Donald Trump uas yog Meskas tus qub president dhau los thiab yog tus neeg sawv cev rau pab nom Republican uas tau yeej meskas cov kev xaiv tsa US President election hnub tim 5 lub 11 hlis ntuj xyoo 2024 dhau los tau qhia txog qee tus neeg uas nws tau xaiv los ua ib txhia nom tseem ceeb ntawm nws tus tsoom fwv tshiab uas yuav ua hauj lwm ntawm tsev dawb lub 1 hlis ntuj xyoo 2025.
Nws tau xaiv Tom Homan los ua tus nom tswj Meskas cov dej num tsiv teb tsaws chaw. Nws yog ib tug neeg uas coj nruj tsiv heev rau cov dej num tsiv teb tsaws chaw uas nws tau teb ib tug neeg tshaj xov xwm tias ''Muaj txoj xub ke yuav xa tag nrho ib tsev neeg rov qab kom tej cuab yig tsis txhob raug sib cais''. Thiab nws kuj tau qhia tias nws yob tus yuav los tswj tej dej num uas yuav ua rau muaj ntau million tus neeg raug muab xa tawm ntawm teb chaws Meskas rov qab mus rau tej teb chaws lawv tuaj.
''Mr Homan tau hais rau tej nom xeev ntawm pab nom Democrat uas xav tiv thaiv kom nyuaj rau tsoom fwv Trump cov kev ua tej hauj lwm no nyuaj tias kom txav kev deb, vim nws yuav tsis ua hauj lwm nrog tej nom no.''
Trump kuj tau xaiv Stephen Miller uas yog ib tug neeg sab laj tawm tswv yim rau nws tus tsoom fwv dhau los ua tus lwm coj deputy chief of policy uas yeej txhawb nqa kom coj nruj tsiv rau cov kev tsiv teb tsaws chaws.
Miller hais tias ''Peb tus president yuav los kho tej cai tseem ceeb tshaj plaws los daws ntau yam teeb meem rau ntau xyoo no. Nws yeej tau hais tias 'kuv yuav los pab Meskas tej neeg ua hauj lwm, pab Meskas tej lagluam, xub kub siab txog Meskas tej cuab yig ua ntej tej kev tsiv teb tsaws chaw'. Peb yuav xub pab peb tej cuab yig neeg America ua ntej. Thiab yuav xyuas kom peb haiv neeg tau txiaj ntsim ua ntej.''
Ua ke no los Donald Trump kuj tau teeb tsa Lee Zeldin uas yog ib tug nom ntawm New York dhau los tswj lub koom haum pov puag ib puag ncig uas tej zaum yuav ''xyuas kom tau txais kev ncaj ncees thiab tso tseg tej cai uas ua rau Meskas tej lagluam muaj fwj chim.''
Elise Stefanik uas yog New York ib tug nom kis xeev qes raug xaiv ua Meskas tus nom ua hauj lwm hauv UN.
Thiab raws li tau muaj cov chaw nthuav xov xwm li AFP thiab Ruteurs tau qhia ces Donald Trump kuj tau xaiv Mike Waltz uas yog ib tug tub ua hauj lwm nrog US special force dhau los ua nom sab laj tswj kev ruaj ntseg.
Mike Huckabee uas yog tus hau xeev Arkensas dhau los kuj raug xaiv ua Meskas tus ambassador rau teb chaws Israel.
Tsis tas li ntawd los kuj muaj lus paj lus cua tias Trump yuav xaiv Marco Rubio uas yog tus nom kis xeev siab ntawm Florida ua Meskas tus nom txawv teb chaws.
Thiab kuj yuav xaiv South Dakota tus hau xeev Kriste Noem los ua tus nom tswj lub tuam chav Department of Homeland security uas tswj ntau yam hauj lwm tsis hais ciam teb, kev tsiv teb tsaws chaw, tswj tej xwm txheej ti tes ti taw, thiab soj xwm qab rooj.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
