Owner Grants los qhov no yeej txhais tsis tau tias kev ua dua ib lub tsev tshiab yuav pheej yig thiab.
Yog li ntawd thiaj tsim nyog koj yuav tau kwv yees thiab piv txhua yam nqe ntawm cov kev ua lub tsev tshiab thiab yuav cov tsev qub uas yeej ua tau lawm ua ntej koj yuav txiav txim siab tias yuav ua li cas. Koj yuav tsum tau xav txog tej yam yuav tau kho lub tsev rau yav pem suab los yog tej nqe koj yuav tau siv ntaiv tsev nyob kom ua tau koj lub tsev tshiab ntawd tso mam mus nyob ntawd nrog thiab yog tias ho siv sij hawm ntev dua los ua thiaj tiav.
Source: Getty Images
Yuav tau nug tej lus nug no rau koj tus kheej
Thaum koj pib xav tias xav yuav tsev ntawd, koj yuav tsum tau nug koj ob peb nqe lus nug tias: seb koj xav nyob rau qhov twg? Nyiam cov tsev zoo li cas thiab koj ho puas muaj peev xwm them taus? Thiab ib nqe tseem ceeb mas seb puas yog koj yuav nyob lub tsev ntawd tag koj ib sim neej los yog tsuas nyob ib ntus, xav muab kho thiab muab muag es tsiv mus nyob lwm qhov?
Kalinowski hais tias "Yog koj xav yuav ib lub tsev thiab xav tias nyob ib xyoo xwb ces xav muab muag thiab tsiv mus nyob lwm qhov los yog xav muab kho kom loj thiab dav dua qub ntxiv, ces koj yuav tau ua tib zoo los txheeb xyuas txhua cov txheej txheem tias seb puas tsim nyog koj yuav nyob rau lub caij ntawd? Hos yog tias koj xav tias koj yuav nyob lub tsev ntawd txog li 15-20 xyoo, thiab koj tej me nyuam los yuav mus kawm ntawv ntawm tej tsev kawm qib pib, nqeb nrab thiab qib siab ces tsim nyog dua tus neeg uas tsuas yuav lub tsev nyob 1 xyoos xwb es xav mus txawv teb chaws ntawd."
Architect drawings of a proposed new house. Source: Getty Images
