Nod yog xov tooj cua SBS Hmong program, thiab hnub no peb muaj ib tug qhua tsim nuj uas yog Mr Austin Virathone. Nyob rau lub caij uas Australia tseem ntsib tej teeb meem kub ntxhov uas yog ib co 'teeb meem puas tsuaj loj rau haiv neeg' no, peb ho yuav muaj peev xwm txheeb tau li cas tias ib tug twg tseem tab tom ntsib tej teeb meem no?
Ua tsaug uas tseem caw kuv tuaj koom. Lub hli no yog lub hli qhia kom zej tsoom paub txog tej teeb meem kub ntxhov hauv lub cuab yig.
Raws li tej statistics teev txog tej teeb meem kub ntxhov hauv lub cuab yig tau qhia ces yeej tau muaj tej poj niam yam tsawg li 28 tus tau tas sim neej xyoo no los ntawm tej txiv neej cov kev tsim kev kub ntxhov. Xyoo 2022-23 ces tsuas muaj tej poj niam no 17 tus tas sim neej xwb, thiab xyoo 2021-22 los kuj tsuas muaj 14 tug poj niam tas sim neej xwb. Ces thiaj pom tias tau muaj tej poj niam no tas sim neej coob tuaj ntxiv lawm.
'Yog tham txog tej cim qhia txog tej teeb meem kub ntxhov hauv lub cuab yig, ces kuj yog ib co xwm txheej uas tsis muaj peev xwm paub tau yooj yim. Tej zaum ces yeej pom kiag tab sis tej zaum ces tej neeg ua txhaum kuj ua ntsiag tos yam lwm tus tsis paub txog thiab,' raws li Austin hais.
Yog tham txog lub ntsiab lus ntawm lo lus 'teeb meem kub ntxhov hauv lub cuab yig' lawm ces yeej muaj lub ntsiab nthuav dav heev. Piv txwv li tsim teeb meem kub ntxhov rau lub cev ntaj ntsug, li siv cov kev deev tsim kev kub ntxhov, tsim kev puas tsuaj rau ib tug twg tej cuab yeej cuab tam, siv nyiaj txiaj los tsim kev kub ntxhov, siv cov kev hawv, los yog hawv tias yuav tsim teeb meem thiab siv tej cwj pwm yuam tswj lwm tus. Ces lo lus no thiaj muaj ntsiab lus nthuav dav heev.Austin Virathone (Austin Vang)
Koj puas xav tias tsoom fwv tejt swv yim muaj peev xwm siv tau los daws tej teeb meem kub ntxhov ntawm teb chaws Australia no, vim yeej tau tham txog tej no los ntev, tej chaw nthuav xov xwm thiab social media platforms los yeej tau tshaj los ntev. Tab sis zoo li yeej tseem muaj tej teeb meem no li qub. Tsim nyog yuav daws tej teeb meem no li cas?
Yog ib co teeb meem uas sib chab sib chaws kawg nkaus li, thiab kuj yog ib co teeb meem uas muaj rau ib co neeg twg tsi ntsees xwb thiab.
Yeej tau muaj ntau tus tsoom fwv tau daws tej teeb meem no los tau ntau lub xyoo. Yeej tau muaj ntau cov ntaub ntawv teeb txheeb txog tej hauj lwm no, thiab yeej tau muaj ntau cov kev cej luam txog tej no, tab sis zoo li yeej tsis muaj ntau cov kev nqes tes los daws kiag tej teeb meem no.
Tsis ntev los no ces tus toom fwv tam sim no (Tsoom fwv Albanese) yeej tau los tsim cov program pab tej neeg tsiv tawm ntawm tej teeb meem kub ntxhov (Leaving Violence program) coj los siv. Ces cov program nod thiaj yuav pab nyiaj txog li ntawm $5,000 pab rau tej poj niam tsiv tawm ntawm tej xwm txheej kub ntxhov no.
Tam sim no ces tseem xav paub kom ntxaws txog tej kev pab cuam ntawd seb zoo li cas tiag, thiab tsoom fwv los kuj tau nqe peev nyiaj rau nws tej nyiaj puag xyoo tshiab no los pab tej teeb meem. Thiab kuj tsoom fwv kuj tsem yuav qhia kom ntxaws tias nws pab dab tsi rau tej hauj lwm no thiab.
Koj puas xav tias tsim nyog muaj cov kev koom thiab kev tawm tswv yim txaus los ntawm tej neeg raug tej teeb meem no, tej koom haum daws tej teeb meem no, thiab tej cuab yig los nrog xyuas tej teeb meem no kom ntau tshaj qub ntxiv?
Kuv xav tias tsim nyog lawv muaj feem tawm tswv yim ntau tshaj no ntxiv vim lawv yog tej neeg uas ntsib tej teeb meem no ces thiaj tsim nyog lawv muaj ib lub suab sawv cev rau lawv ntawm lub rooj sab laj twg tias seb ho yuav pab tej neeg raug tej teeb meem no li cas txuas ntxiv.
Txawm li cas los yeej muaj ntau yam cuam tshuaj txog tej no thiab yeej tsim nyog tej neeg raug tej teeb meem no yuav muaj suab sawv cev rau lawv vim yeej muaj tej xwm txheej no tshwm sim txhua lub xyoo. Thiab li kuv yeej tau teev ua ntej lawm tias tej statistics yeej tau qhia tias tab tom muaj tej poj niam coob tuaj ntxiv raug tua tuag ib lub xyoos twg. Ces thiaj tseem yog ib co teeb meem muaj txuas ntxiv.
Kuv (Austin Virathone -Austin Vaj) los kuj yog ib tug kws lij choj corporate thiab commercial lawyer dhau los. Thiab tam sim no ces kuv kuj yog ib tug txwj laug los pab kho kom lub cuab yig muaj kev sib haum xeeb. Peb yeej ib txwm pab tej nkawm niam txiv uas tau sib cais los txheeb ntau yam cuam tshuam txog lawv tej me nyuam thiab nrhiav qee cov vaj tse rau lawv nyob. Ua ke no los peb kuj tau pab tej neeg uas muaj tej teeb meem hauv lub cuab yig thiab, li pab xa lawv mus thov lwm cov kev pab cuam siv. Vim peb paub tias tej neeg no hais tsi ntsees rau tej poj niam thiab me nyuam ces pheej yog cov yuav raug tua los yog raug teeb meem kub ntxhov dua yog thaum lawv tau txiav txim siab tias yuav tsiv tawm ntawm lawv cov kev txij nkawm los yog tseem xav tias yuav tsiv tawm los yog npaj los daws ntau yam xwm txheej cuam tshuam txog tej kev sib cais. Ces lub caij ntawd thiaj yog lub caij phom sij tshaj plaws rau tej poj niam thiab me nyuam.
READ MORE
Tej cwj pwm yuam lwm tus
Yog li ntawd koj xav tias txoj xub ke twg thiaj yuav yog txoj uas tau txais kev nyab xeeb tshaj los tswj tej xwm txheej no?
Txhua yam xwm txheej, thiab txhua tus neeg los yog txhua tsev neeg nyias yeej sib txawv nyias. Yog li ntawd peb thiaj tsis muaj peev xwm muab sawv daws piv tias zoo tib yam.
Txawm li cas los peb yeej pom tej neeg coj ntseeg ntau yam kab lis kev cai ntsib tej teeb meem no tas mus li. Vim lawv tsis tshua paub lus Askiv zoo. Thiab peb kuj tseem pom tej neeg txom nyem ntsib tej teeb meem no tas mus li thiab.
Tsis tas li ntawd los tej teeb meem kub ntxhov hauv lub cuab yig no yeej yog ib co ua rau tej neeg ras los ua tej neeg tsis muaj vaj tse nyob thiab. Ces thaum tej neeg nsib tej teeb meem kub ntxhov no thiab tsiv tawm ces lawv thiaj tsis paub tias xyov yuav mus rau qhov twg thiab nrhiav kev pab cuam qhov twg.
Ces peb thiaj xa lawv mus nrhiav ntau yam kev pab cuam. Hos yog tham txog cov kev tsiv tawm ntawm tej teeb meem kub ntxhov no ces kuj pom tau tias yeej muaj tej neeg coob heev tsis xav tsiv tawm vim lawv txom nyem nyiaj txiaj, ces thiaj ua rau lawv tsis muaj lwm txoj kev xaiv thiab pheej tseem nrog tus neeg uas tsim teeb meem kub ntxhov rau lawv nyob tib tse ua ke. Ces thiaj li yog tej yam zoo tshaj plaws rau lawv yog tias lawv muaj peev xwm tsiv tawm ntawm tej xwm txheej ntawd mus.
Txawm li cas los cov kev tsiv tawm ntawm tej xwm txheej kub ntxhov ntawd mus los kuj tseem ua rau muaj ntau yam teeb meem thiab, yog li qhov zoo tshaj plaws ces xav kom lawv ntsib tej koom haum pab daws tej xwm txheej kub ntxhov no los yog hu rau tub ceev xwm. Los sis lawv kuj muaj peev xwm hu rau tej kws paub daws tej teeb meem kub ntxhov hauv lub cuab yig tsi ntsees kom lawv thiaj muaj peev xwm npaj tias yuav tsiv tawm ntawm tej xwm txheej no li cas kom tau txais kev nyab xeeb rau lawv thiab lawv tej me nyuam txuas ntxiv rau yav tom ntej.
Koj xav li cas rau Australia tus nom cov lus tawm tswv yim tias 'tsim nyog tus neeg tsim teeb meem kub ntxhov rau lwm tus tawm hauv tsev neeg mus, tsis yog tus neeg raug tsim teeb meem rau tawm'?
Feem ntau mas yog tej yam nyuaj yuav ua tau vim raws li kuv yeej tau xub hais ua ntej lawm tias tej neeg tsim kev kub ntxhov hauv lub cuab yig no yeej siv ib co tswv yim uas txheeb tsis tshua tau yooj yim. Piv txwv li lawv pheej ua tus tswj nyiaj txiaj. Los sis yog ua tej yam yooj yim li pheej tsis pub ib tug twg muaj kev sib cuab sib raug zoo nrog lawv tej phooj ywg thiab nrog lawv tsev neeg.
Ces tus neeg tsim teeb meem ntawd pheej ua rau ib tug twg txheeb tsis tau qhov tseeb, ua rau tus neeg ntawd pheej mloog tau tias zoo li lawv pab tsis tau lawv tus kheej, ua rau lawv mloog tias lawv tsis muaj peev xwm yuav ncaim ntawm cov kev txij nkawm, thiab pheej ua rau lawv mloog tau tias lawv pheej yuav tos kev pab ntawm tus neeg uas pheejt sim teeb meem rau lawv xwb.
Yog li cov lus teb rau tus nom ntawd lo lus nug mas raws li qhov tseeb lawm ces tej thaum kuj tsis tshua muaj peev xwm ua tau thiab. Vim yog tias tus neeg tsim teeb meem kub ntxhov rau lwm tus ntawd tawm ntawm tsev neeg mus thiab tus neeg raug tsim teeb meem nyob txuas ntxiv ntawm lub tsev ntawd nrog nws tej me nyuam los kuj yuav muaj lwm yam cuam tshuam thiab, vim tej zaum tus neeg tsim teeb meem ntawd kuj yuav rov qab los rau ntawm yim neeg ntawd lub tsev, tsuas yog tias ntshe ho yuav tau hloov dua nruas phoo tshiab xauv qhov rooj, los yog yuav tau npaj tswv yim tias yuav ua li cas kom tau txais kev nyab xeeb, los yog yuav tsum tau ntaub ntawv txwv txiav ntawm nom tswv thiab tsev hais plaub tsis pub tus neeg ntawd txav ti/mus ti tus poj niam thiab me nyuam. Ces thiaj yog tej yam nyuaj uas yeej tsis tshua muaj peev xwm daws tau thiab.
Koj puas xav thiab Australia tej bail laws siv tau hauj lwm zoo, vim tsoom fwv xeev New South Wales (NSW) nyuam qhuav qhia tias nws xav txheeb nws tej bail laws, es puas tsim nyog Australia yuav tau kho nws tej cai no kom siv tau thoob rau haiv neeg no?
Yog los mas, yeej tseem tsis tau muaj tej cai tswj tej teeb meem kub ntxhov hauv lub cuab yig no siv tau tib yam thoob teb chaws no. Thiab kuv yeej paub tias Queensland yeej tau tsimt au ib co cai los tswj tej cwj pwm yuam tswj lwm tus (Coercieve Control) lawm thiab lwm cov xeev nrog rau NSW los kuj los txheeb txog tej cai no thiab.
Tab sis kuj yuav yog tej yam zoo yog tias muaj peev xwm tsim tau tej cai siv tau tib yam thoob teb chaws no, vim peb paub tias thaum tej neeg raug tej teeb meem no tswv tawm ntawm tej xwm txheej kub ntxhov hauv lub cuab yig lawm, ces lawv tsis muaj lwm txoj kev xaiv lawm dua ntawm qhov yuav tau mus nyob tej zos yaj sab los sis yog yuav tau mus nyob nrog ib co neeg ntawm lawv tsev neeg uas nyob txawv xeev xwb.
Yog li ntawd tsoom fwv thiaj xav xyuas kom qhia tau tej xov xwm txog tej teeb meem no kom yooj yim tshaj qub ntxiv thiab siv zoo tib yam kom nthuav dav tuaj ntxiv thoob plaws rau tej xeev.
Txawm hais li ntawd lawm los kuj yeej tseem yog ib co teeb meem sib chab sib chaws heev li thiab, tab sis peb yeej paub tias xyoo no mas muaj tej poj niam tas sim neej tshwm sim ntau dua ntawm Queensland thiab NSW thiab Victoria ces yog lub xeev muaj tej poj niam tas sim neej coob ua zum peb. Ces thiaj ua rau peb lub xeev no yog cov xeev uas muaj tej teeb meem kub ntxhov hauv lub cuab yig no ntau dua.
Peb ho muaj peev xwm yuav daws tau tej txiv neej tej cwj pwm tsim teeb meem kub ntxhov li cas?
Zoo li tej zaum txhua lub xeev nyias yeej muaj nyias cov program los pab hloov txiv neej tej cwj pwm no yog tias lawv xav tso tseg tsis tsim teeb meem kub ntxhov hauv lub cuag yig ntxiv thiab xav los npaj ntau yam los nrog daws tej teeb meem no, yog lawv xav los txheeb txog thiab lees paub tias lawv tej cwj pwm ua rau muaj teeb meem dab tsi. Tab sis kuj yog tej yam ib nyuag nyuaj uas yuav hloov tau lawv tej cwj pwm thiab.
Txawm li cas los yeej muaj ntau yam kev pab cuam, muaj cov kev pab hloov tej txiv neej tej cwj pwm, muaj cov kev pab cuam tswj cov kev npau taws, thiab muaj tej programme qhia cov kev ua niam txiv uas tej txiv neej muaj peev xwm siv coj los nrog daws tej teeb meem no. Tsuas nyob ntawm seb tus neeg ntawd puas xav thov kev pab cuam thiab seb nws puas xav hloov nws tej cwj pwm xwb.
Koj xav li cas rau Hmoob tej zejzog ntawm teb chaws Australia no xwb? Peb puas ntsib tej teeb meem kub ntxhov hauv lub cuab yig li haiv neeg Australia tab tom ntsib thiab peb ho yuav daws tej teeb meem no li cas?
Kuv xav tias teeb meem kub ntxhov hauv lub cuab yig yeej ua rau muaj teeb meem rau txhua leej txhua tus ntawm zejzog, tsis yog muaj rau Hmoob tej zejzog nkaus xwb, tab sis yeej muaj rau Australia lwm cov neeg zejzog thiab.
Kuv yeej tau hnov tias muaj ntau cov xwm txheej kub ntxhov uas txaus txhawj xeeb ntawm Hmooob tej zejzog thiab yog tham txog tej teeb meem kub ntxhov hauv lub cuab yig uas uas tua ib tug twg ntawd.
Tab sis kuv xav tias lub hom phiaj ntawm lub hli no ces yog xav qhia kom zej tsoom paub txog tej teeb meem kub ntxhov hauv lub cuab yig ntau ntxiv tuaj thiab kom paub tias ho muaj tau teeb meem dab tsi, thiab ua zoo xyuas kom tej neeg paub tias yuav muaj peev xwm nrhiav tau kev pab cuam qhov twg yog lawv ntsib tej teeb meem no. Tsis tas li ntawd los peb koj xav kom tej neeg uas pheej tsim teeb meem rau lwm tus los yog tej uas pheej siv kev kub ntxhov tsim teeb meem rau lwm tus yuav tau txheeb txog tej lawv pheej tsim rau lwm tus, thiab nrhiav kev pab cuam coj los hloov lawv tej cwj pwm yog tias lawv xav hloov.
Tab sis yog tham txog Hmoob tej zejzog lawm, ces tej xwm txheej no kuj tseem yog ib co teeb meem thiab. Kuv xav tias peb yuav tau kub siab tshaj no ntxiv los nrog daws tej teeb meem no thiab.
Koj puas muaj lwm yam lus tawm tswv yim txog tej teeb meem kub ntxhov hauv lub cuab yig li cas ntxiv, thiab tam li yog ib lub teb chaws, zejzog los yog ntiag tug ne peb ho muaj peev xwm ua tau dab tsi los tiv thaiv thiab xaus kom tsis txhob muaj tej teeb meem no ua ntej yuav pib muaj tej teeb meem no tshwm sim?
Tej teeb meem kub ntxhov hauv lub cuab yig yeej yog ib co sib chaw sib chaws heev. Kuv xav tias yog peb sab laj sib tham txog thiab qhia qhov tseeb ncaj qhia txog tej teeb meem no, thiab xyuas kom zej tsoom paub txog tej teeb meem no, ces yuav pab kom tej zejzog totaub txog tej teeb meem no tias Australia yeej kub siab heev los nrog daws.
Hos yog tham txog tej kev pab tej neeg uas ntsib tej teeb meem kub ntxhov no, ces kuv xav txhawb nqa kom nej nrog tub xeev xwm tham yog tias nej muaj ib yam teeb meem cuam tshuam txog tej xwm txheej no.
Kuv kuj xav kom tej neeg mus sab laj thiab thov kev pab cuam lij choj coj los tawm tswv yim thiab txheeb tias seb yus tab tom poob rau tej xwm txheej zoo li cas tam sim no yog tias tej zaum yus xav tsiv tawm ntawm ib co kev txij nkawm uas tej zaum yuav raug kev phom sij, ces yus yeej muaj peev xwm sab laj nrog Legal Aid los yog mus sab laj nrog tej koom haum pab cai lij choj rau tej zejzog tias seb ho muaj tej xub ke li cas pab kom yus ua tau dab tsi txuas ntxiv thiab lawv yeej yuav qhia txoj xub ke yog rau yus tias tsim nyog yuav mus thov kev pab cuam li cas ntxiv.
Tej kev pab cuam pab rau Support Services for Victims of Domestic Violence:
1800 Respect National Helpline: 1800 737 732
Women’s Crisis Line: 1800 811 811
Safe Steps: 1800 015 188
Orange Door
InTouch Multicultural Centre: 1800 755 988
Mens Referral Service: 1300 766 491
Lifeline (24 hour crisis line): 131 114
Relationship Australia: 1300 364 277
NOTE:
Cov lus tham nrog Austin Virathone no tsuas yog coj los qhia ua ib cov kev paub xwb, yog koj xav tau txais kev pab cuam tiag ces tsim nyog koj mus thov kev pab cuam nrog tej kws lij choj teev zwm raug cai.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
