Meskas tus qub president Donald Trump dhau los kuj tau yeej cov kev xaiv tsa 2024 US Presidential election tom qab tau cov suab xaiv tsa ze txog 72 million lub piv rau yuav laug txog 67 million uas tej neeg tau pov ntawv xaiv tsa rau Meskas tus lwm President Kamala Harris ntawm pab nom Democratic Party.
Ces thiaj ua rau pab nom Republican Party yeej cov rooj nom 294 lub piv rau Democratic Party uas tsuas yeej 223 lub rooj nom xwb.
Thiab Meskas tus president Joe Biden thiab tus lwm president Harris los yeej tau hu rau Mr Trump thiab nrog nws zoo siab rau nws cov kev muaj yeej cov kev xaiv tsa. Australia thiab ntiaj teb tej coj los kuj tau ua kev zoo siab nrog Mr Trump cov kev muaj yeej rau nws cov kev xiav tsa xyoo 2024 thiab.
Ms Harris thiaj tau los hais ib cov lus lees swb ntawm lub tsev kawm qib siab Howard University rau tej neeg nws txhawb nqa tias:
''Kuv zoo siab heev thiab yeej ris txiaj rau tej kev tso siab thiab ntseeg siab rau kuv. Kuv yeej hlub tshua peb lub teb chaws (Meskas) no heev. Txawm tias cov kev swb tsis yog tej yam peb xav tau los xav kom peb tsis txhob tag kev cia siab, thiab peb yuav tau nqus npab kub siab tshaj qub ntxiv los ua hauj lwm tshaj qub ntxiv los pov puag tej kev ywj pheej, kev nyab xeeb thiab peb txoj kev npau suab rau yav pem suab.''
Mr Trump thiab Ms Harris los yeej pom txog qhov tseem ceeb ntawm cov kev yuav rov qab los xyuas kom tsim tau kev koom npoj rau lub teb chaws Meskas.
Thiab lub caij nws tau hais lus ntawm Florida ces Mr Trump tau cog lus tias yuav los tswj hwm rau txhua tus neeg America thiab yuav los tswj tej dej num tsiv teb tsaws chaw thiab pab lub teb chaws no kom rov qab zoo.
Nws hais tias ''America yeej tau ua tej yam uas tsis tau pom ua dua los thiab yeej xav kom nom tswv ua dab tsi lawm. Thiaj ua rau peb rov qab muaj peev xwm los tswj tsev kis xeev siab lawm. Ua yog tej yam zoo heev. Qhia qhov tseeb lawm, kuv yeej ntseeg tias yog ib cov kev pauv hloov laj fai kum xeeb tseem ceeb tshaj plaws.''
Ces thiaj tau ua rau Mr Trump yuav rov qab mus ua nom rau haiv neeg Meskas ntawm tsev dawb rau lub caij 4 xyoos tom ntej no ntxiv tom qab nws tau swb cov kev xaiv tsa xyoo 2020 thiab tsis lees paub nws cov kev swb, thiab raug nom tswv tawm suab tsis tso siab rau nws cov kev ua tus coj ob zaug, raug teem txim txhaum ib zaug thiab tseem muaj lwm cov kev ua txhaum cai ntau yam.
Ces lub 1 hlis ntuj xyoo tshiab (2025) no nws thiaj tseem yuav los lees ua Meskas tus president tshiab raws kev raws cai txuas ntxiv rau lub caij tam sim no mus txog lub caij ntawd ces tus tsoom fwv Joe Biden no tseem yuav ua nws tus nom kom tag sij hawm tso.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
