Ms. Pat Virathone los yog Niam Vam Mab Vaj uas yog ib tug neeg ntawm lub koom haum Hmong Australia Festival Inc (HAF) tau koom tsim lub koob tsheej Valentine party rau Hmoob community ntawm nroog Melbourne thiab lwm cov neeg zejzog hauv lub xeev Victoria no rau hnub tim 9.2.2019 dhau los no.
Tsis tas li no los kuj muaj cov koob tsheej Valentine ntawm Hmoob tej zejzog ntawm nroog Brisbane thiab Innisfail rau tib lub caij no los ua kev zoo tshiab rau Hmoob community thiab.
Lub hom phiaj yog coj los qhia txog txoj kev sib hlub uas muaj ntau hom kev hlub xws li sib hlub tam li nkauj nraug, niam txiv, tub ki, tsev neeg, kwv tij neej tsa thiab phooj ywg.
Ntxiv ntawd ces kuj yog lub caij uas cov sib yuav ua txij nkawm ua neej nyob ua kev los tau ntau caum xyoo ho los hais lus tawm tswv yim qhia tias lawv tswj lawv lub neej li cas kom thiaj li tseem sib hlub thiab nyob tau ua ke tsheej cuab tsheej yig rau sawv daws tau mloog.
Tsis tas li no los tseem yog ib lub hom phiaj ntawm lub koom haum Hmoob Australia Festival Inc xav ntaus kev phooj ywg nrog rau lwm cov neeg zejzog ntawm teb chaws Australia no thiab kom luag paub tias tsav neeg Hmoob ho zoo li cas.
