Lub koom haum The Black Dog Institute uas yog ib lub chaw teeb txheeb txog tib neeg cov teeb meem nyuaj siab ntxhov plawv thiab mob hlwb tau siv technology los tsim tau ib cov twj coj los pab tej neeg daws teeb meem nyuaj siab ntxov plawv thiab mob hlwb hauv internet hu ua Mycompass no.
Lub hom phiaj yog coj los pab kom tej neeg txhob txov txo lawv tus kheej txoj sia kom tsawg tuaj ntxiv. Vim raws li tau muaj kev teeb txheeb tau qhia, ib hnub twg twb muaj pej xeem Australia txov txo lawv tus kheej txoj sia txog li 6 leej, thiab tseem muaj 30 leej ntxiv npaj los yog muaj tswv yim xav txov txo lawv tus kheej ntxiv thiab.
Raws li lub koom haum Black Dog Institute tus coj hu ua Helen Christensen tau qhia, technology yeej yog ib cov twj muaj peev xwm siv coj los pab tau tej neeg coob heev yam tsis tas yuav tos, yuav nug ib tug twg los yog yuav ntsib ib tug twg tim ntsej tim muag es mam li muaj peev xwm tham thiab sab laj qhia txog ib tug neeg twg txoj kev nyuaj siab ntxhov plawv rau lwm tus yam tsis tas yuav txawj tias yuav tau tos yuav tau teem caij tab sis muaj peev xwm nrog ib tug twg tham tau kiag los yog nrhiav tau xov xwm kiag tam sim ntawd thiab siv tau 24 teev 7 hnub txhua sij hawm.
Shannai Pearce uas yog ib tug poj niam yeej tau sim txov txo nws tus kheej txhoj sia thaum tseem muaj hnoobnyoog 14 xyoos tau qhia tias nws nyuaj siab ces mus tawm tswv yim hauv online xwb thiab yog muaj cov twj pab nws daws tau kev nyiaj siab ces nws yeej xav siv thiab kom thiaj li ho pab tau nws me ntsis.
Lub koom haum The Black Dog Institute thiaj li tau siv cov technology no coj los pab tej neeg kom ntau li ntau tau.
Helen Christensen uas yog tus coj ntawm lub koom haum no hais tias cov neeg muaj teeb meem nyuaj siab ntxhov plawv uas xav txov txo lawv tus kheej txoj sia yeej tsis nrhiav kev pab cuam uas ib txwm muaj siv pab rau lawv li ces thiaj yog tej yam tseem ceeb uas muaj cov online tools no los pab.
Christensen hais tias "Peb yeej paub tias muaj neeg coob heev, tej zaum txog li ntawm 60% xav npaj tswv yim los txov lawv los yog nrhiav tswv yim los txov txo lawv tus kheej txoj sia yeej yog cov neeg tsis mus nrhiav tej kev pab cuam daws kev nyiaj siab ntxhov plawv thiab mob hlwb ib txwm muaj rau sawv daws siv li. Yog li cov kev muaj peev xwm siv tau rau tej neeg coob heev no thiaj yog tib txoj xub ke yuav pab hloov tau cov kab theem neeg txov txo lawv tus kheej txoj sia xwb, vim rau qhob peb yeej tsis paub li tias leej twg npaj yuav txov txo lawv tus kheej li." Shannai Pearce hais tias "Txog ntawm kuv ntiag tug lawm, ces kuv yeej tsis xav tias kuv muaj teeb meem nyuaj siab ntxhov plawv los yog mob hlwb dab tsi.Kuv tsuas xav tias tej zaum kuv yog ib tug tab kaum rau lwm tus xwb thiab zoo li kuv tsis yog ib tug neeg uas lwm tus tsis xav nrog los yog koom xwb vim kuv yog ib tug neeg txawv lwm tus thiab zoo li yus mloog tau tias yus koom tsis tau lwm tus xwb."
Cov kev raug lwm tus ntaus nqe yuam kev tseem yog ib cov teeb meem ua rau cov neeg nyuaj siab ntxhov plawv los yog mob hlwb tsis xav mus nrhiav kev pab cuam thiab. Vim lwm tus pheej tseem ntau nqe yuam kev tias ntshe yus yog ib tug neeg vwm lawm no.
Monica Das yeej paub zoo txog cov xwm txheej no tias yog vim li cas tej neeg muaj cov teeb meem no thiaj tsis mus nrhiav kev pab cuam. Ces nws thiaj tau teeb tsa lub koom haum hu ua "Haathi in the Room" coj los pab cov poj niam neeg Indian thiab cov neeg zejzog ntawm cov teb chaws cheeb tsam South Asian uas nyob hauv teb chaws Australia no.
Das hais tias "Nyob rau peb tej neeg zejzog no tej kab lis kev cai ces kuv yeej pom tau tias tsis yog tej yam yooj yim yuav cia li qhia tau rau ib tug twg paub tias yus muaj teeb meem dab tsi li. Qhia qhov ncaj lawm, ces yus yeej ntshai tsam lwm tus xav tias uas li cas yus yuav yog ib tug neeg muag luav tsis muaj peev xwm, ces yuav ua rau yus haj yam txaj muag ntxiv xwb."
Ms Das lub koom haum no thiaj yog ib cov xwm txheej qhia rau sawv daws paub tias thaum tham txog cov kev tiv thaiv kom lwm tus txhob txov txo lawv tus kheej txoj sia lawm, tsis yog tib cov kev yuav ua li cas kom cov neeg ntawd tau txais kev pab cuam raws li qhov tsim nyog xwb tab sis yuav tsum tau qhia rau tej neeg zejzog kom paub txog cov kev tiv thaiv no thiab.
Das hais tias "Vim yeej muaj tej neeg coob heev tam sim no yeej nrhiav tsis tau sij hawm ntawm lawv txoj kev ua lub neej txhua hnub mus nrog ib tug neeg twg zaum tsaws tham los yog sab laj li, yog li ntawd cov kev muaj peev xwm mus sab laj tau hauv online thiab muaj ib qho chaw rau yus tham txog yus txoj kev nyuaj siab los yog muaj peev xwm mus pom thiab saib lwm tus cov video lawv tham txog lawv cov kev nyuaj siab ntxov plawv kuj yuav pab tau yus me ntsis thiab."
Yog tias koj los yog ib tug neeg twg ua skoj paub tsim nyog yuav tau txais kev pab cuam kom sai kiag tam sim no, ces xav kom koj hu xov tooj rau Lifeline tau ntawm 13 11 14 tau.#
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis download tau ntawm thiab ntawm iTunes tuaj koom ua tub koom siab thiab koom mloog tau tau ntawm #SBSHmong lub Facebook page tau.
