Muaj neeg Australia txog li 60% tau siv nyiaj 10 tawv (billion) dollars los yuav vitamin thiab mineral supplement los noj pab rau lawv lub cev txhua txhua lub xyoo.
Tab sis raws li tau muaj qe cov kev teeb txheeb tau qhia, tej khoom no yeej pab tsis tau kom tej neeg noj ntawd tau txais kev noj qab haus huv li cas li, tsis tas li ntawd tseem muaj qee zaus yuav muaj peev xwm tsim tau teeb meem pheej hmoo tau rau lawv txoj siav thiab.
Rob Haala uas yog ib tug kws paub zoo txog tej txiaj ntsim ntawm cov zaub mov thiab qhia tej neeg noj tej zaub mov zoo muaj txiaj ntsim rau tib neeg lub cev kom tau txais kev noj qab nyob zoo ntawm Melbourne lub koom haum Nutrition For Life hais tias, tej khoom hais no yeej tsis tau txais txiaj ntsim dab tsi rau tej neeg nyob cus plaws li. Vim nyob ntawm seb lawv lub cev seb ho txais tau tej vitamins los yog minerals noj pab no ntau npaum li cas thiab coj mus siv tau li cas xwb.
Professor David Jenkins ntawm txhooj faj lem University of Toronto, ntawm teb chaws Canada tau xaus ib cov lus rau cov kev teeb txheeb tshiab txog cov vitamin thiab mineral supplement uas muaj tej vitamin C, D thiab multivitamin los sis yog calcium, ces yeej tsis muaj txiaj ntsim dab tsi pab kho mob los yog tiv thaiv tej kab mob li mob plawv thiab hlab plawv li, raws li pej kum haiv cov kws tshawb fawb paub zoo txog fab kev noj zaub mov zoo muaj txiaj ntsim rau lub cev cov kev tau los muab pej kum haiv cov kev teeb txheeb txhua yam kev tshawb fawb txog cov kev siv thiab noj tej vitamins los yog mineral supplement ntawd.
Professor Jenkins hais tias cov folic acid kuj siv pab tau qee cov neeg kom txhob raug cov teeb meem hlab ntsha tawg saum tobhau (Stroke) rau qee cheeb tsam hauv Suav tuam tshoj, tab sis cov kws teeb txheeb yeej tshawb fawb tau tais cov vitamin B3 los yog niacin thiab cov antioxidants no tej zaum tseem yuav tsim teeb meem phom sij rau tej neeg noj thiab.
"Peb pom tau tias kev muab cov antioxidant sib tov xyaw nrog lwm cov yeej pab tsis tau dab tsi--thiab yeej qhia rau peb paub me ntsis lawm tias yuav ua rau tej neeg tas sim neej tau," raws li Professor Jenkins tau qhia.
Dr Ian Musgrave, ntawm lub tuam chav qhia txog tshuaj thiab kev kho mob ntawm txhooj faj lem University of Adelaide hais tias, txawm muaj tej kev phom sij me me xwb los yeej tsim tau teeb meem pheej hmoo rau tej neeg tiag tiag, thiab cov kev teeb txheeb uas tshawb fawb tau no muaj ntsis zoo sib xws li cov tau teeb txheeb nrog cov neeg mob cancer uas tau noj tej supplement pab.
"Peb kuj txheeb tau los ntawm cov kev teeb txheeb uas xav siv cov antioxidant vitamins uas yaj tau hauv tej roj coj los tiv thaiv kom txhob mob cancer ntawd, qhov tseeb tiag ces haj yam ua rau muaj teeb meem ntau ntxiv tuaj xwb, thiab yog tham txog cov neeg haus luam yeeb uas mob cancer ntsws ces haj yam muaj teeb meem ntau ntxiv rau lawv xwb.''
Lub koom haum Complementary Medicines Australia hais tias Australia tej neeg yuav khoom siv yeej tau tej khoom siv uas tau txais kev nyab xeeb thiab tsim tau tej khoom no zoo tshaj plaws raws li Therapeutic Goods Administration (TGA) tej cai tswj cov kev ua tshuaj siv lawm.
Dietitian Rob Haala uas yog tus kws qhia kom tej neeg paub noj zaub mov kom tau txais kev noj qab nyob zoo thiaj xav taw qhia rau zej tsoom sawv daws tias, txoj xub ke zoo tshaj plaws yuav pab tau ces yog tej tswv yim yooj yooj yim li sawv daws yeej ib txwm ua xwb.
"Piv txwv li xav kom peb tig los noj tej txiv xyoob txiv ntoo thiab tig los noj zaub, noj tej mov mog ci uas muaj ntau hom noob qoob loos sib xyaws, noj tej ntses muaj roj, noj txiv avocado, noj noob txiv thiab tej noob qoob noob loos ntau yam, los yog noj tej yam khoom noj zoo uas peb muaj peev xwm nrhiav tau los noj ntawd."#
Mloog tau lwm yam xov xwm ua lus Hmoob thiab lus Askiv ntawm SBS Radio Hmong Program lub vassab rau hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) thaum 11 am AEDT tau.
Koj tseem muaj peev xwm download tau SBS Radio App ntawm App Store at thiab ntawm Google Play los yog mus download podcasts (xov xwm kaw ua suab) ua lus Hmoob thiab lus Askiv tau ntawm lbu vas sab .
Ntxiv ntawd, koj tseem muaj peev xwm tuaj ua tub koom siab nrog xov tooj cua SBS Radio Hmong Program, tuaj nyem nyiam, faib xov xwm rau koj tej phooj ywg mloog los yog tawm tswv yim rau ntau yam xov xwm tau ntawm#SBSHmong website at . Thiab yog koj xav faib koj zaj dab neeg rau SBS Radio Hmong Program tshaj rau ib tsoom Hmoob mloog, ces txhob ua siab deb, hu tau rau tus zauv xov tooj +61 3 9949 2259 los yog xa tau koj cov lus tawm tswv yim tuaj rau tau.
