លោក កុយ គួង ឯកអគ្គរាជរដ្ឋទូតកម្ពុជា ប្រចាំប្រទេសអូស្ត្រាលី បានឲ្យដឹងថា លោកនាយករដ្ឋមន្ត្រី ហ៊ុនសែន នឹងអញ្ជើញទៅដល់ប្រទេសអូស្ត្រាលី នៅថ្ងៃទី១៦ ខែមីនា ឆ្នាំ២០១៨ ដើម្បីចូលរួមកិច្ចប្រជុំកំពូលពិសេសរវាងអាស៊ាន និងអូស្ត្រាលី នៅទីក្រុង ស៊ីដនី ចាប់ពីថ្ងៃទី១៧ ដល់ថ្ងៃទី១៨ ខែមីនា ឆ្នាំ២០១៨។
កាលពីពេលថ្មីៗនេះ មានបាតុករ ជាពលរដ្ឋខ្មែរមួយចំនួន នៅប្រទេសអូស្ត្រាលី បានប្រមូលផ្តុំធ្វើបាតុកម្ម ប្រឆាំងនឹងវត្តមានរបស់លោកនាយករដ្ឋមន្ត្រីហ៊ុនសែន។ លោកនាយករដ្ឋមន្ត្រី ហ៊ុនសែន ដែលក្រុមអ្នកតវ៉ា ចាត់ទុកថា ជាមេដឹកនាំផ្តាច់ការ និងធ្វើឲ្យលទ្ធិប្រជាធិបតេយ្យ នៅកម្ពុជា ដើរថយក្រោយ។ បាតុករ ក៏បានទាមទារដោះលែងលោកកឹមសុខា និងទាមទារឲ្យអតីតគណបក្សសង្គ្រោះជាតិ អាចវិលត្រឡប់ ចូលរួមការបោះឆ្នោតជ្រើសតាំងតំណាងរាស្ត្រ នៅខែកក្កដា ឆ្នាំ២០១៨។
ក្រុមបាតុករ អ្នកតវ៉ា ក៏បានដុតរូបថត និងរូបទីមោង តំណាងឲ្យលោកនាយករដ្ឋមន្ត្រី ហ៊ុនសែន ដែលនាំឲ្យលោកនាយករដ្ឋមន្ត្រី ថ្លែងចំអកឲ្យ ដោយថា ការដុតរូបទីមោងនោះ គឺមិនត្រូវរូបលោកទេ ហើយបាតុករ គួរតែដុត និងវាយកម្ទេចរូបនាគ នៅតាមវត្តអារាម ព្រោះថា ជោគជរារាសី និងបារមីរបស់លោក ស្ថិតនៅលើរូបនាគ ដោយសារតែលោក កើតឆ្នាំរោង មានពង្ស ជាសត្វនាគ។ មុនពេលក្រុមអ្នកតវ៉ា ដុតរូបថត និងរូបទីមោង កាលពីប៉ុន្មានថ្ងៃមុន លោកនាយករដ្ឋមន្ត្រី ហ៊ុនសែន បានប្រកាសព្រមាន កុំឲ្យធ្វើបែបនេះ ហើយលោកថា បើមានអ្នកតវ៉ាដុតរូបថត និងរូបទីមោង តំណាងរូបលោក នោះលោកនឹងតាមចាប់ដល់ផ្ទះ៕
